İran İslam Respublikasının Prezidenti Seyid İbrahim Rəisinin helikopterinin qəzaya uğraması və hadisə nəticəsində dövlət başçısı ilə bərabər digər yüksək ranqlı nümayəndələrin həlak olması böyük faciədir. Faciənin Azərbaycan və İran prezidentlərinin dövlət sərhədində görüşmələrindən, Araz çayı üzərində inşa edilmiş “Xudafərin” hidroqovşağının istismara verilməsi və “Qız qalası” hidroqovşağının açılış mərasimi kimi əlamətdar hadisədən sonra yaşanması xüsusilə üzücüdür.
Olayla bağlı müxtəlif şayiə və fərziyələr var. Bunları, müəyyən mənada, təbii saymaq mümkündür. Çünki bir ölkə rəhbərini, habelə ali səviyyəli şəxsləri daşıyan helikopterin qəzaya uğraması adi məsələ sayıla bilməz. Yəni, istənilən halda konsprioloji baxışlar gündəmə gələ bilər və gəlir də. Əlbəttə, onların üzərində dayanmaq düzgün deyil. Rəsmi versiyanı əsas götürək. Yəni, qəza texniki amillərlə bağlıdır.
Məlum olduğu kimi, Azərbaycan Prezidenti İlham Əliyev helikopterin İranda qəzaya uğraması ilə bağlı X sosial şəbəkəsindəki rəsmi səhifəsində paylaşım etdi. Bu, olaya rəsmi səviyyədə ilk reaksiya idi: “Bu gün İran İslam Respublikasının Prezidenti İbrahim Rəisi ilə dostcasına xudahafizləşdikdən sonra ali nümayəndə heyətini daşıyan helikopterin İranda qəza enişi etməsi barədə xəbər bizi ciddi şəkildə narahat etdi. Uca Allahdan dualarımız Prezident İbrahim Rəisi və onu müşayiət edən nümayəndə heyəti ilədir. Qonşu, dost və qardaş ölkə olaraq Azərbaycan Respublikası hər cür dəstək göstərməyə hazırdır”.
***
Qeyd edək ki, Azərbaycan və İran prezidentləri “Xudafərin” hidroqovşağının istismara verilməsi və “Qız qalası” hidroqovşağının açılış mərasimində kifayət qədər səmimi fikirlər səsləndirmələri ilə yadda qalmışdılar. Məsələn, ölkəmizin lideri bildirmişdi: “Hörmətli cənab Prezident, mən hesab edirəm ki, bugünkü görüş və mərasim İran - Azərbaycan əlaqələrinin tarixində gözəl, parlaq səhifə kimi qalacaq. Çünki bu gün açılışını edəcəyimiz layihə həm texniki nöqteyi-nəzərdən çox önəmlidir, eyni zamanda, iki xalqı, iki dövləti daha da sıx birləşdirəcək. Xalqlarımızın birgə uğuru, təbii ki, dostlarımızı sevindirir, bunu bəyənməyənlər isə hesab edirəm ki, öz işləri ilə məşğul olsalar, daha yaxşı olar. Əsas odur ki, İran və Azərbaycan dövlətləri bu gün çox güclü birgə siyasi iradə göstərirlər, öz xalqlarına və bütün dünyaya açıq bəyan edirlər ki, biz birlikdəyik və bundan sonra da birlikdə olacağıq. İran – Azərbaycan əlaqələri bölgəmizdə sabitliyin önəmli şərtidir. Təbii ki, belə gözəl layihə xalqlarımızın rifahını yaxşılaşdıracaq və iş yerlərini artıracaq, beləliklə uğura doğru növbəti addım olacaq. Əminəm ki, gələcəkdə buna oxşar birgə layihələrin sayı çox olacaqdır”.
İran Prezidenti də mərasimdə səmimi fikirlər səsləndirmişdi. Elə fikirlər ki, onlara əsasən İranla Azərbaycan arasında son illərdə yaşanmış müəyyən soyuqluğun tam aradan qalxdığını, münasibətlərin ən yüksək inkişaf mərhələsinə qədəm qoyduğunu söyləmək mümkün idi: “Allahın adı ilə. Cənab Prezident, çox xoşbəxtəm ki, Azərbaycan Respublikasının hörmətli Prezidenti cənab İlham Əliyev ilə yenə də bir daha yaxından görüşürük və birgə müzakirəmizi yenidən nəzərdən keçiririk. Böyük xoşbəxtlik ondan ibarətdir ki, bu görüş bir yerdə baş tutur, burada böyük bir layihə həyata keçirilib və bu, iki xalq üçün çox uğurlu bir görüşdür. Hazırda biz istismara verilməsi iki xalq və iki dövlət üçün çox əhəmiyyət kəsb edən bir layihənin açılışında iştirak edəcəyik. Bunun özü əlamətdar bir hadisədir ki, iki xalq, iki dövlət arasında da çox mühüm böyük layihələr həyata keçirilə bilər. Ola bilsin ki, bəziləri bizim bu görüşlərimizi və birgə uğurlarımızı bəyənməsinlər. Bunlar bizim üçün əhəmiyyət kəsb etmir. Əsas odur ki, ölkələrimiz, dövlətlərimiz və xalqlarımız üçün nə xeyirlidirsə, biz onu birgə həyata keçirdik”.
Azərbaycan Prezidentinin “Belə gözəl layihə xalqlarımızın rifahını yaxşılaşdıracaq” fikri ilə İbrahim Rəisinin “Əsas odur ki, ölkələrimiz, dövlətlərimiz və xalqlarımız üçün nə xeyirlidirsə, biz onu birgə həyata keçirdik” fikri bir-birini tamamlayır. Bunadək isə dövlət başçılarının səmimi notlarla zəngin söhbəti olmuşdu. Hesab edirik ki, bu cür isti mesajların səslənməsi də indiyədək keçilməmiş yoldur. Hər iki Prezidentin dilə gətirdiyi fikirlər son dərəcə təsirli idi.
Prezident Seyid İbrahim Rəisi: “Biz Azərbaycanın uğurunu, nailiyyətini öz nailiyyətimiz bilirik. Bizim Azərbaycanla münasibətlərimiz, bağlılığımız təkcə qonşuluq bağlılığı deyil, aramızda qəlb bağlılığı, tarixi bir bağlılıq və kök bağlılığı var. Bu, tarixi bir hadisə, yəni, iki ölkə, iki xalq arasında tarixi bir hadisənin əsası olacaq və bu, tarixə də həkk ediləcək”.
Prezident İlham Əliyev: “Biz ta qədimdən gələn ulu əcdadlarımızın arzularını indi həyata keçiririk. Əminəm ki, bundan sonra da iki qardaş xalq bir-biri ilə sıx təmasda yaşayacaq, quracaq, belə gözəl xariqələr yaradacaq”.
Növbəti məqam. Prezident Rəisi Kəlalə-Ağbənd yoluna baxış keçirdiyini, orada işlərin çox gözəl şəkildə həyata keçirildiyini bildirdi və əlavə etdi ki, Azərbaycan ilə İran arasındakı əməkdaşlıqların nəticələri bu su bəndi və eyni zamanda, o körpü və yoldur. Dövlətimizin başçısı da Ağbənd istiqamətində inşa edilən körpünü həm növbəti nəqliyyat bağlantısı, eyni zamanda, növbəti dostluq rəmzi kimi dəyərləndirdi. Cənab İlham Əliyev Şimal-Cənub Nəqliyyat Dəhlizinin bir istiqamətini də Ağbənd istiqamətindən salındığını diqqətə çatdırdı.
Yazının bu yerində yaxın keçmişdə yaşananlara diqqət yetirək. Azərbaycan Prezidenti bu il yanvarın 10-da yerli televiziya kanallarına müsahibəsində “Zəngəzur dəhlizi” xüsusunda ölkəmizin mövqeyini diqqətə çatdırmış və Naxçıvana quru yolunun əhəmiyyəti barədə söz açarkən bildirmişdi: “Biz, sadəcə olaraq, üç il gözləmişik, görəndə ki, bu alınmır, bizim başqa yolumuz qalmayıb. Biz qısa yolla Azərbaycanın əsas hissəsini Naxçıvanla birləşdirməliyik və bildiyiniz kimi, İranla artıq razılıq da əldə edildi, nəinki razılıq, təməlqoyma mərasimi keçirildi. İndi Ağbənd istiqamətində artıq birinci körpünün inşası başlanmışdır və ikinci körpü də Ordubad istiqamətində nəzərdə tutulur. Yəqin ki, bu il biz ona da başlayacağıq”.
Diqqət yetirək, Azərbaycan və İran prezidentləri mayın 19-da məhz Ağbənd istiqamətində görülmüş işlərin əhəmiyyətini vurğulamışdılar. Dövlətimizin başçısı isə haqqında söz açdığımız müsahibəsində, həmçinin Naxçıvana gedən yolun İran ərazisindən keçməsinə qarşı beynəlxalq müqavimətin mövcudluğundan söz açmışdı. O vurğulamışdı ki, Tehranla razılaşma Ermənistanı yenə dalan olaraq saxlayacaq: “Onlar indi, necə deyərlər, bundan duyuq düşərək əl-ayağa düşdülər ki, biz kənarda qaldıq və hətta, bildiyiniz kimi, Amerika Dövlət Departamentinin rəhbərinin müavini də bir anlaşılmaz açıqlama vermişdi ki, ya Ermənistandan keçəcək, ya da ki, biz imkan verməyəcəyik. Yaxşı, biz bunu üç ildir deyirik ki, bu, Ermənistandan keçsin, Ermənistan imkan vermir. İndi də bizi ittiham edirlər ki, biz başqa yol seçirik. Yəni, siz şərait yaradın Ermənistanın ərazisindən keçsin, Mehri ərazisindən keçsin, mən dediyim şərtlərlə, onda digər varianta ehtiyac qalmayacaq. Yoxsa bu da anlaşılan deyil. Bu gün Azərbaycanın əsas hissəsi ilə Naxçıvan arasında əlaqə yenə də İran ərazisindən həyata keçirilir. Niyə buna etiraz edilmir, məhz Mehri hissəsinə etiraz edilir?.. Yəni, belə məntiqsiz və cəfəng açıqlamalar heç kimə şərəf gətirmir və “biz buna imkan verməyəcəyik” deyəndə, – mən artıq bunu demişəm, – Amerika nəyi nəzərdə tutur, necə imkan verməyəcək? Gələcək Zəngəzurda bir sədd qoyacaq, ya Zəngilanda bir qoşun yerləşdirəcək, ya İran ərazisində? Necə imkan verməyəcək? Bu, bizim suveren işimizdir. Bizim İranla bu yaxınlarda Astaraçay üzərində körpünün açılışı olmuşdur. Nə üçün? Çünki Şimal-Cənub dəhlizində yükdaşımaların həcmi iki dəfə artıb və hazırda Astaradakı terminal bütün o yükləri götürə bilmir. Rusiya ilə ikinci keçid açmışıq Xanobada və indi Rusiya-Azərbaycan sərhədində iki keçid var, bir idi. İranla da iki keçid var. Yəni, bu, bizim suveren işimizdir”.
Heç bir əlavə şərh vermədən yazımızı elə bu yerdə də tamamlayıb Uca Tanrıdan Prezident Seyid İbrahim Rəisi başda olmaqla, helikopter qəzasında həyatını itirən İranın yüksək səviyyəli nümayəndə heyətinin hər bir üzvünə rəhmət diləyirik.
Ə.CAHANGİROĞLU
XQ