Prezident İlham Əliyev çıxışlarının birində Türkiyənin Cümhurbaşqanı Rəcəb Tayyib Ərdoğanın liderliyi sayəsində qardaş ölkənin son illər böyük, uğurlu yol keçdiyini qeyd edib. Dövlət başçısı daha sonra Türkiyədəki sabitlik və inkişafın göz önündə olduğunu deyib: “Bu gün dünyanın bir çox ölkələrində böhran yaşanır. Ölkələr idarəolunmaz vəziyyətə düşür. İqtisadi çətinliklər, sıxıntılar insanların haqlı etirazına səbəb olur. Türkiyə isə inamla irəliləyir, böyük layihələr həyata keçirir. Bölgədə söz sahibidir, dünyada önəmli güc mərkəzidir və hər kəs bununla hesablaşmalıdır. Hər kəs bilməlidir ki, bu uğurların səbəbkarı mənim qardaşım Rəcəb Tayyib Ərdoğandır”.
Yeri gəlmişkən, Türkiyənin son illərdə güclü inkişaf yolu keçməsi qardaş ölkənin iqtisadiyyatında daha aydın nəzərə çarpır. Bu, statistik göstəricilərdə xüsusilə diqqət çəkir. Belə ki, Türkiyə Statistika Təşkilatının (TÜİK) açıqladığı məlumata görə, ölkə iqtisadiyyatı 2022-ci ildə 5,6 faiz artıb. Bununla yanaşı, ümumi daxili məhsul (ÜDM) istehsalı 5,6 faiz yüksələrək 15 trilyon 6 milyard 574 milyon TL və ya 905 milyard 501 milyon dollar təşkil edib. Ötən il Türkiyədə adam başına düşən ÜDM istehsalı 178 min 589 TL və ya 10 min 655 dollara bərabər olub.
ÜDM-i təşkil edən sahələr arasında sənaye 3,3 faiz, kənd təsərrüfatı 0,6 faiz, maliyyə və sığorta 21,8 faiz, xidmət sektoru 11,7 faiz böyüyüb. Bütün bu göstəricilərlə qardaş ölkə “G20” dövlətləri arasında ən sürətlə inkişaf yolu keçən dövlətlərdən birinə çevrildiyini təsdiqləyib.
Türkiyənin ixracatında da son illər mühüm uğurlar qeydə alınıb. Hesabat ilində ölkənin ixracatı bir il əvvəllə müqayisədə 12,9 faiz artaraq 254,2 milyard dollara çatıb. Bu, ölkə tarixində rekord göstəricidir. Bundan sonra əsas hədəf Türkiyəni dünyanın ilk 10 ixracatçı ölkəsindən biri etməkdir. Türkiyənin Ticarət Nazirliyinin məlumatlarına görə, cari ilin yanvar-fevral dövründə ixrac ötən ilin eyni dövrü ilə müqayisədə 1,4 faiz artaraq 38 milyard dollara, idxal isə 15,4 faiz artaraq 64,3 milyard dollara çatıb.
Bu gün tekstil sənayesi ölkə iqtisadiyyatında daha güclü inkişaf edən sahə kimi tanınır. Bu sektor Türkiyə iqtisadiyyatının lokomotiv sahələrindən biridir. Belə ki, tekstil ölkə ixracatının 17 faizin təşkil edir və əhalinin məşğulluğunda ilk sırada yer tutur. Əsas xammal-pambıq ehtiyacının yarısına qədəri yerli istehsal hesabına qarşılansa da, Türkiyə illik 700 min tonla (2019-cu ildə) dünyada ən çox pambıq idxal edən 6-cı ölkədir. Türkiyə pambığı əsasən ABŞ (50 faiz), Braziliya (12 faiz) Yunanıstan (9 faiz), Türkmənistan (5 faiz) və Azərbaycandan (5 faiz) idxal edir.
Qardaş Türkiyə, eyni zamanda, dünya ölkələri iqtisadiyyatına daha çox sərmayə yatıran dövlətlərdən biri kimi tanınır. Həmin sırada Azərbaycan xüsusilə fərqlənir. Belə ki, 1995-2021-ci illər ərzində Türkiyədən respublikamıza cəlb olunan birbaşa investisiyaların həcmi 13,3 milyard ABŞ dolları (10,4 milyard ABŞ dolları neft sektoruna, 2,9 milyard ABŞ dolları (1-ci yer) qeyri-neft sektoruna) təşkil edib. Türk şirkətləri əsasən enerji, sənaye, telekommunikasiya, bank və sığorta, inşaat, nəqliyyat, qida, yüngül sənaye (tekstil), səhiyyə kimi sahələrdə uğurlu fəaliyyət fəaliyyət göstərib.
Azərbaycan isə Türkiyəyə investisiya qoyuluşuna görə, Mərkəzi Asiya və Qafqaz ölkələri arasında ilk yerdədir. İki ölkə arasında birgə investisiya fondunun təsis edilməsi, dövlət-özəl tərəfdaşlığı çərçivəsində birgə texnologiyanın transferinin həyata keçirilməsi və istehsalın lokallaşdırılmasını nəzərdə tutan iri müəssisə və layihələrin reallaşması investisiya həcminin dinamik artımını, qarşıda duran vəzifələrin icrasının sürətləndirilməsini şərtləndirir.
Hazırda Türkiyədə Azərbaycan sərmayəli 2 minə yaxın şirkət fəaliyyət göstərir. 1995-2021-ci illər ərzində respublikamızdan Türkiyəyə yatırılan birbaşa investisiyaların həcmi 20,3 milyard ABŞ dolları (17,1 milyard ABŞ dolları neft-kimya sektoruna, 3,2 milyard ABŞ dolları qeyri-neft sektoruna) olub.
Yeri gəlmişkən, SOCAR-ın 2018-ci ilin sentyabr ayında 6,3 milyard dollar kapitalla Türkiyənin İzmir şəhərinin Əliağa rayonunda “Petkim” neft-kimya kompleksinin ərazisində inşasını tamamlayaraq istifadəyə verdiyi “Star” neft emalı zavodu qardaş ölkəyə birdəfəlik yatırılan ən böyük investisiya hesab olunur. Ümumilikdə, Türkiyədə investisiya qoyan azərbaycanlı iş adamları həm firma sayı, həm də investisiya həcmi baxımından Mərkəzi Asiya və Qafqaz ölkələri arasında ilk yerdədir.
İqtisadi əlaqələrin digər önəmli sahəsi kimi, nəqliyyat-logistika qovşaqlarının şaxələnməsi ölkəmiz və qardaş respublikanın iqtisadi inkişafı ilə yanaşı, regionda sülhün və rifahın bərqərar olmasını təmin edir. 2020-ci ildə Bakı-Tbilisi-Qars dəmiryolu üzərində daşınan yüklərin həcminin iki dəfədən çox artması nəqliyyat-kommunikasiya istiqamətində keçirilən birgə layihələrin səmərəliliyinin bariz nümunəsidir.
Zəngəzur dəhlizinin açılması və Naxçıvana dəmiryolunun çəkilməsi nəticəsində Azərbaycan və Türkiyə arasında idxal-ixrac, habelə tranzit əməliyyatları da artacaq. Şübhəsiz ki, bu zaman nəqliyyat və daşınma xərcləri və müddəti azalacaq, eləcə də iqtisadi-ticari əlaqələrin miqyası genişlənəcək. Bununla da hər iki dövlətin xarici ticarət dövriyyəsi dinamik şəkildə sürətlənəcək.
Qardaş Türkiyənin Azərbaycan iqtisadiyyatının güclənməsində müstəsna fəaliyyəti bununla kifayətlənmir. Türk iş adamları tərəfindən işğaldan azad edilmiş torpaqlarımızda reinteqrasiya və reabilitasiya prosesində əhəmiyyətli layihələr həyata keçirilir. Hazırda türk şirkətləri Yuxarı Qarabağ və Kəlbəcər-Laçın iqtisadi rayonlarında infrastruktur layihələrinin reallaşmasında, yolların çəkilməsində, sənaye, kənd təsərrüfatı müəssisələrinin qurulmasında, turizm obyektlərinin yaradılmasında fəal iştirak edirlər.
Nəhayət, ötən illər ərzində Azərbaycan–Türkiyə iqtisadi münasibətlərində regional iqtisadi əməkdaşlıq sahələri də daim diqqət mərkəzində saxlanılır. İki dövlətin birgə həyata keçirdikləri fəaliyyətin nəticəsi olaraq, beynəlxalq əhəmiyyətli bir sıra regional layihələr Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, Trans-Anadolu qaz boru xətti, Trans-Adriatik boru xətti və Bakı-Tbilisi-Qars dəmir yolu xətti layihələri bu baxımdan ən ümdə nümunələrdir.
V.BİNYƏTOĞLU, “Xalq qəzeti”