Yazıçılar, alimlər kimi, kitabxanaçılar da oxucunun bəsirət gözünü açır, onun mənəvi dünyasına işıq salırlar. Onlardan biri də bizim Qax rayonundakı Cəfər Cabbarlı adına Kitabxananın direktoru Güllü Əhmədovadır.

Hələ orta məktəb illərində bədii kitab­lara olan sonsuz marağı ilə Güllü xanım yaşıdlarından seçilib. Arzusu filoloq ol­maq idi. Ancaq ilk cəhdində ali məktəbə qəbul ola bilməyəndə rayonda yeganə “Kitab evi” mağazasında satıcı işləməyə başlayıb. Elə bu kitab dünyasının ca­zibəsi ilə də peşə seçimində dəyişiklik edərək, kitabxanaçılığa üstünlük verib və ADU-nun (indiki BDU) eyni adlı fakültəsi­nin qiyabi şöbəsinə daxil olub. 

Düz 30 il əvvəl kitabxanaçılıq fəa­liyyətinə başlayan Güllü xanım tez bir zamanda biblioqraf kimi oxucuların sevimlisinə çevrilib. O, ötən günləri yada salaraq dedi: 

– Buna qayğıkeş kitabxanaçılar Nənə Kərimovanın, Zöhrə Mikayılova­nın və Biçə Balıyevanın sayəsində nail olmuşam. Sonradan böyük kitabxanaçı, mərkəzləşmiş kitabxana sisteminin di­rektor müavini oldum, 2004-cü ildən isə direktor vəzifəsində çalışıram. 

Kitabxananın kollektivi zamanın ça­ğırışlarına cavab verə bilmək üçün mü­sabiqələrdə, layihələrdə fəal iştirak edir. 2003, 2005 və 2007-ci illərdə ABŞ səfir­liyinin “Regional kitabxana”, Demokratiya Komissiyasının “Kiçik qrant proqramı” la­yihələrində “Kitabxanaların inkişafı” proq­ramına qatılaraq uğur qazanıb, öyrən­diklərini təcrübədə tətbiq edirlər. Həmin layihələr sayəsində kitabxanaya pulsuz internet xətti çəkilib, eyni zamanda, ora­da kompüter kursları və maarifləndirici təlimlər təşkil edilib.

Güllü Əhmədova 2008-ci ildə Moskvada “LİBKOM-2008”də, 2014-cü ildə isə Bakıda kitabxanaçıların bey-nəlxalq konfransında iştirakını da faydalı hesab edir. 

Onun həyatında unudulmaz günlər çox olub. Amma Azərbaycan qadınla­rının I qurultayında Ulu öndər Heydər Əliyevlə görüşünü iftixarla xatırlayır. Təc­rübəli kitabxanaçı qardaş Türkiyədə ke­çirilən Ankara Beynəlxalq Sənət Festiva­lında “Üstün peşəkarlıq medalı” ilə təltif edilib. Rəhbərlik etdiyi kitabxana iki dəfə Mədəniyyət Nazirliyinin “İlin kitabxanası” müsabiqəsinin qalibi olub. Güllü xanım 2020-ci ildə “Hər günə bir şeir”, 2021-ci ildə “Ey söz dünyasının hakimi, Nizami!” və “Rəşadətlə yaşayanlar, ölümü fəth edənlər” müsabiqələrində, “Şəhidlərimizi tanıyaq və tanıdaq”, “Ədiblərimizi bizdən dinləyin” layihələrində də uğurla iştirak edib. O, həm də mətbuat səhifələrində dərc olunan maraqlı yazıların müəllifidir. Bizim qəzetdə, eləcə də “Mədəniyyət” qəzetində, “Mədəni-maarif” jurnalında maraqlı məqalələrlə çıxış edib. “Saflıq çeşməsi Qax” adlı kitab da Güllü Əhmə­dovanın qələminin məhsuludur. 

Bəli, 1906-cı ildə Tiflisdə çıxan “Za­kavkazskiy vestnik” qəzetinin Azərbay­can bölməsinin müdiri, qaxlı Həmzət bəy Qabulov–Şirvanskinin evində “Qiraət ko­ması” adı ilə fəaliyyətə başlayan hazırkı rayon mərkəzi kitabxanasının estafeti eti­barlı əllərdədir. 

Xavər ƏFƏNDİYEVA,
Qax rayonunda çıxan “Şəlalə” qəzetinin redaktoru