Laçında peşə yarmarkası
Dövlət Məşğulluq Agentliyi işğaldan azad olunmuş ərazilərimizdə ilk dəfə olmaqla Laçında “Laçında peşə öyrən!” adlı peşə yarmarkası keçirib. Yarmarka Azərbaycan Prezidentinin xüsusi nümayəndəliyinin dəstəyi ilə təşkil olunub.
Mərasimdə Məşğulluq Agentliyi İdarə Heyəti sədrinin müavini Ülvi Abasquliyev, Prezidentin Laçın rayonunda xüsusi nümayəndəliyinin rəsmisi Hüseyin Quliyev, işəgötürənlər və tədris müəssisələrinin nümayəndələri iştirak ediblər.
Peşə yarmarkasında Laçın şəhəri və Laçının Zabux kəndi əhalisinə rayonda fəaliyyət göstərən 15-ə yaxın işəgötürən tərəfindən 40-dan çox peşə istiqaməti təqdim olunub, ustad dərsləri keçirilib. Yarmarkaya qatılan şəxslərə peşələr və həmin istiqamətlər üzrə tədrisin həyata keçirildiyi müəssisələr barədə məlumat verilib. Bildirilib ki, agentlik işğaldan azad olunmuş ərazilərimizin sakinləri üçün peşə kurslarının təşkili işlərini davam etdirir. Kurslara cəlb edilən şəxslərə əmək bazarının tələblərinə uyğun peşələr üzrə bilik və bacarıqlar öyrədilir. Kursları bitirənlər işlə təmin olunurlar.
Yarmarka çərçivəsində, həmçinin “Azərsun Holdinq”in milli markası olan “Azerçay” ilə birgə “Doğma Laçında Çay Festivalı” adlı korporativ sosial məsuliyyət layihəsi də həyata keçirilib. İştirakçılar üçün çay sərgisi, milli mətbəx guşəsi təşkil edilib. Mərasim konsert proqramı ilə davam edib
“Rehabus” xidməti
Dövlət Tibbi-Sosial Ekspertiza və Reabilitasiya Agentliyinin 2022-ci ildən icrasına başladığı “RehaBus” (Reabilitasiya Avtobusu) layihəsi çərçivəsində əlil olan 1410 nəfərə xidmət göstərilib. Bakı və ətraf ərazilərdə yaşayan əlilliyi olan şəxslərin ambulator və icma əsaslı reabilitasiya xidmətlərinə əlçatanlığını artırmağa xidmət edən layihə həmin şəxslərin müvafiq reabilitasiya müəssisəsinə asan, rahat şəkildə çatmasını təmin edir.
Reabilitasiya avtobusları Bakı və Sumqayıt şəhərlərinin, Abşeron rayonunda əvvəlcədən təyin edilmiş gözləmə məntəqələrindən əlil uşaqları (onları müşayiət edən yaxınları ilə birgə) götürərək Bakı şəhərindəki 2 saylı Uşaq Reabilitasiya Mərkəzinə çatdırır. Prosedurlar bitdikdən sonra onlar həmin avtobusla geri qaytarılırlar.
“Qadın, texnologiyalar və innovasiyalar”
“INNOLAND” İnkubasiya və Akselerasiya Mərkəzində Beynəlxalq "İKT-də Qızlar Günü" ilə bağlı “Qadın, Texnologiyalar və İnnovasiyalar” adlı forum keçirilib. Mərasim “Könüllü DOST” proqramı və “ASAN Könüllüləri” Təşkilatı tərəfindən “INNOLAND” İnkubasiya və Akselerasiya Mərkəzinin və DOST Rəqəmsal İnnovasiyalar Mərkəzinin tərəfdaşlığı, ASAN Radio və DOST TV-nin media dəstəyi ilə təşkil olunub.
Forumda “Könüllü DOST” proqramına və “ASAN Könüllüləri” təşkilatına üzv olan 70-dən çox xanım könüllülər iştirak ediblər. Tədbir gənc xanım könüllüləri İKT sahəsinə cəlb etmək, onların bu sahədə fəaliyyətini stimullaşdırmaq məqsədi daşıyıb. Forumda Vətəndaşlara Xidmət və Sosial İnnovasiyalar üzrə Dövlət Agentliyinin Layihələrin idarəedilməsi və texnoloji həllər şöbəsinin müdir müavini Aynur Qurbanlı, Dördüncü Sənaye İnqilabının Təhlili və Koordinasiya Mərkəzinin Rəqəmsal İqtisadiyyat şöbəsinin rəhbəri Xəyalə Fətullayeva, “BakuID” investisiya tədbirinin rəhbəri Talifa İsgəndərli, “Zəhra Kosmosda” platformasının təsisçisi, kontent yaradıcısı Zəhra İmanova və “Unibank”ın Digital laboratoriya şöbəsinin back-end üzrə baş mütəxəssisi Süsən Yunisova İKT-də qadınların rolu və şəxsi uğur hekayələri barədə məlumat veriblər.
İKT-də gender bərabərliyinin qadınların hüquq və imkanlarının genişləndirilməsində əsas amillərdən biri olduğu qeyd edilib. İştirakçıların böyük marağına səbəb olan forum sual-cavab sessiyası və “Mədəniyyət Carçısı” proqramının üzvlərinin ifaları ilə yekunlaşdırılıb.
Zərifə BƏŞİRQIZI
XQ
