Naxçıvanda Əlahiddə Ümumqoşun Ordunun təşkilatçılığı ilə ümummilli lider Heydər Əliyevin 100 illik yubileyi ilə əlaqədar yürüş təşkil edilib.

Əlahiddə Ümumqoşun Ordunun hərbi qulluqçuları və Heydər Əliyev adına Hərbi Liseyin kursantlarının işti­rak etdiyi yürüş şəhərin Heydər Əliyev prospektində həyata keçirilib. İştirak­çılar prospektlə Naxçıvan şəhərində yerləşən Heydər Əliyev Sarayına qədər yürüş ediblər.

***

Xüsusi təyinatlılar isə ümummilli liderin yubiley münasibətilə Naxçı­van Muxtar Respublikasının ən hün­dür nöqtəsi olan “Qapıcıq” zirvəsinə yürüş ediblər.

Ordubad rayonu ərazisində yer­ləşən və hündürlüyü 3 min 905 metr olan Qapıcıq zirvəsinə qalxan hərbi qulluqçularımız ulu öndər Heydər Əli­yevin və Vətən uğrunda canlarından keçən şəhidlərimizin əziz xatirəsini yad ediblər, Azərbaycan Respublikasının üçrəngli bayrağını dalğalandırıblar və Dövlət Himnimizi səsləndiriblər. 

Xüsusi təyinatlılar ulu öndər Heydər Əliyevin anadan olmasının 100 illiyini şərəfinə lövhəni qaya üzərinə bərkidiblər.

***

Mayın 10-da axşam saatlarında Naxçıvan şəhər stadionunda ümum­milli lider Heydər Əliyevin anadan ol­masını 100 illiyi münasibətilə yubiley atəşfəşanlığı təşkil olunub. 

Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəf­li, dövlət və hökümət nümayəndələri, o cümlədən, on minlərlə muxtar respubli­ka sakini şənlikdə iştirak ediblər.

Atəşfəşanlıqda tanınmış incəsənət ustalarının çıxışları ilə bərabər, ulu ön­dərin səmada möhtəşəm portreti yara­dılıb, ölkəmizdə tarix yaratmış imzası nümayiş etdirilib.

Səbuhi HƏSƏNOV, “Xalq qəzeti”