Qəzetimizin 7 noyabr 2023-cü il tarixli nömrəsində dərc olunmuş “Kəpəz”i batıranlar kənarda təqsirkar axtarırlar” sərlövhəli tənqidi yazı futbol ictimaiyyəti arasında geniş əks-səda yaradıb. “Kəpəz” PFK İB-nin İdarə Heyətinin iclasında isə həmin yazı ciddi müzakirə edilib. Klub rəhbərliyində təmsil olunanlar göstərilən fikirlərlə bağlı araşdırmaların aparılmasını aidiyyəti üzrə müvafiq şəxslərə tapşırıb, bu yöndə göstərişlər veriblər. 

İdman qurumunun idarə heyətinin sədri İlqar Nadirinin bu barədə redaksi­yamıza göndərdiyi cavab məktubunda bildirilir:

– Yazıda ünvanımıza deyilən tənqidi fikirlərin müəyyən bir qisminin həqiqətən “Kəpəz” futbol klubunun fəaliyyətində mövcud olduğu təsdiqini tapdı. Belə halla­rın gələcəkdə baş verməməsi, təkrarlan­maması üçün tədbirlər görülür. 

Nəzərinizə çatdıraq ki, komandanın uğursuz çıxışı ilə bağlı baş məşqçi Azər Məmmədovun istefası qəbul olunub və o, klubdan ayrılıb. Komandanın baş məşqçi­liyi vaxtilə klubda çalışmış Adil Şükürova tapşırılıb, onunla iki illik müqavilə imza­lanıb. Əvvəlki heyətdəki mütəxəssislərin faəliyyətinə son verilib. Daxili nizam-inti­zam qaydalarını pozanlar, neqativ halla­ra yol verənlər klubdan uzaqlaşdırılıblar. Bəzilərinə son xəbərdarlıqlar edilib. Məsul əməkdaşlara fəaliyyətlərini günün tələblə­ri səviyyəsində qurmaları tapşırılıb. 

Gəncə Futbol Akademiyasının direk­toru Cabir İbrahimov klubda icraçı direktor təyin olunub, onun səlahiyyətləri artırılıb. Şəhər stadionunun yenidən qurulması işi uğurla davam etdirilir və artıq söküntü iş­ləri başa çatmaq üzrədir. Qısa bir müddət­də müasir bir stadionun tikilib istifadəyə verilməsi Gəncədə futbolun inkişafına daha da təkan olmaqla, on minlərlə azar­keşi sevindirəcək. 

Gəncə şəhər stadionu ərazisində, "Kəpəz" klubunun bazasında Gəncə Fut­bol Akademiyası təşkil edilməsi regionu­muzda futbolun inkişafı üçün zəmin ya­radıb. Futbol akademiyasının yeni binası müasirliyinə görə göz oxşayır, hərtərəfli təchizatı ilə fərqlənir. Bu tikili Qərb bölgə­sində ən mühüm idman obyektlərinin, ba­zaların sırasında yer alıb. Tezliklə açılışı reallaşacaq akademiya müxtəlif yaş qrup­larından ibarət komandaların ixtiyarına veriləcək, burada yüzlərlə futbolçu sevimli idman növü ilə ən yaxşı şəraitdə məşğul ola biləcək. 

Akademiya ilə yanaşı, stadionda məşq mərkəzi üçün meydanlar hazırla­naraq istifadəyə verilib. Standart ölçülərə malik meydançalardan ikisi təbii, biri sü­nidir. Hazırda komandalar məhz burada məşq edib, oyunlara çıxırlar.

Məlumat üçün bildiririk ki, hazırda premyer liqada olan 10 klubdan yalnız “Kəpəz”in sponsoru yoxdur. Bu da klubun fəaliyyətinə, komandanın stabil oyna­masına mənfi təsir göstərir. Lakin bütün bunlara baxmayaraq, hazırda “Kəpəz” mübariz əhval-ruhiyyədədir. Biz bütün qü­vvəmizi Azərbaycanın ikinci böyük şəhəri olan Gəncə klubunun normal fəaliyyəti üçün səfərbərliyə almışıq.

XQ