(əvvəli “XQ”nin 25 avqust 2023-cü il tarixli sayında)
Varlığına, həyat yoluna Qərbi Azərbaycan sevdası hakim kəsilmiş soydaşlarımızdan biri də odur – görkəmli yazıçı-dramaturq, şair-publisist, dövlət xadimi və ən nəhayət, yurdsevər ziyalı Hidayət Orucov. “Xalq qəzeti” olaraq onun keçmiş sovet dövrünün populyar nəşrlərindən sayılan “Literaturnaya qazeta”nın 3 sentyabr 1993-cü il tarixli sayında yayımlanmış müsahibəsinin ardını təqdim edirik.
Hidayət müəllimin həmin müsahibədə bölüşdüyü fikirlər soydaşlarımızın Zəngəzur, Göyçə sevgisini məxsusi çalarlarla zənginləşdirməklə, yurd həsrətini təzələməklə yanaşı, tarixi həqiqətlərə da işıq salmaq baxımından son dərəcə əhəmiyyətlidir. Xatırladaq ki, müsahibə Hidayət Orucovun çağdaş publisistikamızın ən dəyərli nümunələri sırasında məxsusi yer almış “Buradan min atlı keçdi” kitabından götürülüb.
– Bu kompaniya özünü konkret nədə göstərirdi?
– Əvvəla, mətbuatda Vartgesi pisləyən məqalələr peyda oldu. “Boş kətillər arxasında ad günü” romanı işıq üzü görəndən sonra isə İrəvan Universitetinin tələbələri kitabın nümayişkaranə yandırılmasını təşkil etdilər.
– Onlar romanı nədə müqəssir bildirdilər ki?
– Orada Vartgesin öz psixologiyası ilə səsləşən belə fikirlər vardı ki, əbədi olaraq keçmişlə yaşamaq olmaz, irəlini düşünmək, qonşu xalqlarla, o sıradan, azərbaycanlılarla, türklərlə xeyirxah münasibətləri inkişaf etdirmək lazımdır, İrəvanda romanın nümayişkaranə yandırılmasından sonra Vartges bu fikirləri kitabın Moskva nəşrində verməkdən ehtiyat elədi. Ancaq ona qarşı kompaniya yenə də dayandırılmadı və o, istefa verməyə məcbur oldu. Çox təəssüf edirəm ki, bu hadisələrdən sonra Vartges sındırıldı və onun mətbuatda, digər yüksək tribunalardan sonrakı çıxışları Ermənistanın millətçi-şovinist ruhlu ziyalılarının ideyalarından artıq heç nəyi ilə seçilmədi...
1988-ci ilin iyununda SSRİ Ali Soveti Rəyasət Heyətinin iclasındakı qatı millətçi, antiazərbaycan çıxışını yadınıza salın. Elə ağ yalanlar dedi ki, hətta Qorbaçov onun ağzına vurdu. Ertəsi gün ona teleqram göndərdim: “Bilirsən, indiyəcən həmişə uğurlarına sevinmişəm, uğursuzluqlarından kədərlənmişəm. Dünən axşam ilk uğursuzluğun idi ki, sevindim. Allah ağıl versin”. Yəqin ki, o çıxış Vartgesin son uğursuzluğu deyildi, amma o teleqram mənim ona son müraciətim oldu, çünki cavab almadım. Və bu gün də mənə elə gəlir ki, Vartges o teleqrama cavab verməyə söz tapa bilmir və heç vaxt tapa bilməyəcək.
Silva Kaputikyanın sonrakı peşmançılığına, o cümlədən, onun “Litqazeta”dakı müsahibəsinə gəlincə isə deməliyəm ki, mən bu adamın səmimiyyətinə heç vaxt inanmamışam, illah da ki, indi ola. Müsahibəsində deyir ki, dəfələrlə Leonid Brejnevə, Heydər Əliyevə müraciətlər edib, onların diqqətini Dağlıq Qarabağın iqtisadi ehtiyaclarına, orda təhsilin, tarixi abidələrin vəziyyətinə və s. yönəldib. Daha doğrusu, o, yenə də sübut etmək istəyir ki, Dağlıq Qarabağ problemi regionda mövcud olmayan uydurma sosial-iqtisadi, mədəni problemlərdən törəyib.
1988-ci ildə Moskvadan Azərbaycana akademik Xaçaturovun başçılığı ilə xususi komissiya göndərilmişdi. Komissiyanın tərkibinə müxtəlif ittifaq nazirliklərinin və təşkilatlarının mütəxəssisləri, habelə Ermənistan və digər SSRİ respublikalarının nümayəndələri daxil edilmişdi. Onlar burda xeyli işləyəndən sonra belə nəticəyə gəldilər ki, Dağlıq Qarabağ Muxtar Vilayətinin sosial-iqtisadi və mədəni inkişaf səviyyəsi üzrə göstəriciləri Azərbaycanın, Ermənistanın və bütövlükdə keçmiş İttifaqın müvafiq göstəricilərindən qat-qat yüksəkdir.
– Hər halda, ziyalılar bəsit, qeyri-professional siyasətçilərlə birgə Zaqafqaziyada əsas müharibə alovunu qızışdırırdılar. Bu gün də məhz ziyalıların mənəvi borcudur ki, bu eybəcər özünüməhvetmə maşınını dayandırmağa birinci cəhd göstərsinlər, nəhayət ki, öz tutarlı sözlərini desinlər.
– Qarabağ hadisələrinə qədər Azərbaycan ziyalılarını heç nədə qınaya bilmərəm. İnanın, mən doğrudan da məsələlərə obyektiv yanaşmağa çalışıram. Bizdə, Azərbaycanda axı, heç vaxt milli dözümsüzlük, qonşu xalqlara nifrət ideyalarının daşıyıcıları olmayıb. Əksinə, biz uzun müddət münaqişəni malalamağa cəhd eləmişik. Siz 1989-cu, hətta 90-cı ilə qədər respublika mətbuatını nəzərdən keçirin: opponentlərin ünvanına bir dənə də olsun tənqidi fikir tapmazsınız! Biz əvvəllərdə olduğu kimi, xalqlar dostluğundan yazır, keçmiş əmin-amanlıq illərinin erməni–azərbaycanlı dostluğundan ayrı-ayrı faktları yada salıb misallar gətirirdik.
Əlbəttə, bu gün artıq hadisələrin həddən artıq dərinləşdiyi bir zamanda məsələ bir qədər başqa cürdür. İndi arada qəddar, barışmaz münasibətlər mövcuddur və bunu anlamaq çətin deyil. Ermənistan silahlı qüvvələri Azərbaycan torpaqlarının 20 faizini işğal etmiş, milyondan artıq insan dəbə-baba torpaqlarından didərgin salınaraq öz Vətənində qaçqına çevrilmişdir. Azərbaycan bu gün qan içindədir – böyük bir qaçqınlar düşərgəsinə dönmüşdür. O da var ki, hərdən əsəblərimiz buna tab gətirmir. Ancaq ifrat meyillər heç vaxt bizdə sistemli və düşünülmüş şəkildə olmayıb və bütöv nəsillər bu ruhda tərbiyələndirilməyib.
Örkən nə qədər uzun olsa da, gəlib doğanaqdan keçəcək – deyiblər. Bu dünyada hər şeyin bir sonu var. Bu dəhşətli müharibənin də axır ki, bir sonu olacaq. Bunun təkcə Ermənistan – Azərbaycan müharibəsi olmadığı bu gün hamıya bəllidir. Arxada ikinci, üçüncü qüvvələr var, onlar milli münaqişələrdən öz geosiyasi maraqları üçün istifadə edirlər. Buna görə də Azərbaycan, Gürcüstan və Ermənistan üçün yeganə dayaq Qafqaz mənafeyi olmalıdır.
Mənim şəxsən “Qafqaz evi” ideyasına rəğbətim var. Əlbəttə, biz yaxın və uzaq xariclə sıx, diplomatik əlaqələri inkişaf etdirməliyik, lakin bütün problemlərimiz Qafqazda həll olunmalıdır. Ermənistanla Azərbaycan ara-sında müharibənin mənəvi, əxlaqi sonu yetişməlidir və mənə elə gəlir ki, bu sonluq artıq yetişib, bəlkə də bir il, il yarım əvvəldən yetişib.
– Hidayət bəy, siz yaradıcı adamsınız. Bakıya köçəndən sonra uzun müddət “Gənclik” nəşriyyatının baş redaktoru işləmisiniz. Və birdən taleyinizdə belə bir dönüş baş verib: milli siyasət üzrə Dövlət müşaviri təyin edildiniz...
– Bu təklif məndən ötrü gözlənilməz oldu, hərçənd mən bu sahədə işə daxilən hazır idim. Son illər mən mətbuatda milli münasibətlərə həsr edilmiş çoxsaylı məqalələrlə çıxış etmişdim, bu sahənin bir çox praktik aspektlərinə yaxından bələd idim. Əlbəttə, bu çox çətin sahədir, elə buna görə də etiraz etməyə haqqım yox idi.
– Bilirəm ki, Dövlət müşaviri kimi Azərbaycanda yaşayan milli azlıqların – talışların, kürdlərin, ləzgilərin və başqa xalqların problemləri ilə fəal məşğul olursunuz. Axır vaxtlar həmin xalqlar öz milli-mədəni hüquqları barədə daha ucadan danışmağa başlayıblar.
– Azərbaycan ittifaqın ən beynəlmiləl respublikasından müstəqil dövlətə çevrilib. Beynəlmiləl ənənələr Azərbaycanda həmişə güclü olub və indi də dövlət strukturlarının praktik fəaliyyətində dönmədən həyata keçirilir. Azərbaycan əvvəlki etnik tərkibi və Qorbaçov “yenidənqırmasının” əvvəllərindən məruz qaldığı ağır sınaqlara baxmayaraq, bu etnik qruplar arasındakı mehriban qonşuluq münasibətlərini qoruyub saxlaya bilmişdir. Respublikada yaşayan 300 mindən artıq rusu azərbaycanlılarla qarşı-qarşıya qoymaq üçün nə qədər cəhdlər edildi. Nə qədər şayiələrə, təxribatlara əl atdılar! Yenə də rusdilli əhalinin respublikadan getməsi kütləvi xarakter ala bilmədi. Bu, keçmiş İttifaqın bir çox respublikalarında baş tutdu.
Əlbəttə, mən deyə bilmərəm ki, bizdə milli münasibətlər sahəsində hər şey yoluna qoyulmuşdur. Biz bunu açıq etiraf edirik. Belə olmasaydı, “Respublikada yaşayan milli azlıq, azsaylı xalq və etnik qrupların hüquq və azadlıqlarının qorunması, dil və mədəniyyətinin inkişafı üçün dövlət yardımı haqqında” Prezident Fərmanı imzalanmazdı. Həmin fərman keçmiş İttifaqda bu səpkidə ilk sənəddir və ictimai rəydə böyük maraq doğurması da təsadüfi deyil. Fərmanda respublikada yaşayan milli azlıqların hüquqi, mülki, mədəni hüquqlarının dövlət səviyyəsində qorunmasının əsasları öz əksini tapmışdır.
Hazırda biz ən ciddi tələblərə cavab verə biləcək yeni milli siyasət konsepsiyası üzərində işləyirik. Lakin mətbuatın, xüsusən də xarici informasiya orqanlarının Azərbaycanda insan hüquqlarının, milli-mədəni azadlıqların pozulması faktlarından həvəslə yazması, son illər milli münasibətlər sahəsində görülən müsbət işləri isə görməməzliyə vurması təəssüf doğurur. Məgər respublikada talış, kürd, ləzgi, rus... dillərində azmı qəzet çıxır? Milli azlıqların dillərində məktəblər, teatrlar açılır, radio və televiziyada verilişlər gedir. Dövlət çoxsaylı milli-mədəniyyət mərkəzlərinə maddi kömək göstərir.
– Hər halda, rusdilli əhali, kütləvi şəkildə olmasa da, respublikadan köçür. Çoxlarını övladlarının taleyi narahat edir, valideynlər ehtiyat edirlər ki, respublikada rus dilində təhsil minimum səviyyəyə endiriləcək. Başqa səbəblər də var...
– Bu gün respublikadan gedən təkcə ruslar deyil. Acı da olsa deməliyəm ki, müharibənin və bundan doğan mənəvi problemlərin əziyyətinə dözə bilməyən azərbaycanlılar da gedir. Ancaq, gəlin, günümüzün gerçəkliyinə nəzər salaq: məgər Bakıda rus məktəblərinin sayı azalıb? Yaxud, ali məktəblərdə tədrisi rus dilində gedən bir dənə də olsun fakültə bağlanıbmı? Bəzi orta məktəblər qarışıq tədris prinsipinə keçiblər, bu da rusdilli siniflərə obyektiv tələbin azalması ilə əlaqədardır. Əvvəllər Bakıda bir çox azərbaycanlılar uşaqlarını rus məktəblərinə qoyurdular, indi isə öz doğma dillərində təhsilə üstünlük verirlər.
Radio və televiziyada rus dilində proqramlar artırılıb. Axır vaxtlar Azərbaycanda rus dilində bir sıra yeni dövri nəşrlər də işıq üzü görüb: “Бакинец”, “Содружество”, “Зеркало”, “Кто есть кто” və s. Bir məsələ də var ki, bir çox rus ailələri artıq Azərbaycana qayıdırlar. Azərbaycan Prezidentinin adına keçmiş İttifaqın bir çox yerlərinə köçüb getmiş rus ailələrindən məktublar daxil olur və bu məktublarda onların qayıtmasına kömək göstərmək xahiş olunur. Hətta Azərbaycanın indiki ağır vəziyyətində qayıtmaq istəyənlərin sayı çoxdur! Zənnimcə, müharibə qurtarandan sonra geriyə belə axın artacaqdır.
– Hidayət bəy, Sizə sonuncu, bəlkə də ən çətin sualımı vermək istəyirəm: bu ağır, qarışıq zamanda Sizə həyan olan hansı əxlaqi dəyərlərdir? Həyatda adamlara, gözəlliyə inamda köməyiniz nədir? Tapındığınız sözmü?
– Doğrudan da, indi çox çətindir. Hamıya çətindir. Ən çətin anlarımda mən doğma kəndimizi, uşaqlıq illərini yada salıram. Uşaqlıq illəri insan ömrünün ən təmiz, saf çağlarıdır: onda elə bil səma həmişə mavi, üfüqlər tərtəmiz idi. Öz şeirlərimdə və nəsr əsərlərimdə mən tez-tez o uzaq illərə qayıdıram. Sanki buz bulağın məlhəm suyundan içirəm. Bundan sonra ürəyim yüngülləşir, ümidlərim artır. Həyatda mənim üçün əsas şey nədir? Bəlkə də bir qədər gurultulu səslənəcək, ancaq mənim üçün ən başlıcası - ölkəmin müstəqilliyidir.
Bu yaxınlarda Amerikada idim. BMT-nin binası qarşısında Vətənimin bayrağını başqa dövlətlərin bayrağı ilə yanaşı yellənən görəndə gözlərimdə yaş gilələndi. O an mən gerçəkdən xoşbəxt idim, hərçənd ki, əsl müstəqilliyə çatmaq üçün hələ nə qədər ağır, çətin yollar keçməli olacağımızı dərindən anlayıram. Və bu mənada Rusiyanın, rus ziyalılarının bütün keçmiş SSRİ respublikalarında gedən demokratikləşmə prosesində oynaya biləcəyi rol barədə fikirlərimi açıqlamaq istəyirəm.
Bir vaxtlar dostlarla birgə İttifaqın nə vaxtsa çökəcəyi haqda mülahizələrimizi bölüşərək deyirdik ki, rusların özü imperiyaya münasibətlərini bildirməyincə, bu, baş verməyəcək. Allaha şükür ki, bu münasibəti eşitdik. Ancaq bu gün mən başqa çıxışları da eşitmək istərdim. İstərdim ki, imperiyanın dağılması üçün doğrudan da əvəzsiz xidməti olan demokratik rus ziyalıları indi də azadlığını, milli ləyaqətini özünə qaytarmış xalqlara, onların həqiqi müstəqilliyinə kömək etsinlər. Belə bir istəyi mən şəxsən Azərbaycana münasibətdə hiss etmirəm. Əvvəllər bizə çoxlu rus yazıçısı və şairləri qonaq gələrdi, rus şair – tərcüməçilər arasında mənim çoxlu səmimi dostlarım var. Niyə onlar bizlə əlaqələri birdəfəlik kəsiblər?
Rusiya mətbuatında şayiələr gəzir ki, guya, Azərbaycanda rusları sıxışdırırlar. Gəlin, vəziyyəti öz gözlərinizlə görün. Bir ara rus ziyalıları Baltikyanı dövlətlərin müstəqilliyi ideyasını ehtirasla müdafiə edirdilər. Yadımdadır, hətta yazıçı A.Pris- tavkinin səsi Latviyanın azadlığının müdafiəçiləri ilə bir səngərdən gəlirdi. Bakıda 90-cı ilin Yanvar qırğınına isə demək olar, münasibət bildirilmədi. Götürək elə Azərbaycanda son hadisələri: Dağlıq Qarabağ sərhədlərindən kənarda yerləşən Kəlbəcər, Laçın, Ağdam, Qubadlı, Cəbrayıl, Füzuli, Zəngilan və s. rayonlarımız erməni silahlı qüvvələri tərəfindən işğal edildi. Mülki əhalidən minlərlə ölən, yaralanan oldu, kəndlər yandırılıb külə döndərildi, şəhərlər azğıncasına talan edildi. Yüz minlərlə adam yeni köçkünə çevrildi. Bütün dünya narahat olur və bu təcavüzü pisləyir, rus ziyalıları isə susurlar.
Niyə? İnanmaq olmur ki, bu məsələdə həlledici amil xristian dininə qulluq edən xalqla həmrəylikdir. Rus ziyalıları anlamalıdırlar ki, bir vaxtlar Azərbaycanı Şərqdə inqilabın qapısı adlandırırdılar, indi isə bizim respublika bu regionda demokratiyanın və sivilizasiyanın dayağı ola bilər. Və Azərbaycanda demokratiyanı dəstəkləmək – Şərqdə demokratiyanın cücərtilərini müdafiə etmək deməkdir.
“Literaturnaya qazeta”, 3 sentyabr, 1993-cü il