Qorunma tədbirləri aktuallığını saxlayır

Monqolustanın paytaxtı Ulan-Batorda koronavirusun “EG.5” (“Eris”) variantına yoluxma faktının təsdiqlənməsindən sonra Ümumdünya Səhiyyə Təşkilatı bu barədə geniş açıqlama verib və ölkələri bu məsələni nəzarətdə saxlamağa və lazımı tədbirlər görməyə çağırıb. 

Mütəxəssislərin fikrincə, digər vari­antlarla müqayisədə xəstəliyin ötürülmə yolları, klinik əlamətləri və yaxud müa­licəyə tabe olmağında heç bir fərq mü­şahidə olunmur. Lakin digər variantlarla müqayisədə daha yüksək mutasiya qa­biliyyətinə malik olduğuna görə yoluxdu­ruculuq qabiliyyəti çoxdur. 

Ümumdünya Səhiyyə Təşkilatı tərə­findən “EQ.5” variantı qlobal ictimai səhiyyə qarşısında aşağı riskli olaraq dəyərləndirilib. Buna baxmayaraq, yük­sək risk qrupuna daxil olanlar üçün bu bəyanat qorunma tədbirlərini azaltmaq və diqqətsiz davranmağa əsas olmama­lıdır. Hospitalizasiya riski yüksək olanlar hər zaman müvafiq tədbirlərlə özlərini virusa yoluxmaqdan qorumağa davam etməlidirlər.

Qarşıdan payız ayları gəlir. Bu, o deməkdir ki, təhlükə hələ qarşıdadır, çünki payız aylarında virusa yoluxma sayı daha da artır. EG.5 mutasiyasının öskürək, burun axması, boğaz ağrısı, qızdırma, şiddətli yorğunluq kimi əlamət­ləri var. Əvvəlki dövrdə virusa qarşı aparılan mübarizə tədbirləri yenə aktu­aldır. Əhalinin xeyli hissəsi virusa qarşı peyvənd olunduğuna görə orqanizmdə müəyyən qədər immunitet var. Lakin ko­ronavirusun xarakteri elədir ki, meydana çıxan yeni variantlarda fərqli, bəlli ol­mayan əlamətlər müşahidə olunur. Ona görə də əvvəlki qorunma üsulları ən mü­hüm amillərdən biri olaraq qalır.

Qeyd edək ki, koronavirus daim mutasiyaya uğrayır və onun yeni ştam­larının ortaya çıxması dünya əhalisini narahat edir. ÜST-nın hesabatında son bir ayda dünyada COVID -19-a yoluxan­ların 63 faiz artdığı bildirilir. Təkcə son bir həftədə 1,4 milyon yoluxma halı qeydə alınıb. Yaranmış vəziyyətlə bağlı bəzi ölkələrdə peyvəndləmə və məcburi maska rejiminə keçid nəzərdə tutulub. 

Bəs Azərbaycanda vəziyyət necə­dir? Yeni mutasiyanın ölkəmizə gəlmə təhlükəsi ilə bağlı narahatlıq hiss olu­nurmu? Səhiyyəmiz yeni “qəfil qonağın” gəlişinə hazırdırmı? 

Bu kimi məsələlərə münasibət bil­dirən Səhiyyə Nazirliyinin mütəxəssis - eksperti Vasif Əliyev deyib ki, koron­virusun yeni ştamları immunitetdən ya­yındığı üçün təhlükəli sayılır. Onun söz­lərinə görə, qonşu ölkələrdə “Omicron” ştamının alt variantlarına yoluxma hal­larına rast gəlinir. Hazırda “EG.5”lə ya­naşı, başqa daha bir təhlükəli variant da müşahidə edilməkdədir. Amma yoluxma halları artsa da, xəstəxanalara müraciət­lərin sayı hələ ki, təhlükəli həddə deyil.

Vasif Əliyev əlavə edib ki, bu növ­lərin Azərbaycanda olması ilə bağlı hələlik rəsmi məlumat yoxdur. Amma qonşu ölkələrdə yoluxma varsa, gələ­cəkdə ölkəmizdə də aşkarlanma ehtima­lı istisna deyil. Buna görə də infeksionist vətəndaşları gigiyenik qaydalara əməl etməyə çağırıb. 

Bununla bağlı TƏBİB-ə ünvanla­dığımız sorğuya aldığımız cavabda da ehtiyatlı olmaq tövsiyə edilir. Bildirilir ki, yay mövsümündə xarici ölkələrə səfərlərin artması ilə əlaqədar olaraq COVID-19 virusuna yoluxmaların sa­yının artması gözləniləndir. Müxtəlif ölkələrdən olan şəxslərin hava limanı, təyyarə, kütləvi əyləncə məkanları kimi qapalı yerlərdə bir araya gəlməsi yo­luxmaların artmasına təkan verə, yeni ştamların yayılmasına səbəb ola bilər. Lakin hazırda Azərbaycanda COVID-19-un yeni ştamlarının aşkarlanması faktı təsdiqlənməyib. 

Koronavirus mutasiya etməyə da­vam edir və yeni subvariantlar formala­şır. Bu səbəbdən variantlar ÜST və di­gər ictimai səhiyyə qurumları tərəfindən daim nəzarətdə saxlanılır.

Həmçinin qeyd edilir ki, TƏBİB-in tabeliyindəki xəstəxanalarda hər növ kəskin respirator infeksiyaların müalicə­si üçün zəruri infrastruktur mövcuddur. COVID-19 virusuna yoluxmuş şəxslərin müalicəsi üçün xüsusi ayrılmış Məhəm­mədli modul tipli xəstəxana fəaliyyətini dayandırmayıb. Hazırda koronavirusa yoluxan xəstələr həmin tibb müəssisə­sində müalicə olunurlar.

Qeyd edək ki, Azərbaycanda koro­navirus (COVID-19) infeksiyasına son 1 həftədə 111 yeni yoluxma faktı qeydə alınıb, 26 nəfər müalicə olunaraq sağa­lıb. Virusun yayıldığı vaxtdan indiyədək, ümumilikdə, 832 min 182 nəfər korona­virus infeksiyasına yoluxub. Onlardan 821 min 773 nəfər müalicə olunaraq sa­ğalıb, 10 min 300 nəfər vəfat edib. Ha­zırda tibb müəssisələrində aktiv xəstə sayı 109 nəfərdir.

Zərifə BƏŞİRQIZI, “Xalq qəzeti”