Yaxud əclafların son sığınacağı

Əvəz Rüstəmov
[email protected]

Bir müddət əvvəl Ermənistan baş naziri Nikol Paşinyan “Vətən naminə Tavuş” hərəka­tının lideri arxiyepiskop Baqrat Qalstanyanın onunla görüş təklifi ilə bağlı bildirmişdi ki, din xadiminin belə bir niyyəti varsa, qəbula yazıl­sın. Əlbəttə, Nikol açıq şəkildə məzələnmiş və göstərmişdi ki, “hərəkat” liderini saya salmır. 

Ümumiyyətlə, N.Paşinyan “Vətən naminə Ta­vuş” hərəkatı başlar-başlamaz, kifayət qədər, iro­nik tərzdə bildirmişdi ki, din xadiminin ümumer­məni hərəkatı adlandırılan aksiyaya rəhbərliyini anlamır. Ancaq zaman keçdikcə, Baqrat özünün təsdiqləmək baxımından xeyli işlər gördü. Hər hal­da, hazırda onun başladığı hərəkatın populyar ol­duğuna dair mənzərə var. Əlbəttə, bu görüntünün özündə də şübhəli məqamlar yetərincədir... 

Əlqərəz, indi cavab qaytarmaq növbəsi B.Qals­tanyandadır. Onun Paşinyanla görüş xüsusunda nələri diqqətə çatdırdığından söz açacağıq. Amma əvvəlcə Ermənistanda Baqrat–Nikol qarşıdurması­nın hansı durumu xatırlatdığının üzərində dayanaq. Bunun üçün çox da uzaq olmayan 2018-ci ili yada salaq. Yəni, Paşinyanın hakimiyyətə gəldiyi ili. 

Paşinyan o zamankı prezident Serj Sarkisyanla görüşə əynində nimdaş paltarda qatılmış və media nümayəndələrinin gözü qarşısında dövlət başçısı­na hədə-qorxu gəlmişdi. İş o yerə çatmışdı ki, Sar­kisyan kimi ədəbsiz və mədəniyyətsiz adam belə bir təmasda iştirakının səmərəsizliyini bildirmiş və salonu tərk etmək məcburiyyətində qalmışdı. Əlbət­tə, sonradan bu tərketmə onun hakimiyyədən uzaq­laşması reallığını da doğurmuşdu. Hərçənd, həmin vaxt yaşanan proseslər göstərir ki, Sarkisyan görü­şü yarımçıq qoymasa belə, yenə hakimiyyət kreslo­su ilə vidalaşmalı olacaqdı. 

İndi Sarkisyandan fərqli olaraq, Paşinyan ona qarşı çıxan Qalstanyanla görüşməyi də özünə rəva bilmir, din xadiminin qəbula yazılmalı olduğunu bil­dirib onunla məzələnir. Sual yaranır: Nikol axıradək məzələnə biləcəkmi? Əlbəttə, yazımızda bu barədə nə isə demək istəyində deyilik. Həm də ona görə ki, Ermənistanda yaşanan gərginlik proqnozlaşdırılan deyil. 

Ancaq artıq bir şey tam dəqiqdir ki, əgər Qals­tanyan hakimiyyətə gəlməsə, həbsxanaya getmək aqibətindən qurtula bilməyəcək. Çünki onun baş­ladığı hərəkat, bir növ, cızığından çıxıb. Polis nü­mayişçilərə qarşı güc tətbiqinə start verib və bu tendensiya total xarakter alıb. Ən əsası isə Baq­ratı həm də ona görə həbsxana perspektivi gözlə­yir ki, ortada onun Paşinyanın görüş üçün qəbula yazılmaq fikrinə cavabı var. Cavab, kifayət qədər, ictimailəşib, onun açıq demarş mahiyyəti daşıdığı şübhəsizdir. 

Beləliklə, Qalstanyan baş nazirlə görüş prose­durunun olduğunu vurğulayıb. Eyni zamanda, Pa­şinyana həbsxanada baş çəkəcəyini dilə gətirib. O, bunu İrəvanın mərkəzi meydanında keçirdiyi itaət­sizlik kampaniyası gedişində jurnalistlərlə söhbət zamanı deyib. Din xadiminin sözlərinə görə, hər gün görüş gözlənilir. Ancaq: “Nə bu adamın (Paşin­yanın - red), nə də Vahe Qazaryanın (Ermənistan daxili işlər naziri - red.) cəsarəti var”. 

Maraqlısı isə budur ki, Qalstanyan Paşinyanla yanaşı, DİN başçısının görüş formatını “qəbuledil­məz” adlandırıb. “O, xalq qarşısında cavab vermə­lidir. Bu ölkədə məsuliyyətsiz məmurlar olmama­lıdır”, – deyə arxiyepiskop fikrinə aydınlıq gətirib. B.Qalstanyan jurnalistlərlə söhbətində, həmçinin bir daha N.Paşinyana fokuslanaraq, onu ələ salıb. “Bu adam hər cəhətdən tükənib: həm mənəvi, həm də hüquqi cəhətdən. Siz velosiped sürürdünüz, amma indi o velosiped haradadır?”, - deyən Baqratın sərt ritorikaya üstünlük verərək, bütün qırmızı cizgiləri aşdığı danılmazdır. 

Göründüyü kimi, Ermənistanda bıçaq sümüyə dirənib. Baqrat və tərəfdarları, heç bir halda, haki­miyyətlə kompromisə getmək niyyətində deyillər. Belə olan halda, durumun hər ötən gün daha da gərginləşəcəyi şübhə doğurmur. Onu da nəzərə alaq ki, din xadiminin başladığı etiraz Ermənista­nın Azərbaycanla sülh prosesini pozmaq istəyən­lərin istifadə etdikləri ən son kartdır. Yəni, Paşin­yanın fiziki cəhətdən məhvini saymasaq, bundan başqa yapışacaq hansısa real siyasi təsir vasitəsi yoxdur. 

Yekunda bir klassik deyimi yada salmaqla, ya­zımızı tamamlayaq: – Vətənpərvərlik əclafların ən son sığınacağıdır. Fikrimizcə, hazırda Ermənis­tanda hakimiyyətə qarşı çıxanlar bu deyimin, belə demək mümkünsə, haqqını tam ödəyirlər. Nəzərə alaq ki, sülhə qarşı çıxmaq, ona ədalətsiz damğası vurmaq, ən azından əclaflıqdır. Baqrat və tərəfdar­ları isə əclaflıqlarını və digər bu kimi məkrli əməllə­rini vətənpərvərlik pərdəsi altında gizlədirlər.