Azərbaycan 20 ildən artıqdır ki, Avropa Şurasının üzvüdür. Bu müddətdə AŞPA davamlı olaraq Azərbaycana ikili standartlar əsasında qərəzlə yanaşıb. Qurumun ötən həftə Azərbaycan nümayəndə heyəti ilə bağlı qəbul etdiyi tələsik və ədalərsiz qərar isə bu bədxah yanaşmanın zirvəsi oldu. Saxta bəhanə isə bu oldu ki, guya, Azərbaycan AŞ qarşısında üzərinə götürdüyü mühüm öhdəlikləri yerinə yetirmir, insan hüquqları pozulur.
Bir buna baxın, kimlər “azad və ədalətli seçkilərdən, hakimiyyət bölgüsündən, qanunvericilik orqanının icraya qarşı zəifliyindən” danışır, Azərbaycana “məhkəmə hakimiyyətinin müstəqilliyini, insan haqlarına hörməti” öyrətməyə çalışır. Onlar niyə unudurlar ki, ABŞ, Avropa İttifaqı, Fransa və Almaniyada günahsız insanlar dini, irqi, milli mənsubiyyətinə görə öldürülür, mətbuat mənsublarının həbsi davam edir.
Bəzi Avropa ölkələrində jurnalistlərin yazılarına görə saxlanılması adi haldır. Bu ölkələrə Polşa, Finlandiya, Fransa, İngiltərə və İtaliya daxildir, Polşada ispan jurnalist Pablo Qonzales Rusiya–Ukrayna müharibəsi başlayandan dərhal sonra “rus agenti olmaq” ittihamı ilə həbs edilib. O, həbsdə olandan 9 ay sonra ailəsi ilə görüşə bilib. Güman edirəm ki, AŞPA deputatları “təhlükəli məhbus” sayılan və ağır şəraitdə həbsdə saxlanılan jurnalist Pablo Qonzalesi xatırlamırlar.
Finlandiyada 2 jurnalist 16 dekabr 2017-ci il tarixində Helsinkinin “Sanomat” qəzetində Finlandiya Müdafiə Kəşfiyyat İdarəsi haqqında məlumat yaydığına görə yanvar ayında məhkəmə tərəfindən milli sirləri açıqlamaqda təqsirli bilinib. Xəbər dərc ediləndən 4 il sonra jurnalistin məhkəməyə çağırılması etirazlarla qarşılandı.
Fransada isə 3 jurnalist 2018-ci ildə ölkə ordusunda uzun illər korrupsiyaya yol verdiyinə dair 2018-ci il xəbərlərinə görə Fransa Daxili Kəşfiyyat Xidməti (DGSI) tərəfindən 2022-ci ildə ifadə verməyə çağırılıb. 2023-cü ildə Fransada keçirilən irimiqyaslı etiraz aksiyalarını işıqlandıran jurnalistlər polis zorakılığına məruz qalıblar. Yerlə sürüklənən etirazçıların məruz qaldığı qeyri-mütənasib zorakılıq AŞPA-nın diqqətini çəkmirmi? Belə faktlar AŞ ölkələrində kifayət qədər çoxdur.
Azərbaycanın AŞPA-dakı nümayəndə heyətinin rəhbəri Səməd Seyidov haqlı olaraq bildirib ki, etimadnamələrin qəbul edilməməsi üçün irəli sürülən səbəblər əsassızdır və Azərbaycana qarşı qərəzin dərin köklü təzahürüdür: “Nümayəndə heyətimizin etimadnaməsini ratifikasiya etməkdən imtina etmək AŞPA-nın və ümumilikdə Avropa Şurasının reputasiyasına ciddi zərbə olardı və onun ağır nəticələrinə görə məsuliyyət bu addımın təşəbbüskarlarının üzərinə düşür”. Səməd Seyidov etimadnamələrin qəbul edilməməsi cəhdinin Azərbaycana qarşı aparılan qərəzli kampaniyanın tərkib hissəsi olduğunu qeyd edib: “Bəzi qərəzli qruplar öz dar maraqları naminə AŞPA-nın təməl prinsiplərindən sui-istifadə edirlər. Siyasi korrupsiya, ayrı-seçkilik, “etnik və dini nifrət, ikili standartlar, təkəbbür və şovinizm AŞPA-da hakim praktikaya çevrilib”.
AŞPA-nın Ukrayna və Türkiyədən olan yalnız iki üzvü qərara qarşı çıxıb. Azərbaycanla dost ölkənin hansısa deputatlarının belə çirkin oyuna qoşulması utangətirici addımdır və kəskin qınanılmalıdır.
Göründüyü kimi, AŞPA-dan bəzi üzv ölkələrə qarşı hücumlar üçün aşkar platforma kimi istifadə olunur. Bu qurumun səhnəsində göstərilən bir çox tamaşaların ssenari müəllifi və rejissoru isə XXI əsrdə də müstəmləkəçilik siyasətindən əl çəkməyən Fransadır.
Seyfəddin AYAKSOY,
Manisa Azərbaycan Mədəniyyət Evinin rəhbəri
