2023-cü ilin iyun ayında xoş xəbər Süleymanlılar və Pənahovlar ailəsinin ürəyini dağa döndərdi. Amerikadan gələn xəbərdə bildirilirdi ki, nəvələri Tansu bu ölkənin Herbert Huver ibtidai məktəbini ABŞ Prezidentinin Təhsildə Müstəsna Mükəmməllik Mükafatı – Sertifikatı ilə başa vurub. Nənələr, babalar bu xəbəri dostları-qohumları ilə sevinclə bölüşdülər.
Balaca Tansunun uğur sevincindən hər evə pay düşdü. Sonra dedilər ki, bu harasıdır, Tansu əlavə 4 sertifikat da qazanıb. 2021–2022-ci illərdə skripka dərsləri öyrənib. Bu il, 4-cü sinifdə oxuyanda məktəbin ictimai fəallar – liderlər klubuna üzv olub. O, ehtiyacı olan insanlara kömək edib, xeyriyyə tədbirlərində iştirak edib. Uşaq Amerika –Azərbaycan Cəmiyyətinin fəal üzvüdür, dəfələrlə ASA tədbirlərində iştirakına görə mükafatlandırılıb. Bəs Tansunun uğurlarının sorağı ABŞ-dan niyə gəlir, bu uşaq okeanın o tayına necə gedib çıxıb?
Öyrəndik ki, 2017-ci ilin avqustunda “Green kard”la Amerikada yaşamaq şansı əldə edən Süleymanlılar ailəsi Azərbaycandan Missuri ştatının Sent Luis şəhərinə köçüb. Hikmət Süleymanlı və Nigar Pənahova ABŞ-a düşən gündən daimi yaşayış yerinin seçiminə xüsusi diqqətlə yanaşıblar. Çünki Bakıdan gedəndə onların ilk övladı Maqsud məktəbli idi. Uşağın hansı dövlət məktəbinə getməsi də məhz ailənin yaşayış yerinə görə seçilirdi. Övladlarının yüksək keyfiyyətli təhsil almaları üçün ailə ABŞ-da Orta Qərbin ən yaxşı məktəblərinin yerləşdiyi Sent Luis dairəsindəki Kleyton şəhərində məskunlaşdı.
Müraciət etdikləri məktəbdə diaspor fəalı Nigar Pənahova oğlunun hələ Bakıda ikən məktəbli olduğunu bildirib. Maqsud qısa müddətdə ingilis dilini öyrənib və məktəbin ən yaxşı şagirdləri sırasına daxil olub. Nigar xanımın sözlərinə görə, məhz burada Maqsud təhsildə böyük uğurlar qazanıb və gələcək nailiyyətləri üçün təməl yaradıb. 2019-cu ilin yayında ailəsi ilə ABŞ-nin Pensilvaniya ştatının Filadelfiya şəhəri ətrafında yerləşən Lənqhorn qəsəbəsinə köçüblər. Maqsud həmin ilin sentyabrından Herbert Huver ibtidai məktəbində oxumağa başlayıb.
Bu gün Tansu ilə bağlı yaşanan sevinc 3 il öncə ailədə əldə edilən uğurun təkrarı imiş. Çünki 2020-ci ilin iyun ayında ailənin sevinci – Tansunun qardaşı Maqsud da Herbert Huver adına ibtidai məktəbi ABŞ Prezidentinin mükafatı ilə başa vurubmuş.
ABŞ-da yaşayan 10 yaşlı azərbaycanlı Maqsud Süleymanlının təhsildə xüsusi müvəffəqiyyətlərinə görə Prezident mükafatı alması xəbəri Azərbaycana gəlib çatanda Maqsudun şəkli qəzetlərin, saytların bəzəyi olmuşdu.
Qeyd edək ki, təhsildə xüsusi müvəffəqiyyətlərə görə Prezident mükafatı əsası 1983-cü ildə qoyulmuş proqram çərçivəsində ABŞ rəhbərinin və təhsil nazirinin adından təqdim edilir. Təhsildə nailiyyətləri ilə fərqlənən ibtidai, orta və yuxarı sinif şagirdləri bu mükafatı ABŞ Orta Məktəb Direktorlarının Milli Assosiasiyası tərəfindən nəzərdə tutulmuş meyarlar əsasında alırlar.
Ailədən öyrəndik ki, Maqsud təkcə öz biliklərinin səviyyəsi və təhsildə qazandığı nailiyyətlərlə fərqlənmir. Valideynləri kimi o da vətənpərvərdir, bacısı Tansu ilə birlikdə müntəzəm olaraq məktəb və digər beynəlxalq, mədəniyyətlərarası festivallarda iştirak edir, orada yaşıdlarına öz ölkəsi Azərbaycanın mədəniyyəti, tarixi və milli mətbəxi haqqında danışırlar.
Azərbaycanlı ailənin övladlarının bilik və bacarığı ABŞ-da belə dəyərləndirilib. Valideynlərin diaspor fəalları olması onlara ölkəmizlə bağlı tədbirlərdə Vətən sevgisi aşılanıb. Harada yaşamasından asılı olmayaraq Azərbaycanı unutmamaq, onun inkişafı, uğuru ilə daim fəxr etmək, qürurlanmaq tövsiyə edilib.
Ailənin ikinci övladı Tansu da ötən 5 ildə qardaşı kimi oxumağa, çalışmağa böyük səy göstərib. ABŞ-yə köçən il– 2017-ci ilin sentyabr ayından Samuel bağçasına gedib. İngilis dilini öyrənib, yeni dostlar qazanıb. 2018-ci ilin mart ayında ata-anası bağçada Novruz tədbiri təşkil edib və Tansu milli geyimdə səhnəyə çıxıb. O, 2018-ci ilin sentyabr ayından Meramek ibtidai məktəbinin 1-ci sinifinə daxil olub. Məktəbdə təşkil edilən beynəlxalq gecələrdə Tansu daim milli geyimdə Azərbaycan mədəniyyətini və mətbəxini təqdim edib. Sent Luisin zooparkını, parklarını və kitabxanasını çox sevir . O, ev pişiyinə isə milli ad qoyub: Duman.
Azərbaycan–Amerika Cəmiyyəti xalqımızın mədəniyyətini, tarixini ABŞ-da təbliğ edir, xüsusən də dövlət bayramlarını və Novruz bayramını diaspor nümayəndələri ilə mütəmadi qeyd edir. Cəmiyyətin sədri Tomris Azəri uşaqların fəaalığını çox bəyənir, əsl vətənpərvər kimi yetişdiklərinə görə onlarla fəxr edir. Uşaqlar Azərbaycanın BMT-dəki səfiri Yaşar Əliyevlə görüşü, onun “Harada yaşamağınızdan asılı olmayaraq qəlbiniz həmişə Vətənlə döyünsün” – öyüdünü unutmurlar.
Tansu təbiəti, heyvanları, oxumağı, bişirməyi, velosiped sürməyi, üzməyi və rəsm çəkməyi çox sevir. Ən çox xoşladığı bayramlar Novruz, Ramazan və “Hallovin”dir. Riyaziyyat və üzgüçülük dərslərində iştirak edir.
Maqsud isə futbol oynamağı sevir, şahmatla məşğul olur və proqramlaşdırma ilə maraqlanır, gələcəkdə kosmonavt olmağı arzu edir. O, Bakıda yaşayarkən Vüqar Həşimov adına Şahmat Akademiyasında məşğul olub, ABŞ-da şahmat yarışlarında bir neçə mükafat qazanıb.
Sız Azərbaycanın fəxrisiniz, uşaqlar. Çox sevinirik ki, harada yaşayıb işləmələrindən asılı olmayaraq soydaşlarımız Azərbaycan övladının nələrə qadir olduqlarını öz əməlləri və bacarıqları ilə sübut edirlər.
Zərifə BƏŞİRQIZI, “Xalq qəzeti”