Bakının ikitərəfli təmas təklifindən İrəvanın imtinası onun müstəqil olmadığını göstərir
ABŞ-ın və Avropa İttifaqının Azərbaycan və Ermənistan arasında sülh danışıqları təşkil etmək cəhdləri hazırda, faktiki olaraq, uğursuzluq zolağındadır. Bunun fonunda Bakı İrəvana birbaşa təmaslara keçməyi təklif edib. Hər halda, ölkəmizin Xarici İşlər Nazirliyinin iki gün əvvəlki açıqlamasını məhz belə qiymətləndirmək mümkündür.
Bəli, Azərbaycan vasitəçilər formatından uzaq dayanmağa üstünlük verir. Bunun səbəbini bir qədər sonra aydın görəcəksiniz. İndilik onu vurğulayaq ki, hazırda ən başlıca məsələ Ermənistanın Azərbaycanın “tet-a-tet” danışıqlar təklifinə hansı reaksiyanı verməsidir. Yəni, top İrəvanın tərəfindədir.
Ermənistanın isə konkret cavabı yoxdur və çox güman, olmayacaq da. Üstəlik, ehtimal var ki, İrəvan Bakının təklifindən, ümumiyyətlə, imtina etsin! Yeri gəlmişkən, imtinanın ilk işartıları artıq görünməkdədir. Fikrimizin təsdiqi üçün iki məqamın üzərində dayanaq.
***
Birinci məqam Ermənistanın Xarici İşlər Nazirliyinin dünənki açıqlamasıdır. Orada təkbətək danışıqlar məntiqinə dair yalnız bir cümlə var. Guya, Ermənistan, vaxtilə, delimitasiya və demarkasiya ilə məşğul olan birgə komissiyanın iclasının şərti sərhədə yaxın ərazidə keçirilməsini təklif edibmiş. Belə çıxır ki, Azərbaycan həmin təkliflə razılaşmayıb. Halbuki, məsələnin qoyuluşu düzgün deyil. Çünki Azərbaycan–Ermənistan şərti sərhədinin Ermənistan tərəfində Avropa İttifaqının müşahidəçiləri var. Yəni, maraqlı tərəflər. Deməli, ölkənin xarici siyasət idarəsinin açıqlaması əvvəlki manipulyasiya xəttinin davamıdır. Yəni, bilmək olmur ki, Ermənistan Azərbaycanın təkbətək danışıqlar təklifinə razıdır, yoxsa yox. Həm də ona görə bilmək olmur ki, Ermənistan XİN özünü ölkəmizi ittiham məntiqinə kökləyib. Halbuki, ortada konkret “hə” və ya “yox” cavabı olmalı idi.
Bəli, rəsmi İrəvan özünün gecikmiş təkliflərini ehkamlaşdırmaq yolunu tutaraq, Azərbaycanın birbaşa danışıqlar formatını inkar edir, Qarabağa təcavüz, bölgə ermənilərinin qovulması ritorikasına baş vurur. Üstəlik, bildirir ki, guya, Azərbaycan sülh prosesinə qayıtmaq imkanını və beynəlxalq tərəfdaşların mövcud istiqamətdəki səylərini açıq şəkildə görməzlikdən gəlməyə davam edir.
Qeyd edək ki, Ermənistan XİN danışıqlar üzrə əvvəl səsləndirdiyi üç prinsipi yenidən gündəmə gətirir. Bunlar heç bir qeyri-müəyyənlik olmadan ölkələrin bir-birinin ərazi bütövlüyünü qarşılıqlı şəkildə tanımaları və ona hörmətlə yanaşmaları, 1991-ci ilin Alma-Ata Bəyannaməsi və ən son qanuni sovet xəritələri əsasında növbəti demarkasiyanın həyata keçirilməsi, dövlətlərin suverenliyinə və yurisdiksiyasına, bərabərlik və qarşılıqlılıq prinsiplərinə tam hörmət əsasında regionda infrastrukturun açılmasıdır.
Əlbəttə, Azərbaycan yuxarıdakı üç prinsipi heç vaxt inkar etməyib, sadəcə öz mövqeyini irəli sürüb. Mövqe isə eyni zamanda, Ermənistanın öhdəliklərinə əməl etməsinin vacibliyinə əsaslanır. Digər tərəfdən, Ermənistan Qərb danışıqlar formatında yuxarıdakı prinsiplərə yeni çalarlar qazandırmaq məntiqini irəli sürür. ABŞ və Aİ-nin davranışları göstərir ki, onlar İrəvanın avantürist niyyətlərini əsas götürürlər. Ancaq “tet-a-tet” danışıqlarda belə bir manipulyasiya cəhdinə yer olmayacaq. Çox güman ki, elə bu səbəbdən Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev region məntiqini irəli sürür. Onun çağırış məzmunu daşıyan sözlərinə görə, sülhün kökləri regiondadır, Vaşinqtonda, Brüsseldə, Parisdə deyil və Ermənistan bunu başa düşməlidir.
***
İkinci məqama keçid alaq. Görünən budur ki, Azərbaycanın çağırışı Ermənistana çatmır. Daha doğrusu, İrəvan çağırışı düzgün qiymətləndirmək istəmir. Bunun Ermənistan XİN-in açıqlaması qismində ilk göstəricisini diqqətə çatdırdıq. Mövcud kontekstdə ölkə parlamentinin sədr müavini Akop Arşakyanın söylədikləri daha konkretdir. O bəyan edib ki, Ermənistan heç vaxt danışıqlardan yayınmayıb. Lakin vitse-spiker danışıq platformalarının əhəmiyyətindən söz açmağı yaddan çıxarmayıb. Elə manipulyasiya da məhz bundadır. Arşakyanın nə dediyinə diqqət yetirək: “Effektivliyi etimad yaratmayan platformalar varsa, Ermənistan həmin platformalardakı danışıqlarda iştirak etmir. Platforma etimad yaradırsa, biz də iştirak edirik. Ermənistanın hər hansı effektiv platformadan qaçmaq arzusu yoxdur. Bu, onun üçün faydalı deyil”.
***
Göründüyü kimi, həm Ermənistan XİN, həm də vitse-spiker Arşakyan Bakının birbaşa danışıqlar təşəbbüsünü, kifayət qədər, incə düşünülmüş hiyləgərliklə geri çevirir. Bu, şübhəsiz ki, İrəvanın müstəqil xarici siyasət yürütmək imkanında olmadığının növbəti təsdiqidir. Eyni zamanda, Arşakyanın açıqlaması İrəvanın səmimiyyət anlayışından uzaqlığının göstəricisidir. Sanki hansısa vasitəçilik missiyasının xidmətini nəzərə almaq, ölkə üçün daha effektiv imiş, nəinki birbaşa danışıqlar aparmaq. Yəqin, yanaşmadakı absurdluğun fərqinə vardınız.
Elə isə digər məqamlara da diqqət yetirərək, bildirək ki, İrəvan Moskvanı effektiv danışıqlar platforması saymır. İlk növbədə ona görə ki, Rusiyanın münaqişədə vasitəçi deyil, tərəf olduğunu iddia edirlər. Erməni siyasi dairələri son zamanlar vurğulayırlar ki, Rusiya Azərbaycanla birlikdə Zəngəzur dəhlizini tələb edərək, İrəvana qarşı ərazi iddiası irəli sürür. Yerdə qalır, Qərb platforması ki, onu da effektivliyini şübhələndirən Azərbaycandır. Əvvəldə də bildirdik ki, bu müstəvinin ermənipərəstliyə kökləndiyi artıq gün kimi aydındır.
Deməli, ilk baxışdan da ən yaxşısı ikitərəfli təmaslardır. Ancaq Ermənistan danışıqların Qərb formatını aktivləşdirməkdə israrlıdır. Ermənistan XİN özünün gecikmiş sülh təkliflərini məhz buna görə göndərir. Məqsəd həm də vaxt udmaqdır. Bu yerdə baş nazir Nikol Paşinyanın “sülh sazişi tərəflərin inamsızlığı səbəbindən imzalanmır” fikrini diqqətə çatdıraq. Nəzərə alaq ki, bu il mayın 14-də və iyulun 15-də Brüsseldə keçirilmiş üçtərəfli görüşlərdə Azərbaycanla sülhün üç əsas prinsipinin razılaşdırıldığını deyən erməni hökumət rəhbərinin indi həmin üç prinsip üzrə təkbətək danışıqlara razı olmasında elə bir problem olmamalıdır. Amma problem var.
Problem həm də ona görə var ki, Azərbaycan-Ermənistan münasibətlərinin nizamlanması üzrə əsas razılıqların Qərb platformasında əldə olunmasına baxmayaraq, hazırda baş verən proseslər onun göstərir ki, kollektiv Qərbi təmsil edən ABŞ və Aİ həmin razılaşmaları özünün anti-Rusiya seqmentinin tərkib hissəsi kimi görüb. Yəni, daha çox Bakı və İrəvan arasındakı durumun normallaşmasını deyil, bu normallaşma müstəvisində Rusiyanı Cənubi Qafqazdan sıxışdırmaq məramını əsas götürür. Azərbaycan isə avantüralara meydan vermir və təkbətək danışıqlar formatını irəli sürməklə, prosesi kənar təsirlərdən uzaq tutmağa çalışır.
***
Qeyd edək ki, Ermənistanın Azərbaycanın təklifi ilə razılaşmaması üçün bəhanələri də var. Məsələn, erməni siyasi dairələri bildirirlər ki, Azərbaycan indiyədək üzərinə götürdüyü öhdəlikləri yerinə yetirməyib, Qarabağa qarşı, guya, təcavüz gerçəkləşdirib, mövcud səbəbdən onun ikitərəfli təmas təklifinə etibar etmək olmaz. Yəni, mütləq üçüncü tərəf olmalıdır ki, təminat yaransın (?). Əlbəttə, biz də eyni şeyi, özü də çox haqlı olaraq Ermənistanla bağlı deyir və bildiririk ki, İrəvan öhdəliklərinə əməl etmir. Amma ölkəmiz sülhün əldə olunmasının vacibliyinə də köklənir, paralel surətdə sülh gündəliyini kənar təsirlərdən, regional ambisiyalardan qorumaq xəttini irəli sürür. Bir daha bildirək ki, hazırda top Ermənistanın tərəfindədir. İrəvanın bir yolu var: Bakının təklifi ilə razılaşmalı və imza atmalıdır!
Əvəz CAHANGİROĞLU
XQ