Yeni dərs ilinin başlamasına bir gün qalır. Sen-tyabrın 16-da məktəblər qapılarını şagirdlərin üzünə açacaq. Bəs, ümumtəhsil müəssisələrinin yeni tədris ilinə hazırlığı necə gedir? 

Sentyabrın 10-da Bakı şəhəri təhsil işçilərinin sentyabr konfransı keçirilib. Konfransda nazir Emin Əmrullayev, ali məktəb rektorları, millət vəkilləri, Elm və Təhsil Nazirliyi yanında yaradılmış müvafiq qurumların əməkdaşları, ictimaiyyət nümayəndələri, məktəb direk­torları, məktəbəqədər və məktəbdənkənar təhsil müəssisələrinin rəh­bərləri, müəllimlər və KİV nümayəndələri iştirak ediblər. Nazir Emin Əmrullayev ötən tədris ilində əldə olunan nailiyyətlərdən, aparılan təhsil islahatlarından, mövcud problemlər və onların həlli üçün atı­lan addımlardan söz açıb, perspektivdə nəzərdə tutulan məsələlərdən, yeni tədris ilinin əsas hədəflərindən bəhs edib.

Konfransda bildirilib ki, məktəbəqə­dər təhsildə əhatəliliyin artırılması, ümu­mi tədrisin keyfiyyətinin yüksəldilməsi, rəqəmsal səriştələrin inkişaf etdirilməsi və digər istiqamətlər əsas hədəflər sırasın­dadır. Panel müzakirələr zamanı metodik xidmətin təşkili, dərsliklərin məzmunu, inklüziv təhsil, məktəb-valideyn münasi­bətləri, tədrisin təşkili, məktəb idarəetmə­sində səmərəliliyin artırılması, buraxılış və qəbul imtahanlarındakı yanaşmalar və digər mövzuların aktuallığına toxunulub. Konfrans iştirakçılarının fikir və tövsiyələ­ri dinlənilib, onları maraqlandıran suallara cavab verilib.

Bakı Şəhəri üzrə Təhsil İdarəsindən aldığımız məlumata görə, yeni tədris ilin­də qurumun tabeliyində fəaliyyət göstərən ümumtəhsil müəssisələrində, ümumilikdə, 513 min 698 şagirdin təhsil alacağı gözlə­nilir. BŞTİ-nin tabeliyindəki məktəblərin I sinfində 46 min 98, IX sinfində 44 min 233, X sinfində 35 min 757, XI sinfində 32 min 260, XII sinfində isə 156 şagird oxu­yacaq. Məktəbəqədər təhsil müəssisələrinə isə 45 min 201 uşağın, məktəbəhazırlıq qruplarına 29 min 216 beşyaşlının cəlb olunacağı gözlənilir. 

Yeni tədris ilində paytaxt məktəblə­rində 29 min 400 müəllim, məktəbəqədər təhsil müəssisələrində isə 4 min 830 tər­biyəçi-müəllim çalışacaq. Xatırladaq ki, BŞTİ-nin tabeliyində 698 təhsil müəssisəsi fəaliyyət göstərir. Onlardan 342-si məktə­bəqədər təhsil müəssisəsi, 327-si ümumi təhsil, 3-ü xüsusi tipli ümumi orta məktəb, 5-i əyani-qiyabi axşam məktəbi, 12-si in­ternat tipli müəssisə, 9-u isə məktəbdənkə­nar müəssisədir. 

Dərs ilinin başlanması ilə əlaqədar məktəbli forma və ləvazimatlarının satışı­nın həyata keçirildiyi mağazalara da baş çəkdik. Bu məhsullara tələbat xeyli artıb. Qiymətdən və məhsulun keyfiyyətindən razı olanlar da, olmayanlar da var. Paytaxt sakini Xədicə Quliyeva qiymətlərdən razı olduğunu bildirsə də, üç uşaq atası Orxan Abışov qiymətlərin baha olmasından gi­leyləndi. 

Satıcılar da bəzi məhsulların, xüsusilə, kağız ləvazimatlarının qiymətində artımın olduğunu dedilər. Qiymətlərə gəlincə, bu rəqəm çantalarda 20–80 manat arasında dəyişir. Dəftərlər 20 qəpik – 2 manat, sadə karandaşlar 10 qəpik – 2 manat, rəsm al­bomları 1– 3 manat, sadə qələmlər 10 qə­pik –1 manat, rəngli karandaşlar 1– 8 ma­nat, pozanlar 20 – 70 qəpik, qələmyonanlar 15 qəpik – 1 manat 40 qəpik, xətkeşlər 20 qəpik – 3 manat, plastilinlər 1 manat 50 qəpik – 6 manat, fırçalar 30 – 60 qəpik in­tervalında qiymətlərlə satılır.

Məktəbli formalarının qiymətləri, təx­minən, keçənilki ilə eynilik təşkil edir. Yeri gəlmişkən, Məktəbəqədər və Ümumi Təhsil üzrə Dövlət Agentliyinin Ümumi təhsilin təşkili şöbəsinin müdir müavini Nurlan İsmayılbəyli məktəbli formaları ilə bağlı valideynlərə çağırış edib: “Valideyn­lər məktəbli formaları ilə bağlı təhsil ocaq­ları ilə əlaqə saxlasınlar. Xüsusilə, övladı 1-ci sinfə gedən valideynlər həm Dövlət Agentliyi, həm də məktəblərlə əlaqə sax­laya bilərlər”.

Yeni dərs ilinin başlanmasını valideyn­lər ciddi hazırlıqla qarşılayırlar. Paytaxt sa­kini Bəsirə Sadıqova dedi ki, məktəblərin açılması onu da sevindirir: “Məktəb üçün lazım olan hər şeyi almışıq. Uşaqların hər gün dərsə gedib-gəlməsi həm də nizam-in­tizam vərdişlərinə yiyələnmək baxımından önəmlidir”.

Ümumi təhsil müəssisələrində 2024–2025-ci tədris ilinin təşkili barədə elm və təhsil naziri əmr imzalayıb. Əmrə əsasən, ümumi təhsil müəssisələrinin II-XI siniflə­rində ilk dərs “Yaşıl dünya naminə həm­rəylik” mövzusuna həsr olunacaq.

Baş Dövlət Yol Polisi İdarəsindən XQ-yə bildirildi ki, yeni dərs ilinin baş­lanması təhsilalanların, xüsusilə, uşaq və yeniyetmələrin yol hərəkəti ilə bağlı hə­yat və sağlamlıqlarının qorunması işində daha kəsərli tədbirlərin görülməsini tələb edir. Daxili İşlər Nazirliyinin göstərişinə əsasən, bu sahədə həyata keçirilən qabaq­layıcı tədbirlərin effektivliyinin artırılması məqsədilə cari ilin sentyabr ayının 10-dan oktyabr ayının 10-dək respublika ərazi­sində təhlükəsizlik aylığının keçirilmə­sinə başlanılıb. “Diqqət, uşaqlar!” devizi altında keçiriləcək tədbirlər çərçivəsində təhsilalanların iştirakı ilə baş verə bilə­cək yol qəzalarının qarşısının alınması istiqamətində nəzarət-profilaktik tədbirlə­rin gücləndirilməsi, təhsil müəssisələrinin yerləşdiyi ərazilərdə yol şəraitinin müəy­yən edilməsi, çatışmazlıqların aradan qal­dırılması, xüsusilə, maarifləndirmə və tər­biyəvi-təbliğat xarakterli işlərin görülməsi nəzərdə tutulur.

Rizvan FİKRƏTOĞLU
XQ