Bizim xarici siyasətimiz həyatda özünü təsdiqləyib və bu gün Azərbay­can beynəlxalq aləmdə çox böyük nü­fuza malik olan bir ölkədir. Biz növbəti illərdə də müstəqil xarici siyasət apa­racağıq, biz bunu indi də aparırıq. O qədər də böyük olmayan ölkələr üçün müstəqil xarici siyasət aparmaq heç də asan deyil, ancaq çox şərəflidir. Bəzi ölkələr başqa yol seçirlər, bəzi ölkələr başqa böyük ölkələrin qanadının altında yer alırlar. Bu, bəlkə daha rahat yoldur. Ancaq bizim yolumuz şərəfli yoldur, lə­yaqətli yoldur, bu, müstəqillik yoludur.

İlham ƏLİYEV

Azərbaycan Respublikasının Prezidenti

İyulun 5-də Bakıda Qoşulmama Hərəkatının Əlaqələndirmə Bürosunun nazirlər görüşü keçirildi. Mətbuat təmsilçiləri bu mötəbər təşkilatın paytaxtımızdan bütün dünyaya mesajlar verən möhtəşəm tədbiri haqqında, xüsusən, müzakirələrin ikinci günü imzalanan Bakı Bəyannaməsi barədə təəssüratlarını yekunlaşdırmamış həmkarlarımız daha bir mühüm tədbirin anonsunu manşetə çıxardılar: İyulun 7-də Azərbaycan Respublikasına rəsmi səfərə gələn Albaniya Respublikasının Prezidenti Bayram Beqayın rəsmi qarşılanma mərasimi olub.

Bu qonağın Bakıda keçirdiyi görüş­lər, aparılan müzakirələr, əldə edilən razılaşmalar və müəyyən edilmiş yeni əməkdaşlıq sahələri haqqında forma­laşdırılan xəbərlərin mürəkkəbi quru­mamış eşitdik ki, Bakıda “Azərbaycan Respublikasının Xarici İşlər Nazirliyi ilə Maldiv Respublikasının Xarici İşlər Na­zirliyi arasında əməkdaşlıq haqqında Anlaşma Memorandumu” imzalanıb. 

Yəni, dünya ictimaiyyəti öz qarşı­sında iqtisadi cəhətdən güclü, siya­si-diplomatik müstəvidə qətiyyətli, hər­bi sahədə qüdrətli Azərbaycan dövlətini gördükcə, rəsmi Bakı ilə əməkdaşlıq, dostluq etmək istəyən ölkələrin sayı durmadan artır. Ancaq biz ölkəmizin dostlarının artmasının səbəbini bu fakt­larla əsaslandırmağımıza baxmayaraq, beynəlxalq ictimaiyyətin müxtəlif qütb­lərini təmsil edən ekspertlər rəsmi Bakı ilə əməkdaşlığa maraq göstərənlərin sayının artmasını müxtəlif amillərlə əsaslandırırlar. Məsələn, ABŞ ekspert­ləri yazırlar ki, Azərbaycan Avropanın enerji təhlükəsizliyində mühüm rol oy­nadığına görə biz hamımız bu ölkə ilə əməkdaşlığa mühüm önəm verməliyik. Avropa siyasətçiləri və qanunvericiləri Azərbaycandakı daxili sabitliyi yüksək qiymətləndirir, Qoşulmama Hərəkatı­na üzv olan dövlətlər Prezident İlham Əliyevin təşəbbüskarlıq və qətiyyətini. Türkdilli Dövlətlər Təşkilatındakı tərəf­daşlarımız ölkəmizdəki xalq–iqtidar birliyini üstün tuturlar, İslam dünyasın­dakı dostlarımız milli-mənəvi dəyərlərə böyük önəm verməyimizi, dünya yəhu­diliyi isə hamıya nümunə olacaq mul­tikulturalizm siyasətimizi bayraq edir­lər. Dünyanın ən güclü dövlətlərindən olan Çin isə Qədim İpək Yolunun yeni variantı olan Şanxay–London iqtisadi layihəsinin reallaşdırılmasına xüsusi töhfələr verdiyimizə görə, daim Bakının mövqeyini dəstəkləyir. 

Bu məqamda xatırladım ki, bu il mayın 3-də ADA Universitetinin təş­kilatçılığı ilə Şuşada ümummilli lider Heydər Əliyevin 100 illik yubileyinə həsr olunmuş “Böyük Avrasiya geosi­yasətinin formalaşması: keçmişdən bu günə və gələcəyə” mövzusunda dör­düncü beynəlxalq konfransda dünya ekspertlərinin suallarını cavablandıran Prezident İlham Əliyev demişdi ki, bi­zim beynəlxalq aləmdəki nüfuzumuzun artması siyasi-diplomatik fəaliyyəti­mizə verilən qarşılıqların göstəricisidir. 

Dövlət başçımızın dostlarımız haqqında danışarkən Türkiyənin adı­nı daha əvvəldə çəkməsi də təsadüfi deyildi: “Türkiyə və Azərbaycanı rəs­mi olaraq müttəfiq edən Şuşa Bəyan­naməsi burada, Şuşada, bu binadan bir neçə metr aralıda imzalanmışdır. Bu, tarixi hadisə idi. Buna baxmayaraq, Azərbaycanla Türkiyə arasında müna­sibətlər de-fakto müttəfiq münasibətləri idi və biz bunu xüsusi olaraq son iyir­mi ildə nümayiş etdirmişdik. Prezident Ərdoğanın Türkiyəyə rəhbərlik etdiyi son iyirmi ildə bizim münasibətlərimiz mənim onunla birgə səylərimiz nəticə­sində təkcə qardaş xalqlar arasında deyil, eyni zamanda, müttəfiqlər ara­sında olan münasibətlərə çevrilmişdir”. 

Dövlət başçımız həmin tədbirdə xa­tırlatmışdı ki, biz Avropa İttifaqına üzv olan doqquz dövlət ilə strateji tərəfdaş­lıq sazişini və bəyannaməsini imzala­mışıq: “Beləliklə, bu, üzv dövlətlərin üç­dəbirini təşkil edir. Fərqi yoxdur, strateji tərəfdaşlıq haqqında imzalanmış və ya qəbul edilmiş bəyannamələr assosi­asiya sazişindən daha böyük dəyərə malikdir”.

Azərbaycan Prezidenti bir neçə gün əvvəl – iyulun 4-də Amerika Bir­ləşmiş Ştatlarının Prezidenti Cozef Baydenə milli bayram münasibətilə ünvanladığı təbrik məktubunda yazırdı ki, Azərbaycan Respublikası ilə Ameri­ka Birləşmiş Ştatları arasında əlaqələr dostluq və əməkdaşlıq zəminində di­namik inkişaf edərək bir sıra sahələrdə strateji tərəfdaşlıq səviyyəsinə yüksəl­mişdir: “Qlobal çağırışlara, beynəlxalq terrorizmə qarşı mübarizə, təhlükəsiz­lik məsələlərində fəal və səmərəli birgə işimiz, iqtisadi sahədə geniş spektrdə qarşılıqlı fəaliyyətimiz ikitərəfli müna­sibətlərimizi səciyyələndirən başlıca amillərdəndir”.

Dövlət başçımız beynəlxalq aləm­dəki iqtisadi layihələr barədə danı­şarkən, daim Çin iqtisadiyatına da toxunur. Prezident bu il yanvarın 17-də Davosda Çinin CGTN televiziya kana­lına verdiyi müsahibədə demişdi ki, biz müştərək faydanı görməyi öyrənmə­liyik: “Ərazimizdən nə qədər çox yük keçərsə, bizim bundan bir o qədər çox faydamız olar, bir o qədər də çox iş yer­lərimiz olar. Çinin artıq yeni bir dəmir yolu layihəsinin təşəbbüsü ilə çıxış et­diyini və onu artıq başladığını bilirəm – Çin-Qırğızıstan-Özbəkistan. Bu layihə də bizə, Xəzər dənizinə istiqamətlənib. Bu, çox vacib əlavə təchizat marşrutu­dur. Orta dəhlizin parlaq gələcəyi var”.

Bəli, Azərbaycan hamıya açıq ölkə olduğuna görə dostları da daim çoxalır, tərəfdaşları da. Elə ona görə də pay­taxtımız hər gün qonaq-qaralıdır. 

İttifaq MİRZƏBƏYLİ, “Xalq qəzeti”