“Azadlıq” radiosunun erməni xidmətinin Dığdan hazırladığı reportajda haylar hər gün kənddən azərbaycanlıları gördüklərini bildiriblər.
Aprelin 11-də Hayastanın qəsdən törətdiyi təxribatı nəticəsində şərti sərhəddə baş verən silahlı toqquşma Dığ kəndinin erməni sakinləri arasında əməlli-başlı təşviş yaradıb. Dığlılar ərazini tərk edəcəkləri barədə daha ucadan danışmağa başlayıblar. Bu barədə “Azadlıq radiosu”nun erməni xidmətinin kənddən hazırladığı reportajda məlumat verilir.
Oxucularımıza xatırladaq ki, yeni Laçın yolu istifadəyə veriləndən sonra sərhədin Laçın istiqamətində mövqe dəyişikliyi aparılıb. Bunun nəticəsində Dığ sakinlərinin işğal illərində əkin və otlaq sahələri kimi istifadə etdikləri ərazilər ordumuzun tam nəzarətinə keçib. Hazırda şərti sərhəd zolağında nəzarət-keçid postlarının qurulması işləri başa çatdırılıb.
* * *
Yaxın tarixə nəzər yetirərək və onu da bildirək ki, adı çəkilən ərazilər işğal dövründə Ermənistan tətəfindən qanunsuz olaraq irəli çəkilən dövlət sərhədinə aiddir. İndi Azərbaycanın müvafiq qurumlarının əlimizdə olan mövcud xəritəyə uyğun şəkildə apardığı dəqiqləşmə işlərinin nəticəsində Dığ kəndinin sakinləri otuz ildən artıq müddətdə istismar etdikləri əkin sahələrindən məhrum olublar. Yaranmış vəziyyət Dığ erməniləri arasında kəndi tərk etmək istəyini artırıb, 11 aprel silahlı toqquşması isə onların bu istəyini daha da gücləndirib.
Dığ kəndində yaşayan ermənilərdən biri “Azadlıq” radiosunun əməkdaşına bunları söyləyib: “Burada yaxşı heç nə yoxdur, vəziyyət getdikcə daha da pisləşir. Vəziyyət çox ciddidir”.
Radioda efirə verdiyi reportajında o, qeyd edir ki, Azərbaycan və Ermənistan bu ərazidə fəal şəkildə mühəndis-istehkam işlərini həyata keçirirlər. Dığ kəndindən olan deputat Davit Danielyan bildirib ki, silahlı insident bir mövqe üzərində baş verib.
Kəndin başqa bir sakini Yura Qalstyan isə hesab edir ki, Azərbaycan tezliklə bütövlükdə Zəngəzura nəzarəti öz əlinə alacaq: “İndi mövqelərini möhkəmləndirən azərbaycanlılar məqamı gələndə kəndi, daha sonra Zəngəzuru götürəcəklər. Hər gün kənddən azərbaycanlıları müşahidə edirik. Onların qarşısını alacaq gücümüz yoxdur”.
* * *
Radioreportajda daha sonra danışılır ki, Dığ kəndinin bəzi sakinləri silahlanmaq üçün hökumətə müraciət ediblər. Bu barədə “Azadlığın” müxbirinə ehtiyatda olan kapitan Andranik Manuçaryan məlumat verir: “Yerli qubernatora, hökumətə, məsul şəxslərə müraciət etmişik ki, bizi silahlandırsınlar. Amma indiyə qədər səs-soraq yoxdur”.
Bu arada Hayastan Müdafiə Nazirliyi qocalar evinin sakinləri olan yaşlı kişiləri məcburi qaydada Azərbaycanla şərti sərhəddə hərbi xidmətə göndərir. Bununla bağlı “Bez Tormozov” Teleqram kanalı videogörüntü yayıb.
“Azadlıq” radiosunun reportajı əlavə şərh tələb etməsə də, yalnız onu deməyi vacib sayırıq ki, Azərbaycan müharibə istəmir, Bakı hayları sülhə dəvət edir. Yox, əgər rəsmi İrəvan başıpozuq revanşist daşnakların fitvasına uyub, 3-cü Qarabağ müharibəsinə xeyir-duasını versə, onda elə Dığdan başlayıb Ermənistanın hər kəndində qəbirlərini qazmağa başlasınlar.
İ.HƏSƏNQALA, “Xalq qəzeti”