REPLİKA

Qarabağdakı separatçı rejimin “tarixində” son dərəcə kədərli hadisə baş verib. Rejimin lideri Arayik Arutyunyanın “Facebo­ok” səhifəsi bağlanıb. Bölgənin avantüristləri hay-küy qaldırıb­lar ki, bəs, səhifə Azərbaycan­dan olan çoxsaylı şikayətlər nəticəsində qapadılıb. 

Əlbəttə, səhifənin şikayətə görə qa­padılması praktikasının mövcudluğunu dana bilmərik. Heç şübhəsiz, Azərbay­candan da Arayiki bu yolla cəzalandır­maq istəyənlərin olması mümkündür. An­caq bu halların total xarakter daşıdığını düşünmürük. Çünki ölkəmizin sosial şə­bəkə seqmenti Arutyunyandan şikayət etmir, cavab verir, necə deyərlər ağzı­nın üstündən vurur. Cavablar içərisində Arutyunyanın terrorçu, separatçı, qatil olduğunun bildirilməsi birmənalı qayda­da var. Ancaq bütün bunlar “Facebook” rəhbərliyi üçün yalnız siqnaldır. Götürüb Arayikin kim olduğunu araşdıra və müəy­yənləşdirə bilərlər ki, bu şəxsin söylədik­ləri separatçılıqdır və... 

Bəli, azərbaycanlılar A.Arutyunya­nın səhifəsinin şikayətindən çox, onun səhifədə yazdıqlarının, paylaşdıqlarının cəfəng mahiyyətinin ifşasına köklənirlər. Bu, öz yerində. Ermənistanın baş naziri Nikol Paşinyanı da həmişə eyni aqibətə “qonaq edirlər”. Amma bu vaxtadək eşit­məmişik ki, Nikolun səhifəsi qapadılsın. Elə Arayik də indiyədək belə halla üzləş­məyib. Nəzərə alaq ki, 44 günlük müha­ribə zamanı istər Arutyunyan, istərsə də Paşinyan cəfəngiyyatı bir-birinə calamış­dı. Deməli, bir qədər mistikaya əsasla­naraq, bu nəticəyə gəlmək mümkündür ki, Arayikin sosial şəbəkə səhifəsinin bağlanması işarədir. Yəni, “Facebook” da mövqeyini ortaya qoyur. Mövqe isə belədir: Azərbaycan ərazisindəki sepa­ratçı rejim yox olmalıdır. Hələlik, yoxolma səhifədən başlanıb. 

Məsələyə başqa prizmadan diqqət yetirək. Məlumdur ki, Qarabağdakı sepa­ratçılığın çənbəri daralmaqdadır. Erməni əhali rejimə etiraz əlaməti olaraq bölgə­ni tərk edir. Bəli, məhz rejimə etirazdan söhbət gedir. O rejimə ki, əslində, onun özü getməli idi. Ancaq elə gərgin şərait yaratdı ki, necə deyərlər, çanaq sıravi ermənilərin başında partladı. Mövcud durumda Arayik də yaxşı görür ki, artıq onun özünü “Prezident” kimi adlandırma­sının heç bir əhəmiyyəti qalmayıb. Adam yoxdursa, kimə rəhbərlik edəsən? Ona görə çox güman, hansısa oyundan çıxıb ki, “Facebook” onun səhifəsini bağlasın və yazıb sarsaqlaya bilməsin. 

Daha bir məqama da diqqət yetirək. Fikir verin, Qarabağı erməni əhali tərk edir, Ermənistanın baş naziri Nikol Pa­şinyan isə hökumətin iclasında həyasız­casına bildirir ki, bəs onda Azərbaycan rəhbərliyinin, guya, gedənlərin geri qayıt­malarına imkan tanımayacağına dair mə­lumat var. Bu fikri elə həyasızcasına deyir ki, sanki ölkə rəhbəri yox, sosial şəbəkə fenomenidir. Yeri gəlmişkən, Nikol 2018-ci ildən bu yana baş nazirliyə qədərki qal­maqallı jurnalist ampluasından çıxmağı bacarmayıb. Dövlət adamı ola bilməyib. Guya, o görmür ki, Qarabağı tərk edən­lər köçlü-köməncli çıxırlar? Yaxşı anlayır ki, onlar qayıtmaq üçün getmirlər. Sa­dəcə, Azərbaycana ittiham yağdırmaq məqsədilə nəsə tapmaq, uydurmaq onun xislətindən, daxili mahiyyətindən, daha doğrusu, mahiyyətsizliyindən irəli gəlir. Nəzərə alsaq ki, Arayik Nikol obrazının daha kiçik prototipidir, o zaman birincinin azərbaycanlıların şikayəti əsasında “Fa­cebook” səhifəsinin bağlandığını iddia etməsində elə bir təəccüblü şey yoxdur. Düşüncəsi ora qədərdir. Heç şübhəsiz, bir-iki gündən sonra başqa nələrisə də uyduracaq. Boş-bekar adamdı... 

Hələlik, Arayikin “köməkçiləri” “Face­book” səhifənin silinməsi ilə bağlı qərarın ləğvi üçün sorğu və əsaslandırma gön­dəriblər. Bildiriblər ki, səhifənin 459 min abunəçisi var idi və “Artsax respublikası prezidenti”nin fəaliyyətinin şəffaflığının təmin edilməsində mühüm rol oynayır. Çox güman, elə-beləcə də yazıblar – “Artsax respublikasının prezidenti”. Bu başıboşlar Arayikə ən böyük pisliyi et­diklərinin fərqinə varmayıblar. Axı “Face­book”da sorğunu açıb oxuyanın ağlına gələcək ki, həmin o “Artsax”ı axtarıb tap­sın. Axtaranda görəcək ki, belə bir dövlət yoxdur. Bəlkə başqa əsaslandırma olsay­dı, səhifə açılar, Arutyunyan orada lətifə filan paylaşıb gününü keçirmək şansı qa­zanardı. İndi heç o da olmayacaq. 

Arayikin “komandasının” təmsil­çilərinin mövqeyinin absurdluğunu təsdiqləyən bir məqam da var. Onlar bildirirlər ki, “Facebook”un qərarı qəbuledilməzdir. Çünki Azərbaycan, guya, Qarabağ xalqını təcrid edir, Arayikin 459 min abunəçilik səhifəsi isə informasiya blokadasının qarşısında duruş gətirir. Böyük ehtimalla, növbəti mərhələdə er­məni lobbi və diaspor təşkilatlarının nü­mayəndələri Mark Zukerberqin ofisinin qarşısında aksiya filan da düzənləyə­cəklər. +18 film ulduzu Kim Kardaşyanın evinin qabağında “kömək et!” tələbi ilə piket düzənləyən zehniyyət sahiblərinin dediyimizi də gerçəkləşdirmək niyyətinə düşmələri tam mümkündür. 

Ə.RÜSTƏMOV, “Xalq qəzeti”