4 ölkə mənbəyi Azərbaycan olan təmiz enerji marşrutunun əsasını qoydu
Bakıda Cənub Qaz Dəhlizi və Yaşıl Enerji Məşvərət şuraları çərçivəsində “Azərbaycan – Gürcüstan – Türkiyə – Bolqarıstan Yaşıl Enerji Dəhlizi” layihəsi üzrə nazirlərin 2-ci iclası keçirilib.
İclasda Azərbaycanı energetika naziri Pərviz Şahbazov, Gürcüstanı iqtisadiyyat və davamlı inkişaf nazirinin müavini Vaxtanq Tsintsadze, Türkiyəni energetika və təbii sərvətlər naziri Alparslan Bayraktar, Bolqarıstanı isə energetika naziri Jeço Stankov təmsil ediblər. Görüşdə enerji təhlükəsizliyinin təmin olunmasında regionlararası “yaşıl” enerji infrastrukturunun qurulmasının vacibliyi və Azərbaycanın zəngin bərpaolunan enerji resurslarının nəqli sahəsində geniş əməkdaşlığı təşviq edən layihələrin rolu vurğulanıb. Yeni yaşıl interkonnektorun əhəmiyyəti və layihənin həyata keçirilməsi istiqamətində atılacaq addımlar müzakirə edilib.
Daha sonra “Azərbaycan Respublikasının Energetika Nazirliyi, Gürcüstanın İqtisadiyyat və Davamlı İnkişaf Nazirliyi, Türkiyə Respublikasının Energetika və Təbii Sərvətlər Nazirliyi və Bolqarıstan Respublikasının Energetika Nazirliyi arasında yaşıl elektrik enerjisinin ötürülməsi və ticarəti sahəsində əməkdaşlığa dair Anlaşma Memorandumu” imzalanıb.
Mərasimdə çıxış edən energetika naziri Pərviz Şahbazov deyib ki, bu sənədi imzalamaqla mənbəyi Azərbaycan olan daha bir “yaşıl enerji dəhlizi”nin yaradılmasına başladığımızı elan edirik. Nazir qeyd edib ki, Azərbaycanın zəngin “yaşıl” enerji potensialı, iddialı layihələri, enerji ixracı infrastrukturunun yaradılması və ölkələrimiz arasında enerji təchizatı üzrə əməkdaşlıq təcrübəsi bu dördtərəfli təşəbbüsün gələcək uğuru üçün möhkəm təməl yaradır: “Yaşıl interkonnektorlar vasitəsilə bərpaolunan enerji resurslarının ötürülməsi və ticarəti sahəsində irəliləyişlər əldə edərək 4 ölkə arasında enerji inteqrasiyasını gücləndirəcək və regional enerji təhlükəsizliyinə yeni töhfə verəcəyik.”
Gürcüstanın iqtisadiyyat və davamlı inkişaf nazirinin müavini Vaxtanq Tsintsadze çıxışında 4 ölkə arasında imzalanmış Anlaşma Memorandumunun transsərhəd elektrik infrastrukturu sahəsində əməkdaşlığın genişləndirilməsi üçün zəmin yaratdığını diqqətə çatdırıb. O, birgə səylər nəticəsində ölkələrimizin enerji təhlükəsizliyini yaxşılaşdırmaq, bərpaolunan enerjidən istifadəni artırmaq və növbəti nəsillər üçün daha təmiz və davamlı gələcək yaratmaq istiqamətlərində əhəmiyyətli irəliləyişlər əldə edildiyini bildirib.
Türkiyənin energetika və təbii sərvətlər naziri Alparslan Bayraktar transsərhəd elektrik enerjisi birləşmələrinin texniki, iqtisadi və strateji cəhətdən çox vacib olduğunu xatırladaraq bu təşəbbüsün regionumuza enerji təhlükəsizliyinin artırılmasından infrastrukturun daha səmərəli istifadəsinə, eləcə də iqtisadi faydadan dayanıqlılığa kimi bir sıra strateji faydalar gətirəcəyini söyləyib.
Bolqarıstanın energetika naziri Jeço Stankov isə çıxışında enerji sektorunun transformasiyası etibarlı, təmiz və əlverişli enerji təchizatı tələb edən iqtisadi dəyişikliklərin bir hissəsi olduğunu vurğulayaraq daha güclü və etibarlı əməkdaşlıq və tərəfdaşlıqlara əsaslanan həllərin tapılmasının vacibliyini diqqətə çatdırıb. Bu baxımdan o, Memorandumun imzalanması ilə bu istiqamətdə atılmış böyük addım kimi xarakterizə edib.
Xatırladaq ki, sənəd 4 ölkə arasında yaşıl elektrik enerjisinin ötürülməsi və ticarəti potensialının artırılması məqsədilə birgə investisiya layihələrinin hazırlanması, elektrik enerjisi infrastrukturunun inkişafı, o cümlədən ENTSO-E sisteminə inteqrasiya prosesi üzrə əməkdaşlığı ehtiva edir.
