Bərdə–Ağdam dəmir yolu xəttinin və Bərdə–Ağdam avtomobil yolunun tikintisi layihələrinin bu ilin sonunadək yekunlaşdırılması planlaşdırılır. Dəmir yolu xətti uzunluğu 104 kilometr olan Yevlax – Xankəndi dəmir yolunun bir hissəsidir.
Bu yol 1991-ci ildə Xankəndinin, 1993-cü ildə isə Ağdamın işğal edilməsi ilə fəaliyyətini dayandırıb. Düşmən üzərində qazanılan qələbə ilə uzunluğu 47,3 kilometrdir (yan yolları ilə birlikdə 57 kilometr) olan bu dəmir yolu xəttinin Bərdədən başlayaraq Ağdama qədər uzanan hissəsi yenidən tikilir. Xəttin 32,8 kilometrlik hissəsində relslər quraşdırılıb. Həmçinin torpaq işləri, mühəndis qurğularının tikintisi, yolun üst quruluş elementlərinin və yoldəyişənlərin quraşdırılması başa çatdırılıb. Yol boyunca Bərdə, Köçərli, Təzəkənd və Ağdam stansiyaları fəaliyyət göstərəcək. Dörd stansiyalı dəmir yolu bir xətli olacaq və qatarlar saatda 80 kilometr sürətlə hərəkət edəcək. Dəmir yolu xəttinin layihələndirilməsi işləri isə 90 faiz yerinə yetirilib.
İkinci layihə isə Bərdə – Ağdam avtomobil yolunun tikintisidir. Bu avtomobil yolunun uzunluğu 44,5 kilometr, eni 26,5 metrdir. Birinci texniki dərəcəyə uyğun inşa olunan avtomobil yolu Qarabağın inkişaf planı nəzərə alınmaqla, dörd hərəkət zolağından ibarətdir. Yolun tikintisi zamanı ilk dəfə Azərbaycanda vahid layihə çərçivəsində daxili yol kommunikasiya şəbəkəsini tikintisi həyata keçirilir. Yol çəkilən zaman kommunikasiya xətləri də eyni vaxtda çəkilir. Bütün kommunikasiya xətləri yeraltı və səkilərin altından keçəcək və bu vaxt yollarda kanalizasiya quyuları olmayacaq. Bu yol Ağdam rayonunda onlarla yaşayış məntəqəsini bir-birinə bağlayacaq və Ağdamın şəhərdaxili yol şəbəkəsi ilə birləşəcək.
Hər iki layihənin həyata keçirilməısi ilə yanaşı, Ağdam şəhər dəmir yolu və avtovağzal kompleksinin tikintisi də nəzərdə tutulur. Artlq dəmir yolu vağzalının təməli qoyulub. Bu infrastruktur istifadəyə verildikdən sonra gündəlik min sərnişinə xidmət edəcək. Avtovağzalda isə ilkin mərhələdə şəhərlərarası (rayonlararası) müntəzəm avtobus marşrutlarının sayının 10 olması planlaşdırılır və 1500 nəfərədək sərnişinin qəbul edilməsi nəzərdə tutulur.
Bərdə–Ağdam dəmir yolu xətti vasitəsilə Ağdam və digər rayonlarda geniş tikinti-bərpa və abadlıq-quruculuq işləri görüləcək, dayanıqlı sosial-iqtisadi inkişaf təmin ediləcək. Bu imkan verəcək ki, işğaldan azad olan rayonlarımızda yerli və xarici sərmayələrin cəlb edilməsi mümkün olsun. Bu, həm də müasir texnologiyaların cəlb edilməsi kimi vəzifələrin yerinə yetirilməsi baxımından xüsusilə əhəmiyyətlidir.
Yeni avtomobil yolu və dəmir yol xəttinin tikintisi nəqliyyat xidmətlərini daha da yaxşılaşdırmaqla yanaşı, bölgədə turizmin inkişafına əlavə təkan verəcək, yük və sərnişin daşımalarında əsas rol oynayacaq, yük həcminin çoxalmasına və gəlirlərin artmasına şərait yaradacaq. Nəhayət, Ağdam əhalisinin işsizlik kimi bir problemlə üzləşməsinin qarşısını alacaq.Yolboyu yaşayış məntəqələrinin sosial-iqtisadi inkiçafına da böyük töhfə verəcək.
Pünhan ƏFƏNDİYEV,
“Xalq qəzeti”nin bölgə müxbiri