Paris Olimpiadasında ölkəmizi təmsil edəcək güləş millimizin ən gənc üzvü Həsrət Cəfərov bu mötəbər yarışa böyük iddia ilə gedir. 21 yaşlı pəhləvanın yüksək nəticəyə inamı əsassız deyil. O, son 2 Avropa çempionatının qalibi olub. 

Yunan-Roma güləşçisi Həsrət Cəfərov Goranboy rayonunun Qaradağlı kəndində dünyaya gəlib. Güləşə həvəsi onda qardaşı oyadıb. Bir neçə il Goran­boyda məşq etdikdən sonra Respublika Olimpiya İdman Liseyində Vaqif Feyzul­layevin rəhbərliyi altında məşqlər etməyə başlayıb. İlk böyük nailiyyətini 16 yaşda ikən qazanıb. Yeniyetmələr arasında Avropa çempionu olub. 1 il sonra Dün­ya və Avropa çempionatlarında bürünc medal alıb. O, Avropa Gənclər Olimpiya Festivalının qalibidir. 2021-ci ildə gənclər arasında Avropa və Dünya çempionat­larının, U-23 Dünya çempionatında ən yüksək pilləyə qalxıb. 2022-ci ildə V İs­lam Həmrəyliyi Oyunlarının qızıl medalını qazanıb. Dünya çempionatının bürünc və gümüş mükafatçısıdır. 

Həsrət Cəfərovun güləşçi kimi şöhrətlənməsində möhkəm xarakteri mühüm rol oynayıb. Bunu onun şəxsi məşqçisi, Əməkdar məşqçi Vaqif Fey­zullayev qəzetimizə yetirməsi ilə bağlı açıqlamasında bildirdi: 

– Hələ ilk məşqlərindən ciddi kimlik nümayiş etdirirdi. 6-cı sinifdə oxuyurdu. Tapşırıqları tam dəqiqliklə yerinə yetir­məyə çalışırdı. Alınmayanda qətiyyən ruhdan düşmürdü. Çox intizamlı və qə­tiyyətli idi. Məşqlər bitdikdən sonra onu zaldan çıxara bilmirdim. Başa salırdım ki, tam gücdən düşənə qədər işləməyək, sabaha da qüvvə saxlayaq. Bir də görür­düm ki, inadkarlıqla geri qayıdıb. 

Uşaqlarla işləmək çox çətindir. Məşq­çilər belə incəliklərə mütləq diqqət ye­tirməlidirlər. Çünki onları uşaqlıqda zə­dələrdən qorumalıyıq. Bir dəfə çox ağır xəsarət aldı, çənəsi sındı. Bir sınıqçı tapdım, onu düzgün müalicə etdi. 40 gün sonra sınaq üçün beynəlxalq turnirə qa­tıldı və 4 uğurlu görüş keçirdi. Bu yarış­dan sonra “Narahat olmayın, güləşə bi­lirəm, davam etdirmək istəyirəm”, – desə də risk etməyini istəmədim. O, hər bir çətinliyin öhdəsindən gəlmək üçün daim üzərində çalışıb, bir an belə olsun ruhdan düşməyib. 

Vaqif müəllim yetirməsinin əzm­karlığından və əsas keyfiyyətlərindən də danışdı: 

– Zaqrebdəki Avropa çempionatının finalında gürcüstanlı ilə keçirdiyi gərgin qarşılaşmada Həsrət məhz əzmkarlığı sayəsində qalib oldu. İlk hissəni geridə başa vursa da, 2-ci hissədə qazandığı qələbə sayəsində ilk dəfə Avropa çempi­onu oldu. Bu il 2-ci dəfə qitə çempiona­tında qızıl medal qazandı. Həsrət bütün turnirlərə ciddi yanaşır. Bu, uşaqlıqdan belədir. Heç bir yarışa özündən razı, arxayınlıqla getmir. Rəqiblərini qiymət­ləndirməyi bacarır ki, bu da idmançıda əsas keyfiyyətlərdən biridir. 

V.Feyzullayev Paris Olimpiadasın­da Həsrət Cəfərovdan qızıl medal göz­lədiyini bildirdi:

– Həsrətin uğurlarında millinin məşq­çisi, yetirməm, dünya çempionu Həsən Əliyevin də böyük payı var. Düzgün məşqlər sayəsində Həsrət nailiyyətlərini davam etdirir. Ondan komandamız, elə­cə də mən medal gözləyirik. Düşünürəm ki, ümidlərimizi doğruldub, Vətənə böyük uğurlarla qayıdacaq. 

Vaqif Feyzullayevin fikirlərinə onu da əlavə etmək istəyirik ki, qətiyyəti, əzm­karlığı ilə Dünya, Avropa çempionatla­rında fərqlənən Həsrət Cəfərov Olimpiya Oyunlarında da fəxri kürsüyə yüksəlməyi bacaracaq. Elə gənc güləşçinin hədəfi də Olimpiya çempionluğudur. 

İnanırıq ki, digər bahadırlarımız da Parisdə xalqımızı sevindirəcəklər. Azər­baycan güləşinin estafetini uğurla davam etdirən pəhləvanlarımızı Olimpiya zirvə­sində görürük.

Leyla QURBANOVA
XQ