“Piano əsərləri”
Türkiyədə ilk dəfə, əsasən, Azərbaycan bəstəkarlarının əsərlərindən ibarət olan “Piano əsərləri” dərsliyi nəşr edilib.
Kitabın müəllifi Ankara Dövlət Opera və Balet Teatrının əməkdaşı, peşəkar fortepiano sənətçisi, həmyerlimiz Nailə Əhmədovadır. Qardaş ölkədə çox sevilən Azərbaycan musiqilərinin belə bir tərtibatda hazırlanıb, dərs vəsaiti kim təqdim edilməsi fərəhli haldır. Zəngin repertuar seçimi olan kitabda Üzeyir Hacıbəyli, Müslüm Maqomayev, Asəf Zeynallı, Qara Qarayev, Musa Mirzəyevlə yanaşı, avropalı bəstəkarların da əsərləri yer alıb.
Nailə Əhmədovanın dediyinə görə, Türkiyə musiqi ictimaiyyətinin maraqla qarşıladığı dərs vəsaitinin daha geniş tərtibatda və tirajda yayılması nəzərdə tutulur. Çünki orada Azərbaycan musiqiləri üzrə fortepiano dərsləri almaq istəyənlər çoxdur.
Kitab “Arkadaş” Yayın Evində çap olunub.
Yazıçının “Könül elçisi...”
Tanınmış tədqiqatçı-yazıçı Nəriman Əbdürrəhmanlının “Könül elçisi, yaxud Don Xuan de Persiya – Oruc” romanı Güney Azərbaycanda ikinci dəfə nəşr olunub.
Dünya – yaşam deyilən şey sirr içində sirdir. Yoxsa mövcudluğun mənası olmazdı…
N.Əbdürrəhmanlının bu tarixi bestselleri Səfəvi hökmdarı I Şah Abbasın 1599–1601-ci illərdə Moskva çarlığına və Avropa ölkələrinə göndərdiyi səfarət barədə, səfarətin birinci katibi, zəmanəsinin gözəl təhsil görmüş adamlarından olan, döyüşçü, şair, rəssam, Qərbdə Don Xuan de Persia adıyla tanınan Oruc bəy Bayatın ömür hekayəti haqqındadır.
Həqiqətən birnəfəsə oxunan romanda siyasi qarşıdurmalar, xəyanətlər, qətllər, fırıldaqlar, əzablarla yanaşı, gözəl eşq macəraları da var…
Ə.DOSTƏLİ
XQ
.jpg)
