İrandan Qarabağa 14 nəfərlik heyətin gəlişi ilə bağlı məlumatlar hələ ötən ilin sonunda üzə çıxsa da, rəsmi Tehran bu gün də öz vətəndaşlarının Xankəndiyə qanunsuz səfəri haqqında Bakıya heç bir açıqlama verməyib. Halbuki, Azərbaycan tərəfi dəfələrlə İrandan bu məsələyə aydınlıq gətirməsini tələb edib, mövcud istiqamətdəki narahatlığını ortaya qoyub. Ancaq bütün bunlara baxmayaraq, rəsmi Tehran nümayişkəranə surətdə susmaqda, Azərbaycanın haqlı tələbini qulaqardına vurmaqdadır. Maraqlıdır, İranın Qarabağa ötürdüyü şəxslərlə bağlı susqunluğu hansı mətləblərdən xəbər verir?
“Oğurluq üstündə” tutulan Tehran
İranın rəsmi Bakının tələbi ilə bağlı susqunluğunun başlıca səbəblərindən biri Tehranın “oğurluq üstündə” tutulması, bu səbəbdən də qəfil ifşadan çaşqınlıq hissi keçirməsidir. Ötən ilin noyabrında İrandan Qarabağa gizli missiya ilə göndərilən şəxslərin sayı, hətta hansı avtomobillə gəldiklərinin belə Azərbaycan tərəfindən de-şifrə edilməsi, İran hakimiyyətində şok effekti yaradıb. 2022-ci il noyabrın 24-də İrandan gələn 14 nəfərlik heyətin Xankəndiyə keçməsi ilə bağlı Azəbaycan tərəfinin əldə etdiyi dəqiq informasiya Tehranı çətin vəziyyətə salıb. Odur ki, bu vəziyyətdə nə deyəcəyini, öz hərəkətinə necə bəraət qazandıracağını bilmir. İndiki məqamda susmaq Tehran üçün yeganə çıxış yolu kimi görünür. Baxmayaraq ki, Tehranın susqunluğu heç nəyi dəyişmir. Eyni zamanda, Azərbaycan tərəfinin narahatlığının tamamilə haqlı olduğunu göstərir. Bu fakt sübut edir ki, Tehranın Xankəndiyə göndərdiyi missiya bilavasitə anti-Azərbaycan fəaliyyəti ilə məşğuldur və onlara verilən tapşırıq da bununla əlaqədardır. Bu səbəbdən də İran onların kimliyi, həmçinin, onlara həvalə edilən missiyanın mahiyyəti haqqında heç nə deyə bilmir və deməz də...
Diplomatik etikadan kənar
İranın Azərbaycanın soğru və narahatlığına aydınlıq gətirməməsinin digər bir səbəbi Tehranın siyasi mədəniyyətdən, diplomatik əxlaqdan hər zamankı kimi uzaq olması ilə bağlıdır. Hansı ki, İranın diplomatik etikadan uzaqlığı faktı Tehrandakı Azərbaycan səfirliyinə təşkil edilən hücumdan sonra da özünü aydın şəkildə göstərdi. İran Azərbaycan səfirliyinə təşkil edilən hücuma, səfirlik əməkdaşlarının, onların ailə üzvlərinin həyatını məqsədli şəkildə təhlükəyə atdığına görə nəinki üzr istəmədi, əksinə, baş verənlərə görə heç bir məsuliyyət daşımadığını bəyan etdi.
İranın diplomatik etika və mədəniyyətdən uzaq olması onun digər ölkələrlə münasibətində də özünü göstərməkdədir. Nümunə üçün qeyd edək ki, İran artıq xeyli vaxtdır ki, Rusiyaya çoxsaylı “Şəhid” dronları ixrac etsə də, Tehran bu gün də məlum faktı inkar edir. Halbuki, Rusiyanın İran dronlarından istifadə etməsi Ukrayna prezidentindən tutmuş, dünyanın aparıcı ölkələrinin dövlət başçıları, bitərəf hərbi ekspertlər tərəfindən də təsdiq olunub, bununla bağlı çoxsaylı video və foto faktlar nümayiş edilib. Ancaq bütün bunlara baxmayaraq, İran yenə inkarçılıq mövqeyindən çıxış etməklə, dünyanı öz yalanlarına inandırmağa çalışır.
Bu baxımdan İranın Xankəndiyə göndərdiyi casuslarla bağlı susqunluğunu da davam etdirir. Baş verənlər göstərir ki, etiraf mədəniyyəti, qonşu dövlətlərin sorğu və tələblərinə həssas münasibət İrana yaddır.
Azərbaycanın dövlət sərhədlərinə hörmətsizlik faktı
Rəsmi Bakının icazəsi olmadan İrandan Xankəndiyə hansısa missiyanın göndərilməsi, həm də Azərbaycanın ərazi bütövlüyünə, dövlət sərhədlərinə hörmətsizlik faktı kimi dəyərləndirilməlidir. Çünki söhbət Azərbaycan torpaqlarına hansısa heyətin göndərilməsindən gedirsə, rəsmi Tehran buna görə öncə Azərbaycan dövlətinin razılığını almalı, bunu rəsmi Bakı ilə razılaşdırmalı idi. Lakin İran tərəfi bu barədə nəinki Azərbaycan tərəfinə heç bir məlumat verməmiş, bunu bir sirr kimi saxlamağı daha məqsədəuyğun hesab etmişdir. Xankəndiyə göndərilən missiya ilə bağlı ölkəmizin məlumatlandırılmaması bu missiyanın anti-Azərbaycan xarakteri daşıdığını bir daha sübut edir.
Bu fakt həm də onu göstərir ki, zaman-zaman ölkəmizə münasibətdə müxtəlif təxribatlara əl atan İran, dövlətimizin ərazi bütövlüyünə, sərhədlərimizin toxunulmazlığına da əməl etmək istəmir. Azərbaycan torpaqlarına səfər üçün Ermənistanın razılığına ehtiyac duyan İranın bu addımı onun beynəlxalq hüquq və konvensiyalara məhəl qoymadığını, regionda məqsədli şəkildə gərginlik və etimadsızlıq mühiti yaratdığını sübut edir.
Molla rejimi bölgədə sülhün yaranmasını istəmir
Molla rejiminin Xankəndiyə casuslar göndərməsi, baş verənlərin ifşasından sonra susqunluq sərgiləməsi onun bölgədə sülh və təhlükəsizlik üçün ciddi təhdid olduğunu göstərir. Baş verənlər sübut edir ki, İran Azərbaycanla Ermənistan arasında sülh sazişinin imzalanmasında maraqlı deyil. Bu səbəbdən də Ermənistanın təxribatçı addımlarını dəstəkləməyə, onun bu təxribatlarına müxtəlif vasitələrlə təkan verməyə çalışır. Azərbaycan torpaqlarına casusların göndərilməsi İranın anti-Azərbaycan siyasətinin növbəti təzahürüdür.
Görünən odur ki, Tehran Azərbaycanla bağlı təxribatçı planlarını Ermənistanın çətiri altında reallaşdırmağa çalışır. Ancaq İran bilməlidir ki, Azərbaycanın malik olduğu qüdrətli ordu dövlətimizi hər cür təxribatdan qorumağa qadirdir. Ermənistan kimi İranın təxribatçı cəhdləri də hər zaman məğlubiyyət və uğursuzluqla nəticələnəcək, rəsmi Tehran gec-tez öz əməllərinə görə cavab verməli olacaq.
Seymur ƏLİYEV