Parlament xəbərləri

post-img

Hüquq fakültəsinə 75 nəfər qəbul olunur, 100 nəfər bitirir

Milli Məclisin deputatı Musa Qasımlı parlamentdə “Ali təhsil haqqında” qa­nun layihəsi ilə bağlı keçirilən ictimai dinləmədə çıxışı zamanı bəzi univer­sitetlərdəki özbaşınalığı tənqid edib: “Harada görünüb ki, bir universitetin, məsələn, hüquq fakültəsinə 75 nəfər qəbul olunsun, amma 100 nəfər bitir­sin? Biz necə edək ki, universitetlərə qəbul hamı üçün əlçatan olsun və key­fiyyətli kadrlar hazırlansın? Dünyanın heç bir yerində belə şey yoxdur. Biz kimi aldadırıq? İrəli getmək üçün təhsilimizi sağlamlaşdırmalıyıq” .

İcazəsiz tikilmiş evlər sənədləşdirilməlidir

Milli Məclisin plenar iclasında Nazir­lər Kabinetinin 2022-ci ildəki fəaliyyə­tinə dair hesabatın müzakirəsi zamanı Əmək və sosial siyasət komitəsinin səd­ri Musa Quliyev deyib: “Müvafiq icazə olmadan tikilən fərdi yaşayış evlərinin sənədləşdirilməsi vacibdir. Belə evlərin sayı, təxminən, 500 mindən çoxdur. Neçə illərdir ki, bu məsələ Milli Məc­lisdə qaldırılır, hökumət qərarlar qəbul edir. Hətta cənab Prezidentin bu barədə tapşırığı var. Ancaq problem hələ də öz həllini tapmayıb. Bu da ciddi narazılıq yaradır”. 

AMEA-nın cəmiyyətdə nüfuzu zəifləyib

“Çox təəssüf ki, son illər AMEA-nın cəmiyyətdə nüfuzu xeyli aşağı düşüb. Bu fikri Milli Məclisin Səhiyyə komitəsi­nin sədri Əhliman Əmiraslanov bildirib. O deyib ki, bunun səbəbi elm sahəsin­də böyük uğurlar əldə etməyən insan­ların bu və ya digər strukturlara cəlb olunmasıdır: “Ümid edirəm ki, görülə­cək işlər AMEA-nın nüfuzunun qaytarıl­masına öz müsbət təsirini göstərəcək. Bir iradım da elmi-tədqiqat institutlarının tabeçiliyinin dəyişdirilməsidir. Hesab edirəm ki, bu dəyişiklik onların fəaliy­yətinə, yüksək ixtisaslı kadrların işinə mənfi təsir etməməlidir”.

Yeni gələn rəhbər köhnələrlə üzülüşür

Deputat Siyavuş Novruzov parla­mentin iclasında hökumətin hesabatının müzakirəsi zamanı deyib ki, həm yerli, həm də mərkəzi icra hakimiyyətlərində hansısa dəyişiklik olanda, ilk növbədə, kadr islahatına başlanılır: “ Hansısa qurumda uzun müddət işləyən, kifayət qədər təcrübəli insanları vəzifəyə gələn kimi işdən çıxarırlar. Bunun səbəbi odur ki, həmin yerə yeni rəhbər gəlib. İşdən çıxarılan adam nə ölkəsinə xəyanət edib, nə rüşvətxorluqla məşğuldur. İl­lərini bir işə sərf edən gözləyir ki, onu işində irəli çəkəcəklər, ancaq yeni gələn rəhbər onu işdən çıxarır. Kadrların qo­runması işi vacibdir”.

Küçələrə şəhidlərin adı verilsin

Deputat Qənirə Paşayeva hökumə­tin hesabatının müzakirəsi zamanı de­yib ki, şəhidlərimizin adları əbədiləşdiril­məli, onların adları yaşadıqları küçələrə verilməlidir: “Təəssüf ki, Bakıda və res­publikamızın ayrı-ayrı rayonlarında do­ğulmuş bir sıra şəhidlərin adları hələ də əbədiləşdirilməyib. Bunun üçün imkan­lar, boş küçələr çoxdur. Elə küçə adları var ki, nəyi ifadə etdiyini, ümumiyyətlə, anlamaq olmur. Məsələn, şəhidimizin Binəqədidə yaşadığı küçənin adı “İzvid­noy” adlanır. Bu nə deməkdir?! Heç kim başa düşmür. Bunun kimi bir çox adlar var – “Xutor”, “Sallaqxana”, “Vorovski” və s. saymaqla bitməz. Bu məsələyə baxılmalı, küçələrə şəhidlərimizin adları verilməli, əbədiləşdirilməlidir”.

Müəllim və həkimlər 70 yaşadək işləyə bilərlər

Komitə sədri Əhliman Əmiraslanov bildirib ki, rayonlarda xeyli vakant yer­lər var. Bunu nəzərə alaraq həkim və müəllimlərin işçi kimi saxlanılması üçün təqaüd yaş həddinin 70 ilə qədər artı­rılması məqsəduyğun olardı. 

Həkim və müəllimlərin işçi kimi saxlanılmasında 65 yaş həddi ilə bağlı məsələyə yenidən baxılması vacibdir.

Dərmanların qiyməti aşağı salınmalıdır

Komitə sədri Musa Quliyev: “Vətən­daşların dərman təminatına əlçatanlığı­nın yaxşılaşdırılması, dərmanların qiy­mətinin aşağı salınması və keyfiyyətinin yüksəldilməsi istiqamətində təcili tədbir­lər görülməlidir”. 

 

Hazırladı: Əliqismət BƏDƏLOV, “Xalq qəzeti”

Son xəbərlər