Gürcüstanda yeni, müstəqil Regional İnkişaf Nazirliyi yaradılacaq.

AZƏRTAC xəbər verir ki, bu barədə Gürcüstanın Baş naziri İrakli Kobaxidze bu gün keçirdiyi mətbuat konfransında bildirib.

Onun sözlərinə görə, yeni qurumda nazir vazifəsini Dövlət Təhlükəsizlik Xidmətinin sabiq rəisi Qriqol Liluaşvili icra edəcək.

Hökumət başçısının sözlərinə görə, yeni nazirliyin ən mühüm missiyalarından biri regional inkişafla bağlı fəaliyyətlərin maksimum səmərəliliyini və qənaətliliyini təmin etmək olacaq.

“İqtisadiyyatın inkişafı ilə yanaşı, yerli özünüidarəetmə büdcələri əhəmiyyətli dərəcədə artıb, Tbilisi istisna olmaqla, onların ümumi məbləği 4 milyardı ötüb. Bu, bir tərəfdən, yerli özünüidarəetmə orqanlarının cəmiyyət üçün əhəmiyyətli layihələri həyata keçirmək imkanlarını artırır, digər tərəfdən isə müvafiq vəzifələrin icrası ilə bağlı yeni problemlər yaradır. Beləliklə, regional inkişafın səmərəli planlaşdırılması və monitorinqi ölkənin bərabər inkişafı üçün xüsusi əhəmiyyət kəsb edir. Nazirlik regional inkişafla bağlı tədbirlərin maksimum səmərəliliyini təmin edəcək”, - deyə Baş nazir bildirib.

Xətayi Əzizov

AZƏRTAC-ın xüsusi müxbiri

Tbilisi