Prezident İlham Əliyevin Şuşadan xalqa müraciətində ümummilli liderimiz Heydər Əliyevin bütün dövrlərdə doğma Azərbaycana sədaqətlə xidmət etməsi, respublikamızın iqtisadi potensialını formalaşdırması, eyni zamanda, dövlət müstəqilliyimizin qorunmasında misilsiz xidmətlər göstərməsi xüsusi vurğulanmaqla yanaşı, dahi şəxsiyyətin 100 illik yubileyinin Şuşada keçirilməsinin mədəniyyət paytaxtımızın tarixi qələbənin rəmzi, zəfərin tacı olmasından irəli gəldiyi bildirilib. 

Dövlət başçısı daha sonra cari il başlayandan ümummilli liderin həyat və fəaliyyəti ilə bağlı bir sıra tədbirlər keçi­rildiyini, müzakirələr aparıldığını, mayın 2-dən indiyədək isə Qarabağ və Şərqi Zəngəzurda özünün iştirakı ilə 10 kəndin təməlinin qoyulduğunu, açılışlar həyata keçirildiyini vurğulayıb. Ölkə rəhbəri hə­min səfər çərçivəsində Qarabağ və Şərqi Zəngəzurun sürətlə dirçəldiyini, yollar, körpülər, tunellər, elektrik stansiyaları, su anbarları, məktəblər, xəstəxanalar, yaşayış binaları və məscidlərin inşa edil­diyini, yenidən qurulduğunu və ya təmir olunduğunu, həmçinin elektrik xətləri çəkildiyini, bütün bu quruculuq işlərinin təməlində isə Azərbaycan xalqının ma­raqları dayandığını söyləyib. 

Azərbaycan lideri müraciətində bir daha xatırladıb ki, ulu öndər Heydər Əli­yevin ən böyük arzusu Şuşanı, Qaraba­ğı və Zəngəzuru azad görmək idi: “Biz onun və bütün Azərbaycan xalqının, bü­tün dünya azərbaycanlılarının arzusunu çin etdik. Heydər Əliyev bütün dövrlərdə öz doğma xalqına sədaqətlə xidmət et­mişdir. Sovet Azərbaycanı dövründə – 1969–82-ci illərdə Azərbaycanı ən geri­də qalmış yerlərdən ən qabaqcıl yerlərə gətirib çıxarmışdır. Müstəqil Azərbayca­nın sənaye və iqtisadi potensialı məhz o illərdə formalaşmışdır. Məhz o illərdə yetişmiş kadrlar müstəqil Azərbaycanda və bu gün də fəaliyyət göstərərək bizim ümumi inkişafımızı təmin edirlər”.

Dövlətimizin başçısı müraciətində dahi şəxsiyyətin Azərbaycan rəhbərli­yinə yenidən qayıdışı dövrünü xatırla­daraq, həmin vaxt respublikamızın gələ­cəyinin yalnız xarici sərmayə hesabına mümkün ola biləcəyini diqqətə çatdırıb. Yeri gəlmişkən, Prezident İlham Əliyevin vurğuladığı kimi, o illərdə xəzinənin boş olması, inflyasiyanın min faizlərlə ölçül­məsi, sənayenin, o cümlədən, neft-qaz sektorunun iflic vəziyyətə düşməsi xarici investorların ölkəyə gəlmələrinə, onların sərmayə yatırmalarına çətinliklər törə­dirdi. Buna görə də mövcud problemlə­rin həllində 1994-cü il sentyabrın 20-də imzalanan “Əsrin müqaviləsi” növbəti bir dönüş nöqtəsi idi. 

Həmin tarixi sazişin imzalanması və uğurla gerçəkləşdirilməsi nəticəsində Azərbaycan dövlətinin payına düşən mənfəət neftinin 75 faizi hazırda ölkə iq­tisadiyyatını gücləndirir. 

Beləliklə, sözügedən müqavilə Azər­baycanın iqtisadi və siyasi mövqeyinin möhkəmlənməsində, beynəlxalq arena­da etibarlı tərəfdaş kimi nüfuz qazan­masında mühüm rol oynadı. Ümummilli liderin müəllifi olduğu neft strategiyası­nın əsas tərkib hissələrindən olan, çox­larına əfsanə kimi görünən Bakı–Tbili­si–Ceyhan neft və Bakı–Tbilisi–Ərzurum qaz kəmərlərinin reallığa çevrilməsi is­tiqamətində addımlar atıldı. 

Dahi lider o illərdə nefti Azərbaycanın ən böyük sərvəti kimi dəyərləndirərək, “qara qızıl”ın xalqa, özü də təkcə indiki nəslə deyil, həm də gələcək nəsillərə mənsub olduğunu bildirirdi. Dahi şəxsiy­yətin böyük uzaqgörənliklə 1999-cu ildə yaratdığı Azərbaycan Respublikasının Dövlət Neft Fondu ilk gündən etibarən neft gəlirlərinin xərclənməsində şəffaflı­ğı yüksək səviyyədə gerçəkləşdirməyə başladı. Ümumilikdə, Dövlət Neft Fondu­nun fəaliyyətindən qısa müddət ötəndən sonra bu təşkilat beynəlxalq səviyyədə şəffaflıq kriteriyaları üzrə nümunəvi qu­rum kimi dəyərləndirildi. Fondun vəsa­itləri hesabına həyata keçirilən sosi­al-iqtisadi layihələr ölkəmizin hərtərəfli inkişafını şərtləndirdi, keçmiş məcburi köçkünlərin yaşayış səviyyəsinin yaxşı­laşdırılmasına önəmli təsir göstərdi. İlk qaçqın şəhərciyi məhz o vəsaitlə inşa edildi, fondun maliyyəsi ilə ordu qurucu­luğunda çox ciddi addımlar atıldı. 

Prezident İlham Əliyev müraciətin­də ulu öndərin səyi, uzaqgörənliyi ilə o zaman Azərbaycanın Avrasiyada nəqliyyat mərkəzlərindən birinə çev­rilməsi istiqamətində mühüm layihələr gerçəkləşdirildiyini, respublikada Avro­pa–Qafqaz–Asiya Beynəlxalq Nəqliyyat Dəhlizinə dair çox böyük və mötəbər beynəlxalq konfransın reallaşdırıldığını da bildirib. Ölkə rəhbəri məhz o illərdə bu gün “Orta Dəhliz” deyilən layihənin bəzi maneələrə baxmayaraq, bünövrə­sinin qoyulduğunu, bu dəhlizin Azərbay­can ərazisindən keçməsinin də o zaman şərtləndirildiyini vurğulayıb. Xatırladaq ki, Orta Dəhliz (Transxəzər Beynəlxalq Nəqliyyat Dəhlizi) bu gün uğurla fəaliyyət göstərir. Hazırda dəhliz vasitəsilə tranzit yükdaşımaların həcmi 75 faizə çatır. 

Yeri gəlmişkən, marşrut Çin–Qa­zaxıstan sərhədindən başlayır və Qa­zaxıstan, Xəzər dənizi, Azərbaycan və Gürcüstan ərazisindən keçərək Avropa­ya qədər uzanır. Bütün dəhliz boyunca vahid tarif yaradılaraq “vahid pəncərə” prinsipi tətbiq olunur. Prezident İlham Əliyev müraciətində Heydər Əliyevin neft strategiyasının hazırda Azərbay­canın inkişafını, Qarabağın, Zəngəzu­run yenidən qurulmasını şərtləndirdiyini qeyd edərək deyib: “1994-cü ildə “Əs­rin kontraktı”, 1996-cı ildə “Şahdəniz” qaz-kondensat yatağı üzrə imzalanmış kontrakt bizim bugünkü iqtisadi qüdrə­timizi şərtləndirən əsas amildir. Bu gün Azərbaycan qazı nə qədər böyük önəm daşıyır, bunu hər kəs görür. Ölkəmizin geosiyasi önəmi böyük dərəcədə artıb. Bu gün Azərbaycan qazı 6 ölkəyə nəql edilir. Əgər hər şey plan üzrə gedərsə, bir il ərzində bu ölkələrin sayı 10-a çata­caq, ondan sonra daha da geniş coğra­fiyanı əhatə edəcək. Bu, həm bizə gəlir gətirir, həm bizim siyasi çəkimizi, həm də təsir imkanlarımızı artırır. Bütün bu işlə­rin təməli o illərdə qoyulub...”. 

Dövlətimizin başçısı müraciətində son 20 ildə Azərbaycanın iqtisadi inkişafı barədə də fikirlərini bölüşüb. İqtisadiyya­tımızın 3 dəfədən çox artdığını, valyuta ehtiyatlarımızın 65 milyard dollara çat­dığını, xarici borcun 6 milyard dollardan bir qədər yüksək olduğunu, valyuta ehti­yatlarının xarici borcu təxminən 10 dəfə üstələdiyini, ümumi daxili məhsulun isə cəmi 9-10 faizini təşkil etdiyini diqqətə çatdırıb. 

Ölkə rəhbəri müraciətində işğaldan azad olunan ərazilərimizdə bərpa-quru­culuq layihələrinin icra vəzəyyətindən də bəhs edib. Dövlətimizin başçısı mühari­bədən cəmi iki il yarım keçəndən sonra artıq köçkünlərin iki kəndə qaytarıldığını, 10 kəndin isə bünövrəsinin qoyulduğunu xatırladıb. 

Bu gün Qarabağ, Zəngəzur dirçəlir, işğaldan azad edilən ərazilərdə bərpa missiyası uğurla icra edilir. Dövlətimi­zin başçısının müraciətində daha sonra deyilir: “Ulu öndərin vəsiyyətini yerinə yetirərək öz doğma torpaqlarımızı azad etdik, ərazi bütövlüyümüzü bərpa etdik, aprelin 23-də Azərbaycan–Ermənistan sərhədində sərhəd-buraxılış məntəqəsi­ni qurduq, orada Azərbaycan Bayrağını qaldırdıq, eləcə də mülki missiyamızı– bu gözəl diyarın bərpası missiyasını da şərəflə yerinə yetirəcəyik.

Mən əminəm ki, bu gün atamın ruhu şaddır, bu gün bizim bütün əcdadlarımı­zın ruhu şaddır. Biz elə etməliyik ki, öz fəaliyyətimizlə daim onların ruhunu şad edək”.

Vaqif BAYRAMOV, “Xalq qəzeti”