Dünən Azərbaycan Dövlət Akademik Filarmoniyasında Milli Musiqi Günü münasibətilə Heydər Əliyev Fondu və Mədəniyyət Nazirliyinin təşkilatçılığı ilə keçirilən Üzeyir Hacıbəyli XVI Beynəlxalq Musiqi Festivalının açılış mərasimi olub.
Məclisi giriş sözü ilə açan mədəniyyət nazirinin müavini Səadət Yusifova bildirib ki, sentyabrın 18-i dahi bəstəkar, pedaqoq, publisist, ictimai xadim Üzeyir Hacıbəylinin anadan olmasının 139-cu ildönümü və bəstəkarın şərəfinə təsis edilmiş Üzeyir Musiqi Günüdür. Sentyabrın 18-dən 28-dək keçirilən Üzeyir Hacıbəyli XVI Beynəlxalq Musiqi Festivalı çərçivəsində Bakı, Gəncə, Şəmkir və Naxçıvanda irihəcmli tədbirlərin, eyni zamanda, bütün ölkədə silsilə tədbirlərin təşkili planlaşdırılır.
Festival çərçivəsində açıq və qapalı məkanlarda konsertlər, tamaşalar, sərgilər, elmi konfrans, ustad dərsləri keçiriləcək. Şuşa şəhərində də bir sıra tədbirlər nəzərdə tutulub. Şəhərdə Şərqin ilk muğam operası “Leyli və Məcnun” nümayiş olunacaq, görkəmli bəstəkar Süleyman Ələsgərovun 100 illiyinə həsr olunan konsert təşkil ediləcək.
Qeyd edilib ki, budəfəki festivalda ABŞ, Almaniya, Xorvatiya, Avstriya, Türkiyə, Rusiya, Koreya Respublikası, İspaniya, Braziliya və digər ölkələrdən solist və bədii kollektivlər iştirak edir. İlk dəfə olaraq Azərbaycan Milli Konservatoriyası UNESCO nəzdində fəaliyyət göstərən Ənənəvi Musiqi və Rəqs üzrə Beynəlxalq Şuranın Simpoziumunu təşkil edib.
Mərasim Üzeyir Hacıbəylinin əsərlərindən və milli musiqi nümunələrindən ibarət konsert proqramı ilə davam edib.
XQ
