Nikol Paşinyanın yeni siyasi şousu İrəvanın son çırpıntılarıdır
İyulun 25-də Azərbaycan və Ermənistan xarici işər nazirəri – Ceyhun Bayramovla Ararat Mirzoyan arasında Moskvada rusiyalı həmkarları Sergey Lavrovun vasitəçiiyi ilə keçirimiş görüşün heç bir əhəmiyyəti qalmadı.
Əslində, eyni sözü iyulun 15-də Azərbaycan Prezidenti İlham Əliyevin Ermənistanın baş naziri Nikol Paşinyanla Brüsseldə Avropa İttifaqı Şurasının prezidenti Şarl Mişelin vasitəçiliyi ilə reallaşmış təmasının əhəmiyyəti barədə də söyləmək mümkündür.
Bəs, bunu gözləmək olardımı? Bəli, proseslər indiki vəziyyətə doğru gedirdi. İrəvanın həmin görüşlərə tam sayğısız yanaşacağı, yeni təxribatlara əl atacağı proqnozlaşdırılırdı.
Adətən, təxribat məqsədilə silahdan yararlanan Ermənistanın siyasi rəhbəriyi bu dəfə “metodunu” dəyişmiş kimi görünür. Yəqin, silahın fayda verməyəcəyini anlayır. Axı 44 günlük müharibədən sonra Azərbaycana qarşı hər şeyi sınaqdan çıxarıb və hər dəfə, necə deyərlər, oxu daşa dəyib. Yenə eyni aqibətə məhkumdur...
Ancaq nəinki Ermənistan hakimiyyətinin, eləcə də dünya erməniliyinin anlamadığı çox şey var. İndi məsələyə qayıtmaq mənasız və lüzumsuzdur. Onsuz da 44 günlük müharibədən sonra ermənilər və havadarları başlarını itiriblər. Əslində, Qarabağ ermənilərinə humanitar yardım kimi Laçın-Xankəndi yolunun başlanğıcındakı Həkəri sərhəd-nəzarət buraxılış məntəqəsinə tonlarla yükün göndərilməsi ideyası da məhz şizoferiyanın nəticəsidir.
Ermənistan baş naziri Nikol Paşinyanın sosial şəbəkə hesabında yazdıqlarından belə anlaşılır ki, ağılsızlıq etməkdən başqa çarəsi yox imiş. Doğrudur, o, məsələyə pafos qataraq, Qarabağ ermənilərinə dəstəyi, bir növ, “qayğıkeş ata” payı hesab edir. Hər bir halda, durum dəyişmir. Nikol və komandası Azərbaycanın maraq və mənafelərinin əleyhinə gedir və belə demək mümkünsə, daraqdakı son güllədən də istifadə edir. Bundan sonrası yoxdur. Daha doğrusu, var – növbəti müharibə.
Sual yaranır: Ermənistan nəyə nail olmaq istəyir? Birincisi, humanitar yardım şousu, yaxud sərhəddəki “tır aksiyası” dünyaya Qarabağda, guya dərin humanitar böhranın yaşandığını göstərmək və buna görə Azərbaycanı qınamaq istəyidir. İrəvan beynəlxalq ictimaiyyətin ölkəmizə qarşı çıxmasına çalışır. Çalışır ki, Azərbaycanın nüfuzu zədələnsin, respublikamız qəddar obrazında təqdim olunsun, xarici aləm ayağa qalxaraq, Ermənistana dəstək göstərsin və beləliklə, 44 günlük müharibədən sonra formalaşmış reallıqlar ikinci plana keçsin. İrəvan yaranacaq qarmaqarışıqlığı fürsət bilib öz gündəmini diktə etmək şansı qazanmaq niyyətindədir.
Bəli, aydın görünür ki, Ermənistan rəhbərliyi tərəfindən Qarabağa humanitar yardım karvanının göndərilməsi siyasi motivli aksiyadır. Həmin motivin isə bilavasitə daha qabarıq görünən bir seqmenti var – Azərbaycanla danışıqlar. İrəvan yenə də danışıqlar prosesinə yeni ab-hava gətirmək məqsədinə köklənib. Yəni, Ermənistanın bu qədər primitiv hesablanması var.
Baş nazir Nikol Paşinyanın administrasiyası danışıqlar prosesinin bütün mərhələlərində uduza-uduza gedir. İyulun 15-də keçirilmiş sonuncu Brüssel raundu da tam fiasko oldu. Məhz həmin görüşdə vasitəçi qismində çıxış edən Avropa İttifaqı Şurasının prezidenti Şarl Mişel Qarabağın erməni əhalisinə yardımların Ağdam-Əsgəran yolu vasitəsilə çatdırılmasını da məqbul qiymətləndirdiyini dilə gətirdi. Ş.Mişelin bu bəyanatı Ermənistan siyasi dairələrində və Qarabağ rejimində böyük səs-küy doğurmuş və görüşün ertəsi günü bölgədəki separatçılar Rusiyanın adamı sayılan Ruben Vardanyanın “təşkilatçılığı” ilə Ağdam-Əsgəran yolunu kəsmişlər. Öz aləmlərində prinsipiallıq nümayiş etdirdiklərini düşünən Ruben və onun başıpozuq çevrəsi, ölkəmizin erməni əhalisinə sahiblənməsinə yol vermədiyini göstərdi. İndi isə “inad” Laçındakı sərhəd nəzarət-buraxılış məntəqəsi müstəvisində gerçəkləşdirilməkdədir.
Yəni, Azərbaycana iki tərəfdən basqı var – bir yandan Ağdam-Əsgəran yolu bağlanır və Bakının Qarabağ ermənilərinə yardım məntiqinin sıradan çıxarılmasına cəhd göstərilir, digər istiqamətdən Laçındakı şərti sərhədə humanitar yardım göndərilir. Bilə-bilə ki, ölkəmiz onun keçidinə imkan verməyəcək. Prosesin bilavasitə Ermənistan iqtidarı tərəfindən idarə olunduğunu diqqətə çatdırmışkən, onu da vurğulayaq ki, İrəvanın hazırkı davranışı Azərbaycan-Ermənistan nizamlamasının Qərb vasitəçiliyinə qarşı çıxmaqdır.
Əvvəldə Azərbaycan və Ermənistan XİN rəhbərlərinin iyulun 25-də Moskvada düzənlənmiş görüşünü əbəs yerə xatırlatmadıq. Həmin görüşün gərgin məcrada keçdiyi istər C.Bayramovun, istərsə də A.Mirzoyanın fikirlərindən aydın görünürdü. Hazırda Ermənistan rəhbərliyinin, belə demək mümkünsə, “tır aksiyası” da həmin gərginliyin davamıdır. İrəvan bununla göstərmək istəyir ki, Moskvanın vasitəçiliyini də qəbul etmir. Daha doğusu, Ermənistan rəhbərliyi 30 ilə yaxın müddətdə Azərbaycanla danışıqlar prosesindəki həyasızlığını yenidən təkrarlamaq yolunu tutur. Həm Qərbə, həm də Rusiyaya qarşı çıxmaq görüntüsü formalaşdırır. Hərçənd, ikinci ilə bağlı qarşıçıxmada müəyyən məqamların altından qırmızı xətt çəkmək ehtiyacının olduğunu unutmamalıyıq...
Unutmamaq üçün deyək ki, əslində, Rusiya da Azərbaycanın Qarabağa sahiblənməsini istəmir. Bunu ölkənin XİN rəhbərinin istər haqqında söz açdığımız axırıncı üçtərəfli görüşündən əvvəlki, istər sonrakı, istərsə də ötən müddətdəki bir çox açıqlamalarından tam aşkar görmək mümkündür. Kreml Azərbaycan, Rusiya və Ermənistan liderlərinin üçtərəfli bəyanatı məntiqinə söykənir və çalışır ki, Bakı ilə İrəvan arasında mövcud status-kvo saxlanılsın və beləcə özünün Cənubi Qafqazdakı mövcudluğu davamlı xarakter daşısın.
Rusiyaya iki Cənubi Qafqaz ölkəsi arasında sülh müqaviləsinin imzalanması lazım deyil və Lavrov müxtəlif arqumentlər gətirirək, faktiki olaraq ölkəsinin mövqeyini ortaya qoymaqla məşğuldur. Müvafiq olaraq Moskvaya Cənubi Qafqazda gərginliyin qalması sərfəlidir. Ermənistan üçün isə sərfəli olan Azərbaycanın Qarabağa tam sahiblənməsinin qarşısının kəsilməsidirsə, bu qənaətə gəlirik ki, Paşinyan admistrasiyasına haqsız dirənişi aşılayan həm də Rusiyanın mövqeyidir. Dirənişə ictimai-siyasi anlam qazandırmağa gəlincə, Qərbin bəzi dairələrinin rolunu vurğulamağa ehtiyac var. Diqqət yetirək, Aİ təmsilçiləri “tır aksiyası”nın monitorinqinə yığışıblar. Söhbət qurumun Ermənistan ərazisindəki və indiyədək heç bir aktivliyi olmayan mülki müşahidə missiyasından gedir. O missiyadan ki, onun ilhamvericisi qismində çıxış edən Fransadır.
Baxın, hazırda elə bir vəziyyət yaranıb ki, Rusiyaya Cənubi Qafqazda Qərbin ermənipərəstliyi lazımdır. Daha doğrusu, indiki məqamda ermənipərəstliyin nümayişi baxımından Qərbin və Rusiyanın maraqları uzlaşmaqdadır. Əlbəttə, Qərb dedikdə daha çox Fransanı nəzərdə tutmaq lazımdır. Deməli, Rusiyanın və Fransanın mənafelərinin uzlaşdığına dair dünyanın bir sıra media orqanlarında yayımlanmış fikirlər təsdiqini tapmaqdadır və Fransa Prezidenti Emmanuel Makronun Rusiya Prezidenti Vladimir Putinə yarındığına görə qınanması heç də əbəs yerə deyil...
Bəli, Ermənistan Azərbaycanla sülh prosesinin pozulmaqda maraqlı olduğunu bir daha göstərməkdədir. Belə durumda ölkəmiz nə etməlidir? Əlbəttə, rəsmilərimiz “tır aksiyasına” münasibətlərini bildirdilər və Bakının belə təzyiqlər qarşısında geri addım atmayacağını vurğuladılar. Həqiqətən də hazırkı durumda geri addımın atılması yolverilməzdir. Əgər Qarabağa yardım göstərmək üçün yola düzəlmiş tırlardan hansısa biri Həkəri çayındakı sərhəddən keçsə, bu, Azərbaycanın öz ərazi bütövlüyünün və suverenliyinin toxunulmazlığı ilə bağlı səsləndirdiyi bəyanatlarının əhəmiyyətini itirəcəkdir.
Bəli, hazırda Laçın sərhəd buraxılış məntəqəsindən erməni tırının keçməsi ilə erməni tankının keçməsi arasında heç bir fərq yoxdur. Əlbəttə, tankın qabağını almaq daha asandır, nəinki tırın. Ancaq ölkəmiz bütün çətinlikləri yendiyi kimi, bu çətinliyə də sinə gərəcəkdir. Buna heç kəsin şübhəsi olmamalıdır və 44 günlük müharibədən sonra qazandığımız siyasi və diplomatik uğurlar da sözümüzün təsdiqidir.
Müharibədən söz düşmüşkən, Ermənistan son təxribatı ilə göstərir ki, onunla mübarizə aparmağın yegənə yolu müharibədir. Ölkə buna doğru addım-addım getdiyinin fərqində olmaya, müxtəlif siyasi şıltaqlıqlara baş vura bilər. Necə ki, indi də eyni yolu tutmaqdadır. Amma ölkə unutmamalıdır ki, siyasətin sərt sifəti var. Onu da unutmamalıdır ki, gücün qarşısında hiyləgərlik eləmək ona xeyir gətirməyəcək.
Ə.CAHANGİROĞLU, “Xalq qəzeti”