Xatırladaq ki, A.İsrafilov 1941-ci il yanvarın 24-də Bakı şəhərində anadan olub. İfaçılıq sahəsində öz dəst-xətti olan sənətkar yaratdığı musiqi parçaları ilə milyonların qəlbini fəth edib.

Mübaliğəsiz demək olar ki, o, Azər­baycan qarmon ifaçılığı sənətinə ba­şucalığı gətirmiş azman sənətkarlar­dan biri idi. Möhtəşəm çalğı manerası ilə ölkəmizin hüdudlarından kənarda – Rusya, Türkiyə, İran, Yaxın və Uzaq Şərq ölkələrində də sənətsevərləri hey­ran qoymuşdu. Onun virtuoz ifa üslubu insan oğlunu sanki möcüzələr aləminə aparır, ülviliyə səsləyir, yaşayıb-yarat­maq həvəsini artırırdı. 

Aftandil İsrafilov ustadı olmadan, kimsəyə şəyirdlik etmədən, yalnız öz fitri istedadına güvənərək qarmonun bütün sirlərinə yiyələnmişdi. O, dinləyi­cilərin qəlbində silinməz izlər buraxmış “Zemfira”, “Kəmalə”, “Nazilə”, “Aynurə”, “Jalə”, “Basqalı” kimi 100-ə qədər mu­siqi havasının müəllifidir. Eyni zaman­da, “Ad günü”, “Məhəllə” və “Xalq tə­ranələri” filmlərində Aftandil İsrafilovun çəkildiyi kadrlar ondan yadigar qaldı. 

Musiqi xəzinəmizin qoruyucuların­dan olan mərhum sənətkar Azərbaycan ifaçılıq məktəbinin inkişafındakı müstəs­na xidmətlərinə görə 1998-ci ildə Xalq artisti fəxri adına, 2016-cı ildə “Şöhrət” ordeninə layiq görülüb.

O, 2003-cü ildən Azərbaycan Res­publikası Prezidentinin fərdi təqaüdçü­sü idi.

Allah rəhmət eləsin.

“Xalq qəzeti”