İdmançılar 1 həftə burada təlim-məşq keçdilər
Azərbaycan Gimnastika Federasiyası regionlarda və müxtəlif gimnastika bölmələrində bu idman növünün inkişafı istiqamətində fəaliyyətini davam etdirir. Paytaxtda bədii gimnastika üzrə bölgə təmsilçilərinin və müxtəlif klubların gimnastlarının mərhələli şəkildə məşqləri də bu məqsədə xidmət edir.
Bu dəfə Milli Gimnastika Arenasının məşq zalı Zirə Mədəniyyət Mərkəzi və Naxçıvan Olimpiya İdman Kompleksi bədii gimnastika bölməsinin üzvlərinin ixtiyarına verilmişdi. 2010–2015-ci il təvəllüdlü gimnastların qatıldığı təlim-məşq toplanışında gənc idmançılar təcrübəli məşqçilərin rəhbərliyi altında gürzlər, top, halqa, lentlərlə müxtəlif gimnastika və rəqs hərəkətləri ediblər.
Naxçıvanda bədii gimnastika məşqçisi Humay Qafarova yetirmələrinin artıq ikinci dəfə belə toplanışda iştirak etdiklərini bildirdi:
– Biz 4 yeni idmançı gətirmişdik. Burada məşq keçməyin nə qədər faydalı olduğunu və idmançılara nə verəcəyini bilirdik. Gözəl atmosfer var idi. Məşqlərin mütəmadi olaraq təşkil olunması gimnastların beynəlxalq və yerli yarışlarda uğurlarının artmasına kömək edəcək. Milli federasiyaya dəvət üçün təşəkkür edirik.
“Zirə”nin bədii gimnastika məşqçisi Nəzirəxanım Fəradova bədii gimnastika bölmələrinin 2015-ci ildən fəaliyyətə başladığını dedi. O bildirdi ki, gimnastlar artıq bir sıra uğurlara da nail olublar:
– Biz ilk nəticələrə nail olmuşuq, bir neçə qız yığmaya cəlb edilib. Bakı toplanışına 7 gimnastla qatılmışdıq. Məşqlər çox yaxşı getdi. Gimnastlarımız təlimlərdə böyük maraq və həvəslə iştirak edirdilər. Ötən il komandamız ölkə birinciliyində və Naxçıvandakı beynəlxalq turnirdə uğurla çıxış edərək mükafatlar qazanıblar.
N.Fəradova belə gözəl kompleksdəki məşqlərin qızların xeyrinə olacağını da sözlərinə əlavə etdi:
– Onlar yeni kompozisiyalar üzərində çalışır, hərəkətləri təkmilləşdirirdilər. Federasiyaya dəvət üçün təşəkkür edirik.
Azərbaycan Gimnastika Federasiyasının təşkil etdiyi bu layihə təkcə Bakıdan mütəxəssislərin rayonlara səfərləri və master-klasların təşkilini deyil, həm də ölkənin müxtəlif bölgələrindən perspektivli idmançıların paytaxta toplanışa dəvət olunmasını nəzərdə tuturdu.
Gimnastikanın inkişafı çərçivəsində bölgə gimnastları mütəmadi olaraq Bakıda keçirilən təlim-məşq toplanışlarında iştirak edirlər. Ötən ilin noyabr ayında Gəncə, Masallı, Lənkəran, Kürdəmir, Şirvan, Abşeron, Ağdaşı təmsil edən bədii gimnastlar Milli Gimnastika Arenasının qonağı olublar. Bu il Qax Olimpiya İdman Kompleksi, Zaqatala Talaçay Kompleksinin gimnastları burada məşq keçiblər.
Fevral ayında isə Şəmkir, Oğuz, Qəbələ, İsmayıllı, Göyçay, Sumqayıt, Qusar, Xaçmaz, Goranboy, Şamaxı, Zabrat, Hövsan, Şağan, Zaqataladan (“OcaqSport” Klubu) olan gimnastlar Milli Gimnastika Arenasında təlim-məşqlərə cəlb olunacaqlar.
Leyla QURBANOVA
XQ
