Bu bəladan əməliyyatsız da xilas olmaq mümkündür
Urolitiyaz böyrəklərdə və sidik yollarında sərt daşların əmələ gəlməsi patologiyası ilə xarakterizə olunan geniş yayılmış xəstəlikdir. Ümumdünya Səhiyyə Təşkilatının məlumatına görə, Yer kürəsinin yetkin işləyən əhalisinin, ən azı, 3 faizi bu patologiyadan əziyyət çəkir. “Premium” klinikasının uroloq-androloqu, Rusiya və Avropa Uroloqlar Assosiasiyasının üzvü, tibb elmləri doktoru, professor Cəfər Əhmədli aktual olan urolitiyazla bağlı XQ-yə müsahibəsində dedi:
– Urolitiyaz hər kəsdə və hər yaşda baş verə bilər. Dünya üzrə 30–50 arası yaşda olan əhalinin yarıdan çoxu xüsusi risk qrupuna daxildir. Urolitiyazdan danışanda öncə onu qeyd etməliyik ki, bir qayda olaraq, bu patoloji hal birtərəfli olur. Hər iki böyrəkdə daş yaranması xəstələrin yalnız üçdə birində aşkar edilir. Urolitiyaz planetin ən qədim xəstəliklərindən biri hesab olunur. Xəstəlik haqqında ilk qeydlərə Misir və Yunanıstanın qədim əlyazmalarında rast gəlinir. Məşhur filosof və həkim Hippokrat qaraciyər problemləri ilə mübarizə üsullarını öyrənməklə yanaşı, bu patologiyanın da cərrahi müalicəsinin əsasını qoyub. Amma urolitiyazla bağlı problemlərin dəqiq mənbəyini müəyyənləşdirmək hələ də mümkün olmayıb.
– Professor, xəstəliyi yaradan və ona təkan verən səbəblər hansılardır?
– Qidalanmanın qeyri-normal olması ilkin səbəb kimi götürülür. Amma xarici mühitin təsiri, irsiyyət, insanın yaşadığı ərazinin su tərkibi və digər amillər də xəstəliyin yaranmasına təsir edir. Balanslaşdırılmayan pəhriz saxlamaq urolitiyaz yarada bilər. Bu, tez-tez gündəlik menyuda oxşar məhsullardan çox istifadə etməkdir. Məsələn, ət urat daşları, süd kalsium birləşmələrinin yaranmasına səbəb olur. Xəstəliyi müxtəlif infeksiyalara həssaslıq (patogen mikroorqanizmlər sonradan daşlarla əhatə olunan çökmə nüvələri əmələ gətirir), endokrin və ya genetik təbiətin patologiyaları (diabet, gut (podaqra) kimi xəstəliklər bədəndə duz konsentrasiyasının artmasına səbəb olur), sidik durğunluğu ilə müşayiət olunan anomaliyalar (onurğa beyni zədələri, xərçəng şişləri) yaradır.
Urolitiyaza səbəb olan xarici (ekzogen) mənbələri də qeyd etmək lazımdır. Ultrabənövşəyi şüalanma, D vitamini çatışmazlığı və az su qəbul etmək xəstəliyin yaranması ehtimalını artırır. Bəzi mütəxəssislər daşların əmələ gəlməsi ilə həyat tərzi arasında sıx əlaqə olduğunu qeyd edir. Az hərəkətlilik və fiziki fəaliyyətin olmaması sağlamlıq problemlərinin yaranması üçün ilk addımdır.
– Urolitiyaz hansı simptomlarla özünü göstərir? Həkimə nə vaxt müraciət edilməlidir?
– Xəstəliyin ilkin mərhələlərinin asimptomatik olması xəstələr kimi həkimlər üçün də problemlər yaradır. Daş əmələ gəlməsinin ilk mərhələlərində patologiyanı müəyyən etmək, demək olar ki, mümkün deyil (kompleks aparat diaqnostikası istisna olunur). İnsan urolitiyazdan yalnız daşlar böyük ölçülərə çatdıqdan və ya hərəkət etdikdən, böyrəklərin işini pozaraq və sidik axınını çətinləşdirdikdən sonra şübhələnə bilər. Xəstəliyin əsas təzahürü ağrıdır. Kanalların qəfil tıxanması ilə kəskin ağrı yaranır. Çox vaxt narahatlıq sol və ya sağ tərəfdə, bəzən hər iki tərəfdə, bel, qarın altı və daha aşağı nahiyələrə yayılır. Patologiyanın gedişi sidikdə qanın görünməsi ilə müşayiət olunur. Bu hal daşların hərəkəti zamanı sidik kanallarının divarlarının zədələnməsi ilə əlaqələndirilir. Təsvir edilən simptomlara iltihab prosesinin ümumi əlamətlərini əlavə etmək lazımdır. Urolitiyaz bədən hərarətinin yüksəlməsi, baş ağrısı, ürəkbulanma, iştahsızlıq, zəiflik və qusmaya səbəb olur.
– Söylədiyiniz simptomların bəziləri öd daşı, mədəaltı vəz, qaraciyər xəstəliklərində də müşahidə edilir. Urolitiyazın diaqnozu necə müəyyənləşdirilir?
– Urolitiyaz olduqca təhlükəli xəstəlikdir. Vaxtında müalicə olunmazsa, bu patoloji vəziyyət hidronefroz, kəskin böyrək çatışmazlığı, xroniki hipertrofik sistit, urosepsis və pionefroza səbəb olur. Buna görə, simptomlar müşahidə olunan kimi təcrübəli mütəxəssislərdən məsləhət almaq lazımdır. Uroloq və nefroloq urolitiyazın aşkarlanmasında və müalicəsində iştirak edir. İlk növbədə, həkim xəstəni müayinə edir, anamnez toplayır və ağrının yerini əllə (palpasiya) müəyyənləşdirir. Növbəti addım laboratoriya tədqiqatıdır. Qan və sidik nümunələrində EÇR-də artım, leykosit formulasının dəyişməsi, qırmızı qan hüceyrələrinin və duzların varlığı və konsentrasiyası qeyd olunur. İlkin diaqnoz aparatla müayinədən istifadə etməklə təsdiq və ya təkzib edilir. Kompüter tomoqrafiyası daşların dəqiq yerini, sıxlığını, strukturunu müəyyən etməyə imkan verir. Ultrasəs müayinəsi 5 millimetr və daha yuxarı ölçülü daşları müəyyən etmək üçün uyğundur. Kontrastlı rentgen isə sidik yollarında tıxanıqlığı müəyyənləşdirir. Bu müayinələrdən sonra xəstəliyin tam diaqnozu əldə edilir.
– Xəstələrin müalicəsi necə aparılır? Onlara tövsiyələriniz.
– Terapevtik üsulun seçimi daşların ölçüsündən və xəstəliyin ağırlığından asılıdır. İlk növbədə ağrılar aradan qaldırılır. Kanallar tıxandıqda xəstəyə ağrıkəsicilər və qeyri-steroid dərmanlar təyin edilir.
Konservativ müalicə metabolik pozğunluqların düzəldilməsi ilə məhdudlaşır. Bunun üçün xəstəyə pəhriz terapiyası – spirtli içkilərdən imtina, duz və ədviyyatların miqdarının maksimum məhdudlaşdırılması, su – duz balansına ciddi nəzarət təyin olunur. Urolitiyaz üçün antibiotiklərlə müalicə qadağandır. Digər qeyri-invaziv üsul ultrasəs müalicəsidir. Şok dalğası – litotripsi diametri 2 santimetrə qədər olan daşları parçalaya bilir.
Fizioterapiya ilə müalicədə elektrik, işıq, maqnit, mexaniki və termiki üsullardan, hidro və radio müalicədən istifadə edilir. Həmin üsullar və prosedurlar xəstəliyin müddətindən asılı olaraq hər xəstə üçün fərdi seçilir.
Zərərli vərdişlərdən – siqaret çəkmək, spirtli içkilərdən imtina etmək və aktiv həyat tərzi keçirmək (idman, fiziki fəaliyyət, çox gəzmək vərdişi) faydalı olar. Qeyd edilən üsullar təsir etməyəndə, xəstəyə cərrahi müalicə təyin edilir.
Bu gün daşların cərrahi müalicəsi geniş yayılmış laparoskopiya, klassik qarın cərrahiyyəsi, lazer, pnevmatik avadanlıqdan istifadə ilə aparılır. Tövsiyə olaraq deyə bilərəm ki, patoloji vəziyyətin qarşısını almaq mümkündür. Əməliyyat olunmaq istəməyən böyrəklərini o həddə çatdırmamalıdır. Bunun üçün həyat tərzinə diqqət edilməli, bədənin ümumi sağlamlığını dəstəkləməyə yönəlmiş tövsiyələrə əməl olunmalıdır. Bədən çəkisinə nəzarət və sidik-cinsiyyət sisteminin infeksiyalarını vaxtında müalicə etməklə urolitiyaz riskini azaltmaq mümkündür.
Zərifə BƏŞİRQIZI
XQ