Ermənipərəstlik naminə sərsəmləmə məharəti 

ABŞ konqresmeni Frank Pallone yenə, necə deyərlər, qatıqlayıb. Bu şəxsin ermənipərəst­liyi, Birləşmiş Ştatlardakı erməni lobbi və diaspor təşkilatları ilə sıx əlaqəda olduğu, həmin qurumların maraq və mənafelərindən çıxış etdiyi sirr deyil. Qulluq etdiyi dairələ­rin istəklərini yerinə yetirmək üçün hər cür oyunbazlığa baş vurduğu da, həmçinin. An­caq hesab edirik ki, Pallone bu dəfə barıtı bir qədər çox edib. Bu yerdə sirkənin nə qədər çox tünd olsa, öz qabını çatlatması reallığını da nəzərə alaq. 

F.Pallonenin bir neçə gün əvvəlki açıqla­ması onun xarakterində və mahiyyətindəki aş­kar çatların nümayişindən başqa bir şey deyil. Görünür, erməni ağalarından aldıqları ənam və bəxşişlərin sayı artıb və konqresmen beyin “qıcqırması” keçirib. Cənab Pallonenin nələr­dən söz açdığını diqqətə çatdıracağıq. Ancaq hələlik bir məqamın üzərində dayanaq. 

Məlum olduğu kimi, Azərbaycan Silahlı Qüv-vələri ötən il sentyabrın 19-20-də Qarabağda lokal xarakterli antiterror tədbirləri reallaşdır­dılar. Bu tədbirlərin nəticəsi olaraq bölgədəki separatçı rejim tarixin arxivinə gömüldü. Er­mənistan hakimiyyətinin bilavasitə təşəbbüsü ilə Qarabağ erməniləri öz evlərini tərk edib Ermənistana yollandılar. Heç şübhəsiz, rəsmi İrəvanın bu addımı Qarabağ avantürasını nis­gilə daşımaq niyyətinə əsaslanmışdı. Yəni ki, bölgə Azərbaycanın hüquqi və faktiki idarəçiliyi altına düşürsə, ərazinin ermənisizləşdirilməsi xətti götürüldü və həmin xətt bu gün Ermə­nistan hakimiyyətinin və onun xaricdəki hava­darlarının anti-Azərbaycan ritorikasının vacib halqasını təşkil etməkdədir. Guya ki, Qarabağ ermənilərini didərgin salan Azərbaycan olub. ABŞ konqresmeni F.Pallonenin də dediyi elə budur. Bəs, barıtı çox eləmək məntiqi özünü nədə göstərir?

Birləşmiş Ştatların ermənipərəst konqresmeni bildi­rir ki, ötən il Qarabağa “ölümcül hücum” əmri verməklə, guya Azərbaycan rəhbərliyi beynəlxalq hüququ pozdu və ölkəmizin 120.000 erməninin “tarixi vətənləri”ndən qovulmasına səbəb olmuş soyqırımı kampaniyasının ağır nəticələri ilə üzləşdirilməsi müstəsna ilahi vəzifədir. Fikrini davam etdirən F.Pallone onu da deyib ki, Birləş­miş Ştatların Azərbaycan rəhbərliyini məsuliyyətə cəlb etmək üçün tədbirlər görməsinin vaxtı çoxdan çatıb. 

Əlbəttə, F.Pallonenin beynəlxalq hüquq anlayışın­dakı bəsitliyi vurğulamaq niyyətindən uzağıq. Heç də onu demək istəmirik ki, Birləşmiş Ştatlar Azərbaycanın ərazi bütövlüyünü tanıdığı halda, konqresmen nədən danışır? Sadəcə, belə yelbeyinlərin necə və hansı yolla ABŞ-ın ali qanunverici orqanında təmsil olunduğu ma­raqlıdır. Görəsən, ölkədə hər şey bu qədərmi alt-üst du­rumdadır? Yəqin ki, elədir. Başqa nə düşünəsən?

Bir ölkənin ki, Dövlət Departamenti rəhbərinin köməkçisi Ceyms Obrayn Azərbaycanın İranla mü­nasibətlərinə qarışacaq tərzdə fikir bildirir, o zaman F.Pallone kimilərdən nə gözləyəsən? Yəni, hədsizliyi özlərinə həyat norması seçmiş pallonelərin danışdıq­ları, həqiqətən də, gülməlidir. Vaşinqton Azərbaycan rəhbərliyini məsuliyyətə cəlb edəcəkmiş? Görəsən, necə? İnanmırıq ki, cənab Pallone bunun mexanizm­lərini düşünür. Elə Obrayn da Azərbaycanın əsas his­səsinin Naxçıvanla quru yolunun İrandan deyil, Ermə­nistan ərazisindən keçməli olduğunu bildirəndə heç bir mexanizmə söykənmirdi. Söykəndiyi ABŞ-ın imperialist yanaşma tərzi idi. Bu yanaşma üçün isə bütün bey­nəlxalq hüquq normalarına həqarət adidən də adi bir təzahürdür. 

Digər tərəfdən, F.Pallone səsləndirdiyi fikirlərlə heç də yenilik etmir. O, son günlər ABŞ-ın anti-Azərbaycan yönümlü siyasi xətti üçün xarakterik olan məqamları qabardır. Nədir bu xarakterik məqamlar? Əlbəttə ki, Azadlığa Dəstək Aktına 907-ci düzəliş və Xarici Yardım Aktının 1976-cı ildən bu yana tətbiq edilməyən 502-ci bəndi. Hər iki məsələ Azərbaycanı Birləşmiş Ştatların birbaşa dövlət yardımından məhrum edən “təşəbbüs­dür”. 

Doğrudur, ölkəmizin ABŞ-dan yardım almaması maddi baxımından heç nədə özünü göstərən deyil. Yəni, Vaşinqtonun köməyinə onsuz da ehtiyac duymu­ruq. Məsələ mövzunun siyasi-mənəvi tərəfi ilə bağlıdır. Sırf mənəvi baxımdan yanaşsaq, F.Pallone və onun ermənipərəst dostları Azərbaycanı dünyadan təcrid etməyə çalışırlar. Bu təcriddə ölkəmizdə insan hüquq və azadlıqlarına, guya, etinasız münasibətin mövcud­luğuna dair qondarma mahiyyət əsas götürülür. Siya­si nöqteyi-nəzərdən baxdıqda isə burada daha “incə” mətləblər var. Əslində, F.Pallone də həmin mətləbləri açıqlayır. Beləliklə, aydın olur ki, ayının min oyunu bir armudun başındadır. 

ABŞ-ın ermənipərəst dairələri Azərbaycanla sülh danışıqları fonunda Ermənistanın, necə deyərlər, əlini gücləndirmək istəyirlər. Hesab edirlər ki, bu yolla İrə­vanın maraq və mənafelərini təmin edəcəklər. Diqqət yetirək, Pellone deyir ki, demokratdır. Görəsən bu am­pulada özünü necə təsəvvürə gətirir? Çox sadə - sülh danışıqlarında Ermənistanın etibarlı tərəf olacağını sü­buta yetirən demokrat kimi. Yəni, bu adamın anlayışın­dakı demokratizm ermənipərəstlikdən o yana keçmir. 

Bəli, demokratiya adına parodiyaya çevrilmiş F.Pal­lone özü ilə həm də Ermənistanın Müdafiə Aktı deyilən təşəbbüslə çıxış etdiyinə görə öyünür. Öyünsün, biz isə yazının ilk abzasında vurğuladığımız məqama qayıdaq. Söhbət sirkənin öz qabını çatlatmasından gedir. Yəni, sirkə tünd olur ki, qab çatlayır. İndi ABŞ-ın mövcudluğu­na şübhə etmədiyimiz mütərəqqi başları düşünsünlər. Düşünsünlər və nəticə çıxarsınlar ki, ölkələrində de­mokrat adını oyunbazlıq predmetinə çevirmiş şəxslər var və onların “hərəkətləri” bütövlükdə Birləşmiş Ştatla­rın demokratik düşüncə tərzinin son dərəcə ciddi böh­ranıdır. Onu da düşünsünlər ki, qatığa qara deyən pal­lonelərə görə ABŞ-ın demokratik imicinə böyük zərbə dəyəcək. Dəyəcək yox, artıq bu proses başlayıb. Heç şübhəsiz, yelbeyin konqresmenlər qaldıqca, gedişat ölkənin onsuz da sarsılmış nüfuzunu, tamamilə, yer­lə-yeksan edəcək. 

Ə.RÜSTƏMOV
XQ