“Azərbaycana ərazi iddiası olmayıb”
Məqsəd, guya, “Qarabağ xalqı”nın hüquq və azadlığının qorunması imiş. Bu cəfəngiyyatı avqustun 31-də https://ru.armeniasputnik.am/ xəbər portalı yayıb.
“Rəsmi İrəvan Rusiya Xarici İşlər Nazirliyi nümayəndəsinin Laçın dəhlizindəki vəziyyət barədə bəyanatına reaksiya vermişdir” adlı analitik məlumatda deyilir ki, Mariya Zaxarovanın indiki vəziyyətə görə, Ermənistanı ittiham etməsi əsassızdır. Xatırladaq ki, Mariya Zaxarova regiondakı son hadisələr barədə danışarkən demişdir ki, vəziyyətin mürəkkəbləşməsinin əsas səbəbi Ermənistan rəhbərliyinin 2022-ci ilin oktyabrında Paris Bəyannaməsinə imza atmasıdır. Həmin sənədə görə, Ermənistan Azərbaycanın ərazi bütövlüyünü tanıyır. Məhz həmin “tanımadan” sonra Azərbaycan Qarabağı öz ərazisi kimi nəzarət altına almağa başlayıb.
Rəsmi İrəvan Mariya Zaxarovaya xatırladır ki, Ermənistan rəhbərliyinin Azərbaycanın ərazi bütövlüyünü tanıması haqqında deyilənlər absurddur: “Axı rəsmi İrəvan heç zaman Azərbaycana ərazi iddiası etməyib. Qarabağ problemi heç zaman ərazi mübahisəsi olmayıb. Elə bir iddiamız yoxdursa, onda bizim həmin tanımaya imza atmağımıza nə ehtiyac var ki?”
Rəzilcəsinə və riyakarcasına yazırlar ki, biz 1988-ci ildən bəri Qarabağ ermənilərinin hüquq və təhlükəsizliyinin qorunmasına çalışmışıq: “Bunu dəqiq qiymətləndirmək üçün hadisələrin xronologiyasına nəzarət etmək kifayətdir”.
Erməni yalan “maşını” əlavə edir: “Azərbaycan tərəfi İrəvan rəhbərliyinin razılaşdığı sənədlərin heç birinin reallaşdırılmasına imkan vermir və üstəlik, Ermənistanla Qarabağ mövzulu heç bir məsələni müzakirə etməyəcəyini bildirir... Rusiya isə dediyi sözün üstündə durmur. Ona görə də Mariya Zaxarovanın İrəvanı qınaması əsassızdır”.
İttifaq MİRZƏBƏYLİ, XQ
