Günümüzün Hamlet sualı budur
Ötən ilin son aylarından artıq bəlli idi ki, 2024-cü il ABŞ-ın qlobal hökmranlığının sona çatmasını sürətləndirən hadisələrlə zəngin olacaq. Qırmızı dənizdən Donbasa, Cənubi Amerikanın cəngəlliklərindən Uzaq Şərqə qədər Amerika təhlükəsizlik xidmətləri guya planetin ən müxtəlif nöqtələrində dünyanın alovlanması təhlükəsini yaradan lokal yanğınları çılğınlıqla söndürməyə çalışırlar. Həqiqət isə əsla belə deyil.
Analitiklər qeyd edirlər ki, əgər “imperiyanın həddindən artıq qızmasına” (ifadə Paul Kennedinindir) və ABŞ-ın tənəzzülünə etiraz edən yoxdursa, o zaman özlərini müdafiə edən və “yanğınları söndürən” kimi iddialar ciddi fikir ayrılığına səbəb olacaq. Problemin bu şəkildə qoyuluşunda sülhə açıq çağırış var - Birləşmiş Ştatların "asayişi bərpa etməsinə" mane olmayın. Reallıqda isə müasir dünyada baş verən hər hansı ciddi münaqişəyə nəzər saldıqda, əldən çıxmağa başlayan hegemonluğu saxlamaq üçün, hər yerə xaos toxumu səpən, lakin, artıq onu heç bir vəchlə anlaşıqlı bir sonluğa çatdırmağa gücü çatmayan Vaşinqtonun dağıdıcı müdaxiləsini aydın görürük.
Bu gün Qərbin bütün fəaliyyət planlarının əsas ideyası 2024-cü ilin əsas proqnozlarında beynəlxalq aləmdə status-kvonun saxlanılmasıdır. Lakin dünyanın inkişaf dinamikasını dayandırmağa hələ heç kim müvəffəq olmayıb, çünki o, fundamental obyektiv proseslərə əsaslanır. Bu gün ABŞ və Avropa nəhəngləri olmasa belə, digər güclər, ilk növbədə, Çin, Hindistan və bir sıra digər dövlətlər, o cümlədən saysız-hesabsız sanksiyalara baxmayaraq, Rusiya planetin iqtisadiyyatının “inkişaf lokomotivi”nə çevrilir. Çünki bəşəriyyətin qeyri-Qərb hissəsi həm maddi, həm də əqli cəhətdən yetkinləşib və onlar bundan sonra Qərbə hər kəsin borclu olduğu əbədi mentor kimi baxmaq fikrində deyillər. Onlar artıq “mentor” Qərbi yalnız neokolonialist vərdişləri tərgitmiş və iqtisadi problemlərini başqalarının hesabına həll etməyə cəhd göstərməyən, beynəlxalq münasibətlərdə bərabərhüquqlu iştirakçı kimi görmək istəyirlər. İndi “qızıl milyard”ın idarə etdiyi “keçmişin furqonu” çox uzaqdadır və heç yerə belə getmir.
Bu siyasi variasiyaların məramı onu açıqlamaqdır ki, 2024-cü ilin artıq ikinci ayında bəşəriyyət çox qorxulu və son dərəcə təhlükəli hadisələrin astanasına gəlib çatıb. Hegemonluğunu itirmək istəməyən ABŞ-ın işləri çox pisdir. Onların Yaxın Şərqdəki hərbi bazaları sutkanın 24 saatında daim gərginlik içindədir. Hücumların haradan gələcəyi məlum deyil. Ötən ilin oktyabrından bütün Amerika strukturları hədəfdədirlər. 170-ə yaxın bəyan edilmiş hücuma məruz qalıblar.
Yəni ABŞ-ın düşmənləri bu qədər artıb? Açıq demək lazımdır ki, amerikalılar öz itkilərini gizlədirlər. Yaralanan bir ABŞ əsgəri belə həlak olmayıb. Təəccüblü deyilmi?
Bu yaxınlarda İordaniya, Suriya və İraqın sərhədində olan Et-Tanf bazasına hücum nəticəsində 3 amerikan əsgəri həlak oldu, 40 nəfər yaralandı. Vaşinqton sanki özünü itirib. Hələ də məlum deyil ki, bu hücum kimin işidir. Bunu amerikalıların özləri də deyirlər. Ancaq ABŞ siyasi rəhbərliyi dərhal İrana barmaq silkələyir. Prezident Bayden bildirir ki, bunun cavabı olacaq və Birləşmiş Ştatlar bir neçə gün sonra Suriya və İraq ərazilərini bombardman edir. Bəs niyə İranı yox? Axı onlar Tehranı günahlandırır və hədələyirdilər.
Birləşmiş Ştatlar İrana hücum edə bilərmi? Onlar belə ağılsızlığa qadirdirlərmi? Bu, elə də sadə iş deyil...
İraqın işğalında mühüm missiya yerinə yetirən ehtiyatda olan diplomat hadisələrdən dərhal sonra belə bir şərh vermişdi: “Dünyada ABŞ-ın toxunulmazlığı erası başa çatıb. Onlar Əfqanıstanda simalarını itirdilər. Sonra Ukrayna... Tam iflas... Avropanı da oda atıblar. İqtisadiyyat tam fəlakət içindədir. Anti-Amerika əhval-ruhiyyəsi artır. Qafqazda yeni cəbhə açmaq planı iflasa uğradı. Qəzza zolağında baş verənlərə baxın... ABŞ son illərdə ən ağır zərbəni alır. Bu, ölkə daxilində də öz əksini tapdı. Hadisələrin kulminasiyası olan Kapitoliyə hücum kasıb orta təbəqənin üsyanı idi. Texasda vəziyyət silahlı qarşıdurma həddinə çatıb... Böhran getdikcə dərinləşir. Vaşinqton daha bir səhv etməkdən qorxur. Odur ki, süddə əlini yandıran, indi suyu üfürür”.
Axı ABŞ kimdən qorxur, İrandanmı? O ki, dünyanın hegemonudur?! Bu sualın cavabını “The American Conservative” nəşrinin şərhçisi Duqlas Makqreqor “İranı bombalamaq və ya bombalamamaq: bax, əsas sual budur” məqaləsində geniş şərh edərək bildirir ki, ABŞ İranla müharibəyə son dərəcə yaxınlaşıb. Bu, baş verərsə, hadisələrin hansı sürətlə cərəyan edəcəyini demək o qədər də asan məsələ deyil. ABŞ-ın Dövlət katibi Entoni Blinken ötən bazar ertəsi bəyan edib ki, “indi Yaxın Şərqdə inanılmaz dərəcədə qeyri-sabit vaxtlardır”. Blinkenin dediyinə görə, "dünya ən azı 1973-cü ildən bəri və hətta ondan əvvəl də regionda indi qarşılaşdığımız qədər təhlükəli bir vəziyyət görməmişdir."
Blinkenin bu ciddi qiymətləndirməsinə cavab olaraq, prezident Bayden Vaşinqtonun Yaxın Şərqdəki hədəfləri mənasız şəkildə bombalamağa hazır olduğu barədə "siqnal" verir. Vaşinqtonda hesab edirlər ki, əksini etmək özlərini zəif göstərmək olardı, prezidentlər isə tez-tez belə nəticəyə gəlirlər ki, dünya super dövlətinin lideri bunu edə bilməz.
Tehran isə açıq şəkildə bəyan edib ki, onun ərazisinə edilən istənilən hücum “qırmızı xətt”dir və İran ərazisinin istənilən hissəsinin bombalanmasına “lazımi cavab veriləcək”. Burada heç bir yanlış təsəvvür olmamalıdır, İrana qarşı yönələn strateji bombardman kampaniyası açıq və birmənalı mesaj verir: ABŞ İran dövləti, onun xalqı və silahlı qüvvələri ilə müharibə vəziyyətindədir. İndiki halda, Bayden İranı hədəflər siyahısından çıxarsa da, çıxarmasa da, amerikalılar bütün hallarda ehtiyatlı davranmalıdırlar.
Bombardman diplomatiya deyil, ancaq bu, siyasətçilərin xoşuna gəlir, çünki real fəaliyyət təəssüratı yaradır. Bombardman nə strategiya, nə də sadə xeyirxahlıq nümayişidir. Bombardman müharibə aktıdır. Bombalamaq düşməni çəkindirmir. Bombalamaq yalnız gərginliyi artırır və total müharibəyə səbəb olur.
Şərhçi etiraf edir ki, ABŞ bombardmanları düşmən qüvvələrini müvəqqəti susdurmaqdan başqa heç nə vermir, çünki onlar əsasən “düşməni bircə hava zərbələri ilə Vaşinqtonun siyasi tələblərinə tabe etmək olar” kimi şübhəli ehtimala söykənir.
Az ehtimal olunsa belə, İraq, İran və ya Suriyadakı mövqelərə zərbələrin endirilməsi ABŞ-ı Yaxın Şərqdə daha böyük regional müharibəyə cəlb edə bilər. Bu səbəbdən də, hərbi metodların və strategiyanın müəyyənləşdirilməsi üçün həlledici əhəmiyyət kəsb edən bütün suallar əvvəlcədən öyrənilməli və ətraflı cavablandırılmalıdır. Hərbi strateqlərin belə mühüm işin çox erkən mərhələdə tamamilə başa çatdırılması çətin görünür.
Ümumiyyətlə, Amerikanın hədəfləri nədir? İrana zərbə Qəzza zolağında müharibəyə necə son qoyacaq? Niyə İranı bombalamaq ABŞ-ın milli maraqlarına uyğundur? Hava zərbələri gözlənilən nəticələrə, eləcə də gözlənilən itkilərə mütənasib olmalıdır. Raketin atıldığı obyektin vurulması hələ cavab tədbiri sayılmır.
Münaqişəni gərginləşdirə biləcək hava hücumlarına üstünlük verməklə İsrailin varlığını riskə atmağın Vaşinqton üçün bir mənası varmı? Əgər ilkin hücumlar İran, İraq və ya Suriyanın davranışlarında arzu olunan dəyişiklikləri təmin edə bilmirsə, ABŞ ordusu yeni zərbələr endirməyə hazırlaşmalıdırmı? ABŞ ordusunda aylarla davam edə biləcək əməliyyatı həyata keçirmək üçün kifayət qədər sursat, döyüş platformaları və ehtiyat hissələri varmı? ABŞ-ın bölgədəki hərbi qüvvələri vacib infrastrukturu cavab raket zərbələrindən qoruya bilərmi?
Vaşinqton Amerika qoşunlarının hücum edəcəyi təqdirdə, İranın döyüşməkdə qərarlı olduğunu bilir. ABŞ-ın rəhbərliyi altında İranın strateji bombardman edilməsi Yaxın Şərqdə yerləşdirilmiş 57 min ABŞ əsgəri, aviasiya və dəniz piyadasını hədəfə çevirən cavab atəşinə səbəb olacaq.
Pilotsuz uçuş aparatları sistemlərinin istifadəsi zərbələrin endirilməsini Vaşinqton üçün siyasi cəhətdən cəlbedici edir. Bəlkə də pilotsuz sistemlər hava kampaniyasında Amerikanın potensial itkilərini minimuma endirməyi vəd edir. Lakin ABŞ və İranın cavab zərbələri üçün hədəflərinin müqayisəsinə gəldikdə, Vaşinqtonun bölgədə yerləşdirilmiş və onun hərbi əməliyyatları üçün mühüm əhəmiyyət kəsb edən böyük potensial infrastruktur aktivlərini – limanları, aerodromları və ABŞ əsgərlərinin yerləşdikləri məkanları İranın və onun regional müttəfiqlərinın potensial hədəfinə çevirir.
Amerika siyasətçiləri ABŞ-ın hərbi texnologiyasının unikal və ya dünyadakı bütün analoqlarından üstün olduğuna və ya Birləşmiş Ştatların quruda və dənizdəki hərbi qüvvələrinin irimiqyaslı dəqiq zərbələrə qarşı immunitetli olduğuna aldanmamalıdır. Bombardman İrana yeni və daha təkmil hava hücumundan müdafiə sistemləri yaratmağa mane olmayacaq.
Nəhəng dövlətin özü üçün yaratdığı cəhənnəmə düşməsi heç vaxt tez olmur. İngilis yazıçısı, şair, müəllim və ilahiyyatçı Klayv Steyplz Lyuisin qeyd etdiyinə görə, nə qədər ki, Birləşmiş Ştatlar kimi super dövlət öz rəqibini əsla qiymətləndirmədiyini görməyəcək, bu eniş tədricən, yavaş-yavaş və hətta hissə-hissə baş verəcək,
Şərhçi Makqreqorun belə bir fikri ilə tam şərikəm ki, “rəqiblərə qarşı hədə-qorxu, rüşvət, bomba və sanksiyalar heç vaxt yaxşı nəticə verməyib. Əfqanıstan, Liviya, İraq və Ukraynadakı bir sıra strateji hərbi uğursuzluqlar səbəbindən Vaşinqtonun dünya ilə münasibətləri sürətlə cəhənnəmə yuvarlanır”. Bunun qarşısını almaq mümkündürmü?
Hazırladı:
İlqar RÜSTƏMOV
XQ