“ABŞ Azərbaycanla münasibətlərinə böyük önəm verir. Cənub Qaz Dəhlizi ortaq maraqlara əsaslanan, uğurlu ikitərəfli tərəfdaşlığımızın təməlini təşkil edir”. Bu fikri ABŞ Dövlət Departamentinin Enerji Resursları Bürosunun baş məsləhətçisi Erik Ceykobs Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı səsləndirib.
O deyib ki, Cənub Qaz Dəhlizi Azərbaycanın zəngin enerji daşıyıcılarını nəinki ölkənin, eləcə də regionun rifahı üçün istifadə etməyə imkan verir. Ölkəmizin bununla artıq etibarlı enerji təchizatçısına çevrildiyini vurğulayan baş məsləhətçinin fikrincə, ABŞ kimi Azərbaycanın da nəhəng enerji ehtiyatları var: “ABŞ Prezidenti Donald Tramp enerjini Amerikanın üstünlüyünün təməl daşı və onun təhlükəsizliyinin açarı adlandırırdı. Ölkəmizin enerji zənginliyi sayəsində iqtisadi imkanlar yaratmaq, səhiyyə və təhsili təkmilləşdirmək, vətəndaşlarımızın həyatlarını yaxşılaşdırmaq hər yaxşı ölkənin vəzifəsidir”.
Təbii qazın hamı üçün etibarlı, əlçatan və təhlükəsiz enerji mənbəyi olduğunun vurğulayan Erik Ceykobsun fikrincə, bu, gələcək onilliklərdə də belə olacaq: “Seçim yanacağı olan təbii qaz artıq qlobal enerji tələbatını qarşılamaq üçün vacibdir. Bir neçə gün əvvəl Səngəçal terminalında oldum. Görünür ki, Azərbaycan təbii qazın ölkənin, Avropanın və bütün dünyanın gələcəyi üçün əsas enerji mənbəyi olduğunu heç vaxt unutmayıb. Ölkəmiz, o cümlədən ABŞ şirkətləri sizin və enerji sənayenizin iqtisadi artımı və enerji təhlükəsizliyi üçün imkanları müəyyənləşdirmək və sürətləndirmək məqsədilə tərəfdaş olmağı səmimiyyətlə arzulayır”.
