Paşa ƏMİRCANOV
[email protected]

Ermənistanın Azərbaycana təcavüzünün bütün dövrü ərzində xalqımızın məruz qaldığı ağrı-acıları qərbli tərəfdaşlarımızdan heç kim görmədi. Gördülərsə də, görməzliyə vurdular. Nə Xocalı kimi bəşəriyyət əleyhinə cinayət xarakteri daşıyan faciəmizə analoji reaksiya verildi, nə şəhər və kəndlərimzin yer üzündən silinməsinə, nə də ərazilərimizin minalarla doldurulmasına. Erməni diasporunun çirkli pulları 30 il ərzində qərbli tərəfdaşlarımızın gözünü elə kor elədi ki, hələ də özlərinə gələ bilmirlər. 

Baxın, Azərbaycan ərazilərinin er­mənilər tərəfindən çirkləndirilməsindən “Human Rayts Votç” təşkilatı heç indinin özündə də xəbər tutmayıb. Amma Azər­baycan Prezidenti İlham Əliyev dəfələrlə ayrı-ayrı beynəlxalq təşkilatların tribu­nasından, xarici ölkə başçıları ilə gö­rüşlərdə bəyan edib ki, işğal illəri ərzin­də ərazilərimiz minalarla həddən artıq çirklənib. Onun bu ilin 20 sentyabrında, lokal xarakterli antiterror tədbirlərindən sonra xalqa müraciətində bildirilirdi ki, İkinci Qarabağ müharibəsi başa çatan­dan sonra bu günə qədər 300-dən çox Azərbaycan vətəndaşı mina terrorunun qurbanı olub. Bu minalar İkinci Qarabağ müharibəsindən sonra Ermənistandan Azərbaycanın Qarabağ bölgəsinə qa­nunsuz olaraq daşınıb və müxtəlif yerlər­də basdırılıb. Bu ölüm qurğuları 2021-ci ildə Ermənistanda istehsal olunub. 

Amma bütün dünyada özünü in­san haqlarının müdafiəçisi elan etmiş, necə deyərlər, qarşısına çıxan bir çox ölkəyə, əsasən də Azərbaycana bu xü­susda iradlar tutan “Human Rayts Vot­ç”un bundan xəbəri yoxdur. Bunu həmin beynəlxalq qeyri-hökumət təşkilatının BMT-dəki direktoru Luis Çarbonau (Lou­is Charbonneau) elan edib. O, XXI əsr­də Azərbaycanın üz-üzə olduğu ekoloji fəlakətdən, Ermənistanın 30 illik işğal dövründə ölkəmizdə buraxdığı dəhşət­li mirasdan, eləcə də mina terrorundan məlumatsız olduqlarını iddia edib: “Biz bu məsələdən xəbərdar deyilik. Mən bununla bağlı heç bir araşdırma tapa bilmirəm, amma həmkarlarımdan soru­şacağam”.

Ancaq hesab edirik ki, “Human Rayts Votç”un bütün bu münasibəti riyakarlıqdan, ikiüzlülükdən, ikili stan­dartlardan başqa bir şey deyil. Çünki o, Ermənistanın Azərbaycana qarşı təca­vüzü, işğal olunmuş ərazilərdə mədəni, dini abidələrimizin dağıdılması, əhalinin evlərinin kütləvi şəkildə sökülüb Ermə­nistana daşınması, təbii sərvətlərimzin oğurlanması, eləcə də işğal zonalarımı­zın minalarla çirkləndirilməsi barədə çox yaxşı məlumatlıdırlar. Ən azı, Azərbay­can Prezidentinin bu barədə BMT Baş Assambleyasının sessiyalarındakı çıxı­şında mina problemimiz barədə geniş söhbət açıb, ermənilərin mina xəritəsini Azərbaycana verməkdən imtina etdiyi barədə fikirlərini beynəlxalq ictimaiyyətə çatdırıb. 

Əslində, Azərbaycanın son 30 ildə qarşılaşdığı erməni təcavüzü və onun dəhşətli nəticələrindən təkcə “Human Rayts Votç” kimi beynəlxalq təşkilatlar deyil, bir çox Qərb ölkələri də zaman-za­man “xəbərsiz” olub. Vaxtilə ABŞ kimi dünya ağalığı iddiasında olan bir döv­lət də Ermənistanın Azərbaycana qar­şı ərazi iddiasından “xəbərsiz” olmuş, ermənilərə müqavimət göstərdiyimizə, ərazilərimizin bütövlüyünü qorumaq istədiyimizə görə 1992-ci ildə bizə qarşı 907-ci maddə tətbiq etmişdi. Eyni za­manda, ABŞ Dövlət katibinin köməkçisi Ceyms O’Brayn Konqresin Nümayən­dələr Palatasının Xarici İşlər Komitəsinin Avropa üzrə alt komitəsinin dinləmələ­rində ölkəmizlə bağlı qərəzli fikirlər səs­ləndirərkən də guya erməni işğalından “xəbərsiz” olmuş, Azərbaycanı işğalçı hesab etməyə çalışmışdı. Buna görə də 907-ci maddənin yenidən işə salınması­nı, Azərbaycanla münasibətlərin “əvvəlki kimi ola bilməyəcəyini” bəyan etmişdi. 

Amma Prezident İlham Əliyev no­yabrın 27-də ABŞ Dövlət katibi Antoni Blinkenlə telefon söhbəti zamanı bu cür qərəzli fikirlərin Azərbaycan–ABŞ münasibətlərinə ciddi zərər vurduğunu qeyd etməsindən sonra Vaşinqtonda­kı tərəfdaşlarımızın hər şeydən yaxşı xəbərdar olduğu üzə çıxdı. Və yalnıəz Azərbaycan liderinin ciddi tənqidlərin­dən sonra Blinken münasibətlərin nor­mallaşdırılması məsələsini qaldıraraq, Ceyms O`Braynın Azərbaycana səfərinə icazə verilməsini xahiş etdi. Prezident İl­ham Əliyev təkliflə bir şərtlə razılaşıb ki, bu səfərdən sonra Azərbaycanın yüksək səviyyəli rəsmilərinin ABŞ-a səfərlərinə qoyulan əsassız qadağa aradan qaldı­rılsın. Dövlət katibi Blinken bunu qəbul edib.

ABŞ-ın “xəbərsiz” olduğu daha bir məsələ – ermənilərin sülh müqaviləsini imzalamaqdan qaçmasıdır. Prezident İl­ham Əliyev Ermənistanın sülh təklifimizi 70 gün gecikdirdiyini deməsindən sonra Vaşinqtonun da yadına düşdü, Ermənis­tanın da. Ermənistan parlamentinin spi­keri Alen Simonyan elə həmin gün bə­yan etdi ki, İrəvan yaxın 15 gün ərzində Azərbaycanla sülh sazişi imzalaya bilər. Bax, məsələlərdən “xəbərsiz” olanların yaddaşını biz belə təzələyirik...

Paşa ƏMİRCANOV
XQ