Rəqabət Forumunda azad rəqabətin tərəqqinin təkanverici mexanizmi olması müzakirələrin aparıcı istiqamətini təşkil edib.

Antiinhisar və İstehlak Bazarına Nə­zarət Dövlət Xidmətinin rəisi Məmməd Abbasbəyli Milli Rəqabət Forumunun məqsədinin bu il və növbəti illərdə günün ən mühüm yerli və qlobal çağırışlarının və səmimi dialoq platformasının yara­dılmasından ibarət olduğunu deyib. O bildirib ki, iqtisadiyyat baxımından rəqa­bət orqanının əsas məqsədlərindən biri qəbul olunmuş rəqabət qanunvericiliyinin tam mənimsənilməsidir. Rəqabətin əsas daşıyıcı qüvvəsi onun verəcəyi nəticədir ki, bu da dayanıqlı inkişafın təmin olun­ması ilə əlaqədardır. Forum ölkə daxilin­də geniş auditoriya ilə aktual problemləri müzakirə etmək üçün unikal imkan yara­dır. 

Xidmət rəisi daha sonra qeyd etdi ki, gələcəkdə bu forum ölkəmizdə rəqabət siyasətinin inkişafı, iqtisadiyyatın rəqa­bət qabiliyyətinin artırılması və təbii ki, davamlı iqtisadi inkişaf məsələlərinin mü­zakirəsi platformasına çevriləcək: “Keçən il satınalma prosesinin şəffaflaşdırılması və təkmilləşdirilməsi nəticəsində ölkə­miz 742 milyon manat dövlət vəsaitinə qənaət edib. Ümid edirəm ki, cari il satı­nalmalar prosesinin tamamilə rəqəmsal­laşdırılması nəticəsində bu məbləğ daha da artacaq".

İqtisadiyyat nazirinin müavini Anar Axundov diqqətə çatdırıb ki, Rəqabət Məcəlləsinin tətbiqi müxtəlif sektor və bazarlarda səmərəli tənzimləmələrin aparılması imkanlarını genişləndirəcək. Nəticədə sahibkarlar üçün həmin ba­zarlarda əlverişli işgüzar mühit formala­şacaq: "Rəqabət Məcəlləsi kiçik və orta biznes subyektlərinin inkişafının təmin edilməsi, onların bazara girişinin asan­laşdırılması üçün geniş tənzimləmə mexanizmlərini əhatə edir. Yeni rəqabət siyasətinin dinamik, inklüziv və dayanıqlı iqtisadi artımı dəstəkləməsi azad edilmiş ərazilərimizin dirçəldilməsinə də əlavə imkanlar açacaq, bazar iştirakçılarının sayı çoxalacaq, yerli təsərrüfat subyekt­lərinin rəqabətqabiliyyətliliyi yüksələcək, innovasiya fəaliyyətinin, özəl sektorda rəqəmsallaşmanın tətbiqi genişlənəcək”.

Azərbaycan Respublikasının Ali Məh­kəməsi sədrinin müavini Çingiz Əsgərov isə deyib ki, Azərbaycanda Rəqabət Mə­cəlləsinin tətbiqi ilə bağlı funksiyalar in­zibati məhkəmələrdə həyata keçiriləcək. Bununla bağlı inzibati məhkəmələrdə maarifləndirmə işləri aparılacaq: "İnzi­bati məhkəmələrdə kifayət qədər peşə­kar hakimlər fəaliyyət göstərir. Əminəm ki, Rəqabət Məcəlləsinin tətbiqi ilə bağlı problemlər olmayacaq, sənəd uğurla tət­biq ediləcək".

Çıxış edən digər natiqlər forumda səsləndirilən məsələlərlə bağlı fikirlərini bölüşüblər. Forum “Rəqabət siyasətinin iqtisadiyyata təsiri” və “Məhkəmə-hüquq sisteminin rəqabət siyasətinin icrasında rolu” mövzularında panel iclaslarla da­vam edib.

XQ