Bolqarıstanın https://www.bta.bg xəbər portalında yayımlanan məqalədə müasir Azərbaycan dövlətinin qurucusu, görkəmli siyasət və dövlət xadimi Heydər Əliyevin multikultural siyasi kursunun ölkəmizdə yüksək səviyyədə davam etdirilməsindən və Azərbaycandakı bolqar icmasına yaradılmış şəraitdən söhbət açılıb.
Diasporla İş üzrə Dövlət Komitəsindən qəzetimizə bildirilib ki, məqalədə Azərbaycan–Bolqarıstan Dostluğunun İnkişafına Yardım İctimai Birliyinin rəhbəri, “Akkord” jurnalının baş redaktoru Mariya Hüseynova-Atanasovanın mülahizələrinə geniş yer verilib. Azərbaycanı və Bolqarıstanı iki doğma ölkəsi adlandıran birlik rəhbəri və baş redaktor Gəncədə dünyaya göz açıb. Onun əcdadları Zaporojyedəki bolqar icmasından olub, lakin aclıq başlayandan sonra Azərbaycanın ən iri şəhərlərindən biri sayılan Gəncəyə köçüblər. Bolqar dilini ona öyrədən nənəsi deyib ki, məhz Gəncədə onlara çörək, iş verilib və yaşamaq üçün ev ayrılıb.
Mariya Hüseynova-Atanasova nəzərə çatdırıb ki, Azərbaycanda yaşayan etnik icmalara öz milli kimliyini, dillərini və adət-ənənələrini qoruyub saxlamaq üçün bütün şərait yaradılıb: “Mən çox minnətdaram ki, biz Azərbaycanda dilimizi, milli kimliyimizi, adət-ənənələrimizi, dinimizi qoruyub saxlayırıq. Heç kim bizə heç bir vaxt mane olmur. Mən Azərbaycanla Bolqarıstan arasında çoxlu ümumi cəhətlər görürəm”.
Müəllif bildirib ki, 2005-ci ildən mövcud olan “Akkord” jurnalı artıq 18 ildir bolqar dilində dərc olunur. Jurnalın son nömrəsi isə müasir müstəqil Azərbaycan dövlətinin qurucusu Heydər Əliyevin anadan olmasının 100 illiyinə həsr olunub: “Heydər Əliyev müstəqilliyimizin memarıdır. Biz dinc şəraitdə yaşayırıq. Mən şahidəm. Prezidentimiz İlham Əliyev də Heydər Əliyevin siyasi kursunun davamçısıdır”.
Azərbaycan Slavyan Universitetinin nəzdində bolqar dili və Mədəniyyəti Mərkəzinin fəaliyyət göstərdiyi, həmin mərkəzdə mübadilə proqramı üzrə Azərbaycana gəlmiş Müqəddəs Kliment Ox-ridski adına Sofiya Universitetində bolqar dilini tədris edən müəllimin çalışdığı, bolqar dilində yaxşı danışan nəvəsi Əmir Əlizadənin hazırda Bolqarıstanın Sofiya Universitetində təhsil aldığı vurğulanıb.
Qeyd edək ki, Bolqarıstanın Milli Radiosunun da qonağı olan birlik sədri və baş redaktor paytaxt Sofiyadakı rəsmi və ictimai qurumlarda bir sıra görüşlər keçirib. “Heydər Əliyev İli” çərçivəsində Ulu öndərə həsr olunmuş “Akkord” jurnalının son buraxılışını bolqar ictimaiyyətinə təqdim edib.
“Xalq qəzeti”