Dünən İrəvanda Ermənistanın əmək və sosial məsələlər naziri Narek Mkrtçyan bu ölkədə səfərdə olan İranın əmək və sosial rifah naziri Seyid Sultan Mortazavi ilə görüşüb. “News.am” saytı bu barədə məlumatı Ermənistanın sözügedən nazirliyinin rəsmisinə istinadən yayıb.
İranlı nazir qeyd edib ki, iki ölkə arasında son illər sıx və səmərəli əməkdaşlıq əlaqələri yaranıb. Seyid Sultan Mortazavi deyibdir: “Biz ölkələrimiz arasında sosial sferada əlaqələrin nizamlanasına böyük əhəmiyyət veririk. İran özünün potensialını və imkanlarını Qafqazda sülhün və sabitliyin bərqərar olunmasına yönəltməyə hazırdır”.
Xəbərdə sonra deyilir ki, rəsmi Tehranın siyasətinin prioritetlərindən biri qonşu dövlətlərlə, o cümlədən Ermənistanla hərtərəfli əlaqələrin gücləndirilməsidir. İranlı nazir sonra bu sözləri xüsusi vurğulayıb: “Ölkəmiz 44 günlük müharibədə əlil olan ermənilərə yardım etməyə hazırdır”.
İranlı nazir ölkəsinin ermənilərin qondarma “Sünik” adlandırdığı Zəngəzurda da əməkdaşlığı genişləndirməyə hazır olduğunu bildirib. İranın mövqeyi belədir ki, bu bölgədən beynəlxalq nəqliyyat dəhlizi kimi istifadə edilə bilməz. Bu, region dövlətləri və xalqlarının maraqlarına zidd olan tamamilə ədalətsiz yanaşmadır.
Qeyd etmək lazımdır ki, İran nazirinin bu və digər məsələlərlə bağlı İrəvana xüsusi “xeyirxahlıq jesti və jestləri” göstərməsi diqqətimizdən kənarda qala bilməzdi. Axı, İran rəsmiləri hər zaman özlərini “müsəlmanların dostu” hesab edirlər.
P.S. Necə olur ki, İran qonşu Azərbaycanın öz torpaqlarının azadlığı uğruda döyüşən hərbçilərinin deyil, məhz xristian ermənilərin qayğısına qalmağı özünə borc bilir?
Məlumdur ki, Tehran Ermənistanın otuz ilə yaxın suveren Azərbaycanın ərazisində işğalçı siyasət yürütdüyünün heç vaxt fərqinə varmayıb, amma xalqımızın böyük cəsarət və qətiyyətlə apardığı qırx dörd günlük şanlı savaşda əlil olan ermənilərə həyan və arxa durmağa çalışır!
“İransayağı müsəlman həmrəyliyi” budurmu? Təəssüf ki, İran real həyatda bunun əksini nümayiş etdirir!
M.HACIXANLI, “Xalq qəzeti”
