Heydər Əliyev Fondunun təşkilatçılığı, Mədəniyyət Nazirliyinin dəstəyi ilə ardıcıl olaraq 13-cü dəfə təşkil olunan Qəbələ Beynəlxalq Musiqi Festivalı artıq tarixə qovuşdu.
Gözəl ənənəyə çevrilən incəsənət bayramı bu dəfə ümummilli lider Heydər Əliyevin 100 illik yubileyinə həsr olunmuşdu və yenə də öz möhtəşəmliyi ilə musiqi dünyasının diqqətini ölkəmizin dilbər guşəsinə cəlb edə bilib. İyulun 27-dən başlayaraq, 7 gün davam edən festivalda Azərbaycanla yanaşı, Böyük Britaniya, Estoniya, Litva, Polşa, Rusiya və Türkiyədən dünya şöhrətli musiqiçilər – ifaçı və dirijorlar, musiqi kollektivləri iştirak ediblər.
Festival günlərində musiqisevərlər və Qəbələnin qonaqları Üzeyir Hacıbəyli adına Azərbaycan Dövlət Simfonik Orkestrinin, “Gənclərə dəstək” layihəsi iştirakçılarının, Bakı Kamera Orkestrinin, “Clarte” klarnet kvartetinin, Litva Kamera Orkestrinin, gənc muğam ifaçılarının konsertlərini izləmək imkanı əldə ediblər. Dahi rus bəstəkarı Sergey Raxmaninovun 150, görkəmli Azərbaycan bəstəkarı Arif Məlikovun 90, tanınmış pianoçu Bella Davidoviçin 95, görkəmli alman bəstəkarı İohannes Bramsın 190 illik yubileyləri də xüsusi konsert proqramları ilə qeyd edilib və festivala əlavə rəng qatıb.
Ulu öndərin adını daşıyan Konqres Mərkəzində növbəti kamera konserti ilə bayramın son akkordları vurulub. Musiqi axşamında tamaşaçılar Xalq artistləri Ülviyyə Hacıbəyova (piano), Gülnaz İsmayılova (soprano), respublika və beynəlxalq müsabiqələr laureatları Səidə Tağızadə (piano), Ümidə Abasova (skripka) və Prezident təqaüdçüsü Vurğun Vəkilovun (piano) ifasında məşhur bəstəkarların əsərlərini dinləyiblər. Konsertdə Fərhad Bədəlbəylinin “Şuşa xatirələri”, “Vokaliz”, Niyazinin “Rast” simfonik muğamından fraqmentlər, Qara Qarayevin “Sonatina”, Sevda Məmmədlinin “Laçın balladası”, Sergey Raxmaninovun “Fuqa re minor”, Emin Sabitoğlunun “Dədə Qorqud” kinofilminin musiqiləri əsasında popurri, Fikrət Əmirovun “Min bir gecə” baletindən fraqmentlər, Vasif Adıgözəlovun “Bakı” əsəri alqışlarla qarşılanıb.
Açıq havada keçirilən yekun konserti də hər kəsə unudulmaz təsir bağışlayıb. Xalq artisti Ənvər Sadıqov (qarmon), Əməkdar artist Emil Əfrasiyab (piano) və “Qaytağı” instrumental ansamblının iştirakı ilə tamaşaçılara möhtəşəm proqram təqdim edilib. Üzeyir Hacıbəylinin “Arşın mal alan” operettasından melodiyalar, rejissor Adil İsgəndərovun “Əhməd haradadır?” və Vladimir Kosmanın “Oyuncaq” kinofilmlərinin musiqisi əsasında popurrilər, Astor Pyatsollanın, Cahangir Cahangirovun, Tofiq Quliyevin, Ruhəngiz Qasımovanın mahnıları, xalq rəqsləri tamaşaçı alqışı qazanıb.
“Qaytağı” ansamblının üzvləri – Əməkdar artist Ələkbər Ələkbərov (tar), Şakir Davudov (skripka), Orxan Musayev (balaban, klarnet), Xasay Gülməmmədov (saz, ud), Bəhram Mahmudov (qoşa nağara, perkussiya), Elvin Bəşirov (zərb alətləri), Taleh Ağayev (piano), Elmir Əliyev (nağara), Səlim Məmmədov (bas gitara) və Hidayət Sadıqbəyli (piano) virtuoz ifaları ilə könülləri oxşayıblar. Litva Kamera Orkestrinin ifasında Üzeyir Hacıbəyli, Fikrət Əmirov, Aşıq Veysəl, Çağatay Akel, həmçinin fransız musiqiçiləri Moris Ravel və Marsel Qranjani kimi bəstəkar və xalq aşıqlarının əsərləri unudulmaz təsir bağışlayıb. Dalğa-dalğa yayılan musiqi sədaları dağlarda əks-səda verərək əsrarəngiz bir aura yaradıb.
Beləliklə, XIII Qəbələ Beynəlxalq Musiqi Festivalı şən notlarla başa çatıb. Tədbirlərdən minlərlə tamaşaçı zövq alıb, konsertlər izləyicilərdə ən xoş təəssüratlar yaradıb. Onlardan bir neçəsinin ürək sözlərini təqdim edirik.
Nargilə Qafarova, Şəki Regional Mədəniyyət İdarəsinin rəisi:
– Fəxr edirik ki, məhz bizim bölgə sözügedən mötəbər musiqi festivalı üçün ünvan seçilib. Sayca 13-cü olan bu bayramda Azərbaycan sənətçiləri ilə bərabər, dünyanın ünlü klassik musiqi xadimləri də layiqli performans göstəriblər. Festivalın sayəsində Azərbaycanımızın musiqi mədəniyyəti geniş təbliğ olunur, eyni zamanda qədim Qəbələnin adı bütün dünyanı dolaşır.
Əhməd Qəndiyev, Qəbələ İncəsənət Məktəbinin direktoru:
– Bildiyimiz kimi, klassik musiqiyə o əsərlər aiddir ki, artıq zamanın sınağından çıxıb, tarix olub. Kökü Qərbdən gələn bu incəsənət növü müasir cəmiyyətdə öz auditoriyasını qoruyub saxlayıb, sevilir və dinlənilir. Bizim məktəbin müəllim və şagirdləri də festival çərçivəsində keçirilən tədbirlərdə iştirak etməklə klassik musiqi zövqlərini daha da inkişaf etdirdilər. Buna görə festivalın təşkilatçılarına minnətdarıq.
Malik Ağayev, Qəbələ Mədəniyyət Mərkəzinin direktoru:
– Konsertlərdə klassiklərin əsərlərini, simfonik musiqini və muğam interpretasiyalarını dinlədikcə yadıma şair Məmməd İsmayılın misraları düşürdü:
Dünən Bethoveni çaldılar sazda,
Hələ yaşamağa dəyər bir az da.
Doğrudan da, yeni nəsil virtuozlar Qərb və Şərq musiqisini böyük məharətlə sintez edir, heyrət doğururlar. Qəbələ festivalında bir daha əmin olduq ki, çağdaş çağırışlara cavab verən Azərbaycan musiqisi bu kimi tədbirlərin hesabına artıq ölkə hüdudlarından çox-çox kənarlarda, beynəlxalq miqyasda da yayılaraq geniş şöhrət qazanır. Opera, kapriççio və romanslarımız bəstəkarlarımızın hüdudsuz fantaziyasından soraq verir. Sevinirəm ki, biz hər il Qəbələdə keçirilən Beynəlxalq Musiqi Festivalına evsahibliyi edirik.
Bəli, nüfuzu ildən-ilə artan Qəbələ Beynəlxalq Musiqi Festivalı Azərbaycanın mədəni həyatında çox mühüm əhəmiyyətə malikdir. Klassik musiqi vurğunu olan hər kəsin səbirsizliklə gözlədiyi və sevə-sevə izlədiyi bu festival həm də yeni istedadların aşkar edilməsinə, bu sahədə bilik və tədqiqatların mübadiləsinə xidmət edir.
Əli NƏCƏFXANLI,
İlqar HƏSƏNOV,
“Xalq qəzeti”