Xalqımızın ümummilli lideri, Yeni Azərbaycanın memarı, zəmanəmizin böyük siyasi və dövlət xadimi Heydər Əliyevin anadan olmasının 100 illiyi ölkəmizdə son 65 ildə qazanılmış uğurlara ümumxalq baxışına, ulu öndərin bilavasitə rəhbərliyi ilə əldə edilmiş hərtərəfli tərəqqinin tarixi hesabatına çevrilib.
Müdiriklərdən biri deyib: “İnsanlar dünyasını dəyişəndən sonra yaşayan xatirələri onların ikinci həyatıdır”. Bu hikmətdən çıxış etsək ulu öndər Heydər Əliyevin çağdaş Azərbaycanın tarixində və taleyində oynadığı müstəsna rol, həyatın bütün sahələrində yaratdığı əsaslı dəyişiklik, həyatımızda qoyduğu silinməz izlər bu nəhəg insana da ikinci ömür, həm də əbədiyyət qazandırıb.
Unudulmaz lider Azərbaycana rəhbərliyinin hər iki dövründə Azərbaycanı qarış-qarış gəzib, ayağı dəyən yerlər gülüstana çevrilib, keçirdiyi görüşlər həmin bölgələrdə dastanlaşıb, buna görə də xatirələri daim sevgi-sayğılarla yad edilir. Tarixdə hər insana nəsib olmayan millət atası, ümummilli lider titullarını qazanmış Heydər Əliyev bu ululuğa xalqına çoxillik təmənnasız və misilsiz xidməti ilə yüksəlib.
Ulu öndər respublikamıza rəhbərliyinin birinci dövründə Azərbaycanın gələcək müstəqilliyinin zəruri əsaslarını yaradıb. Müstəqil Azərbaycanın memarı və qurucusu olmuş böyük rəhbər 10 illik prezidentliyi dövründə isə ölkənin hərtərəfli inkişafı və çiçəklənməsi, xalqımızın güzəranının yaxşılaşdırılması, demokratik dövlət, qüdrətli ordu quruculuğu, gənc müstəqil respublikamızın dünya birliyinə qovuşması, beynəlxalq aləmdə geniş tanıdılması yolunda müstəsna xidmətlər göstərib, tarixi uğurlara imza atıb.
Xalqımız haqlı olaraq müstəqilliyimizin banisinin qoyub getdiyi irsi, daxili və xarici siyasətini, ölkəmizin bütövliyi, tərəqqisi naminə bütün uğurlarını qoruyub davam etdirir. Heydər Əliyevin özünün dediyi kimi: “Tarixdən heç bir şeyi silmək olmaz, onun hər bir mərhələsi xalqın səlnaməsi, həyat yoludur”. Bu müdrik sözləri elə Heydər Əliyevin özünün də tükənməz fəaliyyətinə şamil etmək olar. Məhz ümummilli liderin apardığı ardıcıl və uzaqgörən siyasətin nəticəsidir ki, bu gün onun yaratdığı sənət əsəri – müasir və müstəqil Azərbaycan dünyanın ən qabaqcıl və inkişaf edən ölkələrindən biridir. Müstəqil dövlətimizi bu şərəfli və mötəbər mərtəbəyə Heydər Əliyevim dərin zəkası, titanik xidmətləri, müəyyən etdiyi dövlət siyasəti çatdırıb.
Ulu öndər Azərbaycanı xilas, dirçəliş və tərəqqi yoluna hədsiz çətinliklərə sinə gərərək, gərgin səyər göstərərək çıxarıb. Müstəqilliyin ilk illərində naşı siyasi qüvvələrin və rəhbərliyi zor gücünə ələ keçirmiş bacarıqsız insanların məsuliyyətsizliyi üzündən 1993-cü ilin iyun ayında ölkəmiz artıq vətəndaş müharibəsi həddinə çatmışdı. Azərbaycan hakimiyyət böhranı ilə üz-üzə qalmışdı. Xalqımızın müstəqilliyini istəməyən xarici güclərin dəstək verdiyi silahlı birləşmələr hakimiyyətin zəifliyindən istifadə edib ölkəni xaosa sürükləmişdilər.
Belə bir çətin şəraitdə xalqın təkidi ilə yenidən hakimiyyətə qayıdan Heydər Əliyev antiazərbaycan qüvvələrin planlarını alt-üst edərək ölkəni böyük bir fəlakətdən qorudu. Böyük siyasət nəhəngi olan ümummilli lider müstəqil Azərbaycanın idarəçilik sükanı arxasına keçərək sabitliyin, sosial-iqtisadi inkişafın və tərəqqinin qarantına çevrildi.
Azərbaycanın ağır günlərini yaşadığı bir vaxtda yenidən hakimiyyətə gələn və dövlət müstəqilliyimizin dayanıqlığına nail olmaq üçün səylərini, ilk növbədə, ölkə daxilində siyasi sabitliyin bərqərar olmasına yönəldən ulu öndər paralel olaraq strateji əhəmiyyət daşıyan bir sıra iqtisadi layihələrin gerçəkləşməsinə də öz töhfəsini vermişdir. Bu layihələrdən ən mötəbəri isə Heydər Əliyevin dəmir iradəsi və siyasi nüfuzu sayəsində 1994-cü il sentyabrın 20-də Bakıda imzalanan Əsrin müqaviləsi oldu. Bu müqavilə həm iqtisadi, həm də siyasi əhəmiyyət kəsb edir.
Ulu soydaşımız Heydər Əliyev Azərbaycanı – ümumi və bölünməz vətənimizi çox sevirdi. O, azərbaycanlı olması ilə həmişə fəxr edirdi və deyirdi: “Mən həmişə fəxr etmişəm, bu gün də fəxr edirəm ki, mən azərbaycanlıyam”.Bu yerdə keçmiş SSRİ-nin Dövlət Plan Komitəsinin sabiq sədri Nikolay Baybakovun sözünü xatırlamaq yerinə düşər: “Mən Azərbaycanı, Azərbaycan xalqını Heydər Əliyev qədər sevən ikinci adam tanımıram”. Heydər Əliyevin müdrik siyasət, tükənməz enerji, dərin inamla Vətən naminə gördüyü işlər tariximizə qızıl hərflərlə həkk olub və xalqımızın yaddaşında əbədi yaşayacaq. Eyni zamanda, Heydər Əliyev türk dünaysının qüdrətli lideri, dünya tarixində yeri olan böyük şəxsiyyətdir. BMT-nin keçmiş Baş katibi Butros Butros Qali demişdir: “Heydər Əliyev böyük şəxsiyyətdir. O mənim dostum, qardaşımdır. Onun yeri həmişə ürəyimin başındadır”.
Bütün Azərbaycan xalqı kimi ulu öndərimizi biz qarabağlılar, ilk növbədə, ağdamlılar da unutmur, qəlbimizdə yaşadırıq. Yaxşı yadımdadır ki, bütün regionlarımızın inkişafını da daim diqqət mərkəzində saxlayan respublika rəhbəri sovet dövründə 4 dəfə – 1973, 1974, 1981, 1982-ci illərdə Ağdam rayonuna səfər etmiş, hər gəlişində rayonun sosial-iqtisadi inkişafına yeni yön və stimul vermişdir.
Mən rayon partiya komitəsində məsul vəzifədə və Ağdamda çıxan rayon qəzetinin redaktoru olduğum illərdə ulu öndərimizin keçirdiyi iclas və plenumlarda, fəallar yığıncaqlarında, zona müşavirələrində iştirak etmişəm. Bu yaxın müşahidələrim zamanı onun Vətənini, xalqını nə dərəcədə sevdiyinin, insanlara necə diqqət və qayğı ilə yanaşdığının, unikal yaddaşa və biliyə malik olduğunun şahidi olmuşam. 1977-ci ildə Azərbaycan KP MK-da təcrübədə və 1986-cı ildə Moskvada SSRİ jurnalistlərinin qurultayında olarkən ulu öndərimizlə təmasda olduğum anlar da indi unudulmaz tarixə çevrilmişdir.
Azərbaycan rəhbəri birinci dəfə 1973-cü ildə Ağdamda səfərdə olarkən demişdi: “Mən arzu edirəm ki, Ağdam gündən-günə çiçəklənsin. Həm şəhər, həm də kəndlər dastanlarda, şeirlərdə olduğu kimi, Azərbaycanın gözəl bağ-bağatlı guşəsi olsun”. O, rayonun kolxozlarında pambıqçılarla və mexanizatorlarla görüşmüş, onların əmək və güzaranı ilə maraqlanmışdı. Heydər Əliyev zarafatından qalmayaraq 9 uşağı olan qadının 10 uşağı olan qadından niyə geri qaldığını soruşmuş və “ona çata bilərsənmi?”– demişdi. Ulu öndər bununla xalqımızın artıb - çoxalmasının vacibliyini anlatmışdı. Heydər Əliyevin rayon zəhmətkeşləri ilə görüşləri hər yerdə mehriban, səmimi və işgüzar şəraitdə keçmiş, 1981-ci ilin iyul ayının 10-da ölkə başçısının yenidən Ağdam rayonuna səfəri də əsl bayrama çevrilmişdi. Dahi rəhbərimiz 6 dəfə ümumittifaq sosializm yarışının qalibi olmuş, adı XTNS-nin şərəf kitabına yazılmış, Sosialist Əməyi Qəhrəmanı Xuraman Abbasovanın başçılıq etdiyi kolxozun pambıqçıları, taxılçıları və mexanizatorları tərəfindən də yüksək əhval-ruhiyyə ilə qarşılanmışdı. Heydər Əliyev Xındırıstan kəndində də böyük təmtəraqla qarşılanmışdı. Kolxozun mədəniyyət sarayında respublika partiya-təsərrüfat fəalları yığıncağı keçirilmişdi.
Müstəqillik dövründə isə yenicə hakimiyyətə qayıtmış ulu öndər 1993-cü il Ağdam işğal olunduğu günlərdə rayona gəlməsi ilə yerdə qalan ərazinin qorunub saxlanmasını təmin etmişdir. Prezident Heydər Əliyev 1996-cı il avqust ayının 2-də Ağdam şəhəri və onun ətraf kəndlərinin Ermənistan silahlı qüvvələri tərəfindən işğal edilməsinin üçüncü ildönümü ilə əlaqədar Ağdam rayonu ictimaiyyətinin nümayəndələri ilə görüşmüşdü. Mən bu görüşdə də iştirak etmişdim. Ümummilli lider bu dəfə Ağdam və onun insanları haqqında demişdir: “Respublikamızın həyatında Ağdam rayonu həm iqtisadi, elmi potensialına, həm də insanların fədakarlığına görə həmişə çox mühüm rol oynamışdır... Ağdam qorunmalı idi, Ağdam saxlanılmalı idi, Ağdam müdafiə olunmalı idi. Ağdamın işğalı yolverilməz idi... Ağdam vuruşmuşdur, böyük itkilər vermişdir”.
1998-ci ilin oktyabr ayında seçiciləri ilə görüşmək məqsədi ilə Ağdam rayonunun Quzanlı qəsəbəsində olmuşdur. Umumiyyətlə, böyük rəhbər hər dəfə rayonumuzda olarkən şəhər və kəndlərimizi gəzmiş, sakinlərlə görüşmüş, onlarla səmimi söhbət etmişdi.
Azərbaycanın inkişaf tarixinin, təxminən, son yarım əsrlik dönəminə diqqətlə nəzər salsaq, gələcəyə istiqamətlənmiş, dayanıqlı inkişafı təmin edən və cəmiyyətin hər bir üzvünün rifahına xidmət göstərən müdrik və uzaqgörən siyasətin nəticələrini görə bilərik. Bütün bunlar ulu öndər Heydər Əliyevin Vətən üçün sonsuz xidmətləri hesabına başa gəlib. Təməli dahi şəxsiyyət Heydər Əliyev tərəfindən qoyulan iqtisadi, siyasi, sosial və mədəni inkişaf xətti bu gün Prezident İlham Əliyev tərəfindən uğurla davam etdirilir. Ümummilli liderin qalibiyyət strategiyası Azərbaycanı daim yüksəlişə aparır.
Bəbir HÜSEYNOV,
Əməkdar jurnalist
