Türkiyədə Ramazan bayramı ilə əlaqədar doqquzgünlük tətildən qısa müddət sonra hakim Ədalət və İnkişaf Partiyası (AK Parti) Novruzun ölkədə rəsmi bayram olmasına dair qanun layihəsinin hazırlanmasına başlamağı planlaşdırır.
AZƏRTAC xəbər verir ki, bu barədə “Cümhuriyet” qəzeti partiyadakı mənbələrə istinadla məlumat yayıb.
Nəşr xatırladır ki, bu təşəbbüs daha əvvəl Prezident Rəcəb Tayyib Ərdoğan tərəfindən irəli sürülüb. O, Novruzun Türk dünyası üçün ortaq bayram olmasının vacibliyini vurğulamışdı.
Qəzetin yazdığına görə, qanun layihəsi AK Parti sədrinin türk dövlətləri ilə əlaqələrə cavabdeh olan müavini Kürşat Zorlunun rəhbərliyi ilə hazırlanacaq.
“Cümhuriyet” yazır ki, partiya bu bayramın türk xalqlarının mədəni yaxınlaşmasına yeni töhfə olacağına əmindir.
Ramin Abdullayev
AZƏRTAC -ın xüsusi müxbiri
Ankara
