Dünən Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli qədim diyarda səfərdə olan BMT-nin İnkişaf Proqramının Azərbaycandakı rezident nümayəndəsinin səlahiyyətlərini icra edən Alessandra Rokkasalvonun başçılıq etdiyi nümayəndə heyəti ilə görüşüb.

Səlahiyyətli nümayəndə qonağı ha­zırda icrası davam etdirilən “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nın prioritet istiqamət­lərindən və bu çərçivədə reallaşdırılan layihələr barədə məlumatlandırıb. Fuad Nəcəfli bildirib ki, bölgədə mühüm logis­tik mərkəz olan Naxçıvanın böyük “yaşıl enerji” potensialı var və bu potensialdan səmərəli istifadə olunması istiqamətində mühüm addımlar atılır. 

Qlobal iqlim dəyişikliyi fonunda gö­rülən işlərdən danışan Fuad Nəcəfli qeyd edib ki, bu il yağıntıların bol olması bu sahədə problemləri kəskin azaldıb. Bu­nunla belə növbəti illərdə bu cür prob­lemlərin yaşanmaması üçün su ehtiyat­larından səmərəli istifadə və mütərəqqi suvarma mexanizmləri hazırlanır. Səla­hiyyətli nümayəndə turizmin təbliği və təşviqi istiqamətində birgə əməkdaşlığın zəruriliyini xüsusi vurğulayıb.

Alessandra Rokkasalvo 2023-cü ildə reallaşdırılan və Azərbaycanın milli inki­şaf məqsədlərinə töhfə verən proqramla­rın icrasından bəhs edib. O vurğulayıb ki, enerji və ətraf mühit, gender və gənclərin inklüzivliyi, keçmiş məcburi köçkünlərin təhlükəsiz qayıdışı, turizm, tibbi təchi­zat, kənd təsərrüfatı, həmçinin effektiv idarəetmə və məşğulluğun yaradılması sahələrində fəaliyyət diqqət mərkəzində­dir. Bu prosesdə blokada şəraitində və mühüm strateji mövqedə yerləşən Nax­çıvan səfəri xüsusi əhəmiyyət kəsb edir. 

Görüşdə Zəngəzur dəhlizinin bölgə­nin inkişafındakı xüsusi əhəmiyyəti vur­ğulanıb, qarşıdakı illər ərzində BMT-nin muxtar respublika ilə əlaqələrinin davam etdiriləcəyinə əminlik ifadə edilib, qarşı­lıqlı maraq doğuran digər məsələlər mü­zakirə edilib.

XQ