Sosial Xidmətlər Agentliyi tərəfindən bu ilin ilk rübündə 6 min 335 şəxs sosial və peşə-əmək reabilitasiyası xidməti ilə təmin olunub. Onlardan 2 min 176 şəxsə agentliyin sosial xidmət müəssisələrində xidmət göstərilib. Həmin şəxslərdən 181 gənc müxtəlif peşələr üzrə hazırlıq kurslarına cəlb olunub.
Son 3 ayda tənha ahıl və əlilliyi olan 4 min 159 şəxsə isə evlərində (səyyar) sosial-məişət xidməti göstərilib. Bu dövrdə 448 imtiyazlı şəxs agentlik tərəfindən sanatoriya-kurort yollayışı ilə təmin olunub.
Tərtər və Ağcabədidə “Məşğulluğa Dəstək Layihəsi”
Dünya Bankının maliyyə dəstəyi ilə icra olunan “Məşğulluğa Dəstək layihəsi” çərçivəsində Tərtər və Ağcabədi rayonlarında ictimai dinləmələr keçirilib. Məqsəd məlumatlılığı artırmaq, nəzərdə tutulmuş hədəf kateqoriyalarını layihəyə cəlb etməkdir.
Öz biznesini qurmaq istəyən işaxtaran və işsiz şəxslərin iştirakı ilə keçirilən görüşlərdə layihənin hədəf və məqsədləri, əhatə dairəsi, layihənin icrası zamanı ətraf mühit və sosial məsələlərə dair tələblər barədə məlumatlar verilib. Proqramın gözlənilən faydaları, müraciət və iştirak qaydaları diqqətə çatdırılıb.
Tədbirdə iştirakçıları maraqlandıran suallar cavablandırılıb, eləcə də layihə çərçivəsində öz biznesini qurmaq istəyən şəxslərə müvafiq tövsiyələr verilib.
Əlilliyi olanlar üçün peşə kursları təşkil edilib
Dövlət Məşğulluq Agentliyi və Əlilliyi olan Sahibkarlar Təşkilatı İctimai Birliyi tərəfindən daha 100-dək şəxs üçün 6 peşə hazırlığı kursu təşkil edilib. Masallı rayonu üzrə 25 nəfər əlil şəxsin cəlb edildiyi peşə kurslarına mediatur olub.
Masallı Sənaye Məhəlləsində yerləşən müəssisədə təşkil olunan kurslar dərzi və xalçaçılıq istiqamətləri üzrədir. Media nümayəndələri kursların təşkil olunduğu müəssisədə tədris prosesi ilə tanış olublar. Onlara agentlik tərəfindən aparılan peşə hazırlığının təşkili işləri barədə məlumat verilib. Bildirilib ki, agentlik tərəfindən əmək bazarının tələblərinə cavab verən 175 peşə və ixtisas üzrə kurslar təşkil edilib. Agentıiyin, həmçinin Bakı, Gəncə və Göyçayda üç peşə hazırlığı mərkəzi də fəaliyyət göstərir.
Peşə kurslarının səmərəli təşkili və nəticəyönümlü olması üçün sosial tərəfdaşlıq müstəvisində işəgötürənlərlə fəal əməkdaşlıq həyata keçirilir. Bu da kursları bitirənlərin yeni yiyələndikləri peşələr üzrə işlə təminatında mühüm önəm kəsb edir. Kurslara cəlb olunan müdavimlərə peşə kursu müddətində minimum aylıq əməkhaqqı məbləğində təqaüd verilir və kursları uğurla başa vuran şəxslərin işlə təminatına dəstək göstərilir.
Zərifə BƏŞİRQIZI, “Xalq qəzeti”