Son araşdırmalar nəticəsində açıqlama verən səhiyyə mütəxəssisləri siqaretin ekosistemdəki bütün canlılara mənfi təsir etdiyini bildiriblər. Belə ki, zərərli vərdişin qurbanı olan digər canlılar evimizdəki pəncəli “dostlarımızdır”. Bəs, siqaretin ev heyvanlarına mənfi təsiri nədir?
Qeyd edək ki, dünyada təxminən 1,5 milyard insan siqaret çəkir. Tüstü nəticəsində havaya qarışan bir çox zəhərli maddələr insanlar kimi heyvanları da təhlükəyə məruz qoyur. Digər tərəfdən isə, atılan siqaret kötükləri heyvanlar tərəfindən yeyildikdə onların orqanizmində problemlər yaranır.
Evdə bəslədiyimiz balaca dostlarımızın yanında çəkdiyimiz siqaretin tüstüsü belə onların həm tüklərinə, həm də daxili orqanlarına ciddi şəkildə təsir edir.
Məsələn, siqaret quşlarda ağciyər xərçənginə və bir çox heyvanda göz infeksiyasına səbəb olur. Xüsusən də itlərdə burun xərçəngi yaradır.
Ev heyvanlarımızı və təbiətdə yaşayan bütün digər canlıları siqaretin zərərli təsirindən qorumaq insanlıq borcumuzdur. Gəlin buna riayət edək!
Səadət RZAYEVA, “Xalq qəzeti”
