Dünya çempionatında tarixi nəticə
Səudiyyə Ərəbistanının paytaxtı Ər-Riyadda keçirilən dünya çempionatında uzun fasilədən sonra 3 medal qazanan Azərbaycan ağırlıqqaldıranı Dadaş Dadaşbəyli Vətənə qayıdıb. İdmançını Heydər Əliyev Beynəlxalq Aeroportunda yaxınları, federasiya rəsmiləri və idman ictimaiyyətinin nümayəndələri qarşılayıblar.
Dadaş Dadaşbəyli jurnalistlərə müsahibə verərək yarış təəssüratlarını bölüşüb:
– “Qazandığım nailiyyət Azərbaycan ağır atletikasında son illərin ən böyük uğurudur. Dünya çempionatı karyeram ərzində iştirak etdiyim ən güclü turnirdir. Bu yarışdan medalsız dönmədiyimə görə çox sevinirəm. Bu, ölkəmiz üçün, xüsusən də ağırlıqqaldırma üçün böyük uğurdur.
İdmançı başda Gənclər və İdman Nazirliyi olmaqla, Azərbaycan Ağır Atletika Federasiyasına, məşqçilərə, bu uğurun əldə edilməsində əməyi keçən hər kəsə minnətdarlığını bildirib. Turnirə çox ciddi hazırlaşdığını, təlim-məşqlərdə böyük səy göstərdiyini vurğulayan atlet bundan sonra əsas hədəfin Olimpiya Oyunlarında iştirak etmək olduğunu deyib:
– “Dünya çempionatının mükafatını qazanmağı qarşıya məqsəd qoymuşdum. Aylarla evə getməyib fasiləsiz məşqləri davam etdirirdim. Rəqiblərimin də çox güclü olması məni qətiyyən qorxutmurdu. Sona qədər mübarizə apararaq medal əldə etdim. İndi əsas hədəf Paris Olimpiadasında iştirak etməkdir. Bunun üçün bütün səylərimi toplayacağam.
Ağırlıqqaldırma üzrə Azərbaycan millisinin baş məşqçisi Emil Əliyev Dadaş Dadaşbəylinin böyük potensiala malik olduğunu vurğulayıb:
– “Dadaş Azərbaycanda ağırlıqqaldıranların hazırkı lideridir. Çox güclü idmançıdır. Qarşıya qoyduğu hədəfə çatmaq üçün öz üzərində səylə çalışır. Güclü potensiala malikdir. Onun rəqibləri arasında Olimpiya və dünya çempionu olan idmançılar var idi. Şübhəsiz, belə idmançılarla mübarizə aparmaq çox çətindir. Bütün bunlara baxmayaraq, təmsilçimiz qarşıdakı çətinlikləri dəf edərək tarixi nəticəyə imza atdı. Əminik ki, idmançımız gələcəkdə də ona bəslənilən ümidləri doğruldacaq. Sevinirik ki, dünya çempionatında öz sözümüzü dedik. Bundan sonrakı sınaqlarda da yeni nailiyyətlər əldə etmək üçün böyük səylə çalışmalıyıq”.
Qeyd edək ki, 109 kq çəki dərəcəsində çıxış edən idmançı birdənqaldırmada 180, təkanlaqaldırmada 223 kiloqramı başı üzərinə qaldırıb, hər iki hərəkətdə üçüncü yeri tutub. Toplam 403 kq (180+223) nəticə göstərən Dadaş Dadaşbəyli dünya çempionatının yekun sıralamasında da 3-cü nəticə göstərib.
Xatırladaq ki, sonuncu dəfə ağırlıqqaldırma üzrə dünya çempionatında Azərbaycana medalı 2015-ci ildə Boyanka Kostova (qızıl medal) qazandırmışdı.
Leyla AZAD
XQ