XIX əsrdə kompüterlərin və proqramlaşdırmanın olmadığı bir vaxtda ilk proqramı qadın riyaziyyatçı Ada Lavleys yaradıb.
Əsl adı Augusta Ada Bayron olan, dünyada isə Ada Lavleys kimi tanınan bu tarixi şəxsiyyət 1815-ci ildə Londonda məşhur ingilis şairi Corc Qordon Bayronun ailəsində doğulub. 1 aylıq olanda atası ailəni, eləcə də İngiltərəni tərk edib. Kiçik yaşlarında o, anası tərəfindən riyaziyyat və məntiq fənlərinə yönləndirilib. Lavleys uşaq yaşlarından görmə qabiliyyətini zəiflədən şiddətli baş ağrılarından əziyyət çəkib. 1829-cu ilin iyununda qızılca xəstəliyindən sonra iflic olub. Yalnız 1831-ci ildə qoltuqağacı ilə yeriməyə başlayan qızcığazdan həkimlər belə ümidlərini kəsdikləri halda, o özü həvəsdən düşməmiş, riyaziyyata marağı günü-gündən artmışdır.
Ada XIX əsrin ən məşhur elm alimlərindən olar Villiam Frend, Villiam Kinq, Mary Somerville, Augustus De Morqan kimi müəllimlərdən dərs alıb.
1835-ci ildə Baron Villiamla ailə quran və 3 uşaq anası olan Ada elm sahəsində də uğurlarını davam etdirib.
Həyatında ən uğurlu məqam isə 18 yaşda ikən Cambridge universitetinin alimi Charles Babbage ilə tanış olmasıdır. O, xüsusilə bu alimin Analitik Mühərrik üzərindəki işi ilə maraqlanıb. Charles Babbage Adanın fransızcadan tərcümə etdiyi elmi məqalələri çox bəyənmiş, ondan öz məqalələrini də buraya əlavə etməsini istəmişdi. Amma Adanın özünün yazdığı məqalələr tərcümə etdiklərindən 3 dəfə çox olub. Riyazi hesablamalardan bəhs edən bu məqalələr indiki proqramlaşdırmanın təməli sayılır.
Ada Lavleys 1852-ci ildə xərçəng xəstəliyindən dünyasını dəyişib.
L.QURBANOVA
XQ