Ermənistanın baş naziri Nikol Paşinyanı bir çox əməllərinə görə qınayırıq. O, ölkəsində də qınanır. Nəinki qınanır, təhqir də olunur ki, məqsədimiz bu barədə danışmaq deyil. Başqa mətləblərdən söz açacağıq.
Azərbaycan cəmiyyətinin fikrincə, Nikol siyasətçi kimi sözünün üstündə dayanan deyil, yəni qeyri-ciddi biridir, təfriqə və təxribat yaratmağa meyillidir və s. Ancaq insaf naminə onun müsbət addımlarından da söz açmaq lazımdır. Daha bilmirik, bu yazımız oxucular tərəfindən Paşinyanın işinə pozitiv qiymət kimi nəzərə alınacaq, ya yox, hər bir halda haqqında danışacağımız mövzu bütövlükdə hay cəmiyyətində geniş diskusiyalar doğurub.
Əlqərəz, erməni baş nazirin ölkənin gerbini dəyişdirmək təşəbbüsü, həqiqətən təqdirəlayiqdir. Hərçənd, baş nazir himnin sözlərinə də müdaxilənin vacibliyini vurğulayır ki, onun belə yanaşması ilə razılaşmamaq olar. Sonda nə üçün razılaşmadığımızı izah edəcəyik.
Hələlik qeyd edək ki, Ermənistanın hazırkı gerbində aslan və qartal təsvirləri yer alıb. Bu canlıların ikisi də özlərinin qorxmazlıqları ilə seçilirlər. Ümumiyyətlə, onlar böyüklüyü, mərdliyi və dəyanəti tərənnüm edirlər. Paşinyan isə deyir ki, 1991-ci ildə qəbul olunmuş gerbin müasir Ermənistanla heç bir əlaqəsi yoxdur.
Məsələ heç də onda deyil ki, 1991-ci ildə müasir Ermənistanın özünü aslan və qartal kimi hiss etməsi mənasız idi. Hesab etsək ki, erməni millətçiliyi Qarabağı və digər Azərbaycan ərazilərini işğal etməklə öyünürdü, həmin ildə təcavüz hələ gerçəkləşməmişdi.
Digər tərəfdən, Ermənistan 44 günlük müharibədə rüsvayçı məğlubiyyətə uğradı. Deməli, onun qartal və aslan təsvirinə eytiyacı qətiyyən yoxdur. Ancaq, obrazlı desək, aslanın qırxıldığını, qartalın isə toyuq kimi yolunduğunu vurğulamaq niyyətindən də uzağıq.
Söhbət heç ondan da getmir ki, Ermənistanın əzəmət kimi simvolizə olunan canlıları öz gerbində göstərməsi onların daşıdıqları anlamlara münasibətdə hörmətsizlikdir. Ancaq İrəvan hakimiyyətinin bunu nəzərə almalı və dəyişiklik aparmalı olduğu vacibdir.
Hələ bir təklifimiz də var: ölkə heyvanları müqəddəsləşdirmək istəyirsə, gərək, tülkü və çaqqala üstünlük versin. Bu iki məxluq tipik erməni xəstəliyinin mahiyyətinə hakim kəsilmiş xislətdədir. Hər ikisi ilk növbədə namərddir.
Həqiqətən də erməni avantürizmi tarix boyu nəyi əldə edibsə, ya tülkülüyün, ya da çaqqallığın hesabına edib. Nə aslan kimi döyüşüb, nə də qartal kimi çarpışıb. Müasir Ermənistan dövlətinin siyasəti də məhz həmin avantürizm üzərində qurulub. Deməli, ölkəni avantürizmdən qurtarmaq lazımdır ki, Paşinyan, belə demək mümkünsə, erməni damarı tutmayanda, bu barədə danışmağı və gündəm yaratmağı xoşlayır. Hərçənd deyə bilmərik ki, o, mövcud istiqamətdə uğurludur, çağırışları fayda verir. Baxın, çaqqallar və tülkülər bir neçə gün əvvəl hərbçilərimizi atəşə tutublar...
Əlqərəz, Nikol Ermənistanın gerbinin dəyişdirilməsi ideyası ilə çıxış edərkən, haqqında söz açdığımız erməni xəstəliyinə toxunur. Üstəlik, gerbin incəliklərinə diqqət yetirir. “Gerbimiz psixologiyamızı güclü şəkildə əks etdirir. Orada nə göstərilir? Ağrı dağında Nuhun gəmisi və Ermənistanın dörd sülaləsinin gerbləri. Bu yaxınlarda bir sualım oldu: hamımız üçün müqəddəs olan bu obrazın 1991-ci ildə qurulan dövlətə nə dəxli var? Mərkəzə baxanda Ağrı dağında Nuhun gəmisini və indiki Ermənistan Respublikasının su altında qalan ərazisini görmək olar. Orada uzun müddət Ermənistanın təbii şəraitində yaşamayan şiri də görmək mümkündür. Müzakirə etdiyimiz bu problem əslində bizim hər birimizdə olan ikililikdədir – tarixi Ermənistanla real Ermənistan arasındadır. Bütün müzakirəmizdə söhbət nədən gedir? Nə qədər emosional və hansı arqumentlərlə əsaslandırılmasından asılı olmayaraq, sual yaranır: həqiqi Ermənistan tarixi Ermənistana, yoxsa tarixi Ermənistan həqiqi Ermənistana xidmət etməlidir?”, - deyə Nikol ölkə parlamentindəki çıxışında vurğulayıb.
Erməni baş nazir qaldırdığı məsələni münaqişəsiz həll edə bilməyin mümkünlüyündən də söz açıb. O bildirib ki, tarixi Ermənistanın guya 12 paytaxtından 6-sı (?) Ermənistan Respublikasının ərazisində yerləşir. Ən əsası isə: “Sonuncu dəfə bu paytaxtlarda nə vaxt olmusunuz? Onlar hansı vəziyyətdədirlər? Ənənələr və dəyərlər haqqında çox danışırsınız. Bu gün tarixi rəmzlərimiz xarabalıqdadır”.
Əlbəttə, Paşinyan açıq şəkildə deyə bilməz ki, Ermənistan dövləti olmayıb və onun tarixi paytaxtı da yoxdur. Hərçənd, Nikolun hazırkı çıxışında söhbəti bir müddət əvvəl ortaya atdığı “kadastr şəhadətnaməsi” üzərinə gətirməsi, elə qeyd etdiyimiz məqamın ifadəsi kimi diqqət çəkməkdədir.
Yeri gəlmişkən, bildirək ki, Nikol ölkəyə “kadastr şəhadətnaməsi” almaq istəyindən söz açarkən, faktiki olaraq hazırkı Ermənistanın bir dövlət kimi mövcud olmadığını vurğulamış, həmçinin bildirmişdi ki, indi ölkəsinə, belə demək mümkünsə, “kupça” almaqla, onun gələcək nəsillərə miras kimi saxlanılmasını istəyir.
Baş nazirin mövcud xüsusda söylədiklərinin də hay cəmiyyətində böyük hiddət doğurduğunu vurğulamalıyıq. Həmin vaxt Nikolu sərt tənqidə məruz qoyanlardan biri müxalifətin parlament fraksiyasının üzvü Qeqam Manukyan idi. Nikol parlamentdə gerb və himn dəyişikliyinin zəruriliyinə aydınlıq gətirərkən, həmin Manukyanın səsləndirdiyi fikirlərə reaksiya verib.
Qeyd edək ki, Manukyan baş nazirin qaldırdığı “kadastr şəhadətnaməsi” məsələsinə toxunaraq bildirmişdi ki, əgər Ermənistan hakimiyyəti belə bir sənədi axtarırsa, onu respublikanın gerbi haqqında qanununda tapmalıdır. Nikol isə hesab edir ki, Manukyanın yanaşması Ermənistan üçün təhlükə yaradır. “Əgər bəyan etsək ki, bu (gerb – red.), bizim kadastrla bağlı sənədimizdir, bu o deməkdir ki, “bizi məhv edin” demiş oluruq”, - deyən baş nazir əlavə edib ki, özündən vətənpərvər kimisə təsəvvürə gətirmir. Yəni, faktiki olaraq, öz doğruluğu üzərində israr edir və şəxsinə ünvanlanacaq əks reaksiyalara qarşı, bir növ, daxili müqavimət, immunitet formalaşdırır.
Bəli, N.Paşinyan gözəl bilir ki, ölkənin nəinki gerbi, eləcə də bir sıra atributları ərazi iddiası üzərində qurulub. Ən başlıcası isə gerbin aşıladığı düşüncə cəmiyyətdə psixoz yaratmaqdadır. Məsələn, Qarabağ münaqişəsi və Azərbaycanla münasibətlər fonunda psixoz hələ də davam edir. Ən pisi isə budur ki, bu hal Paşinyan başda olmaqla, Ermənistan dövlətinin də fəaliyyətinə təsirsiz ötüşmür. Yəni, ölkə iqtidarı xəstəliyin təsiri altına düşmək məcburiyyətində qalır. Ancaq başqalarından fərqli olaraq, Nikol gedişatın ölkəni məhvə apardığını anlayır.
Gələk, sonda toxunmağı vəd etdiyimiz məqama. Paşinyanın ölkənin gerbini dəyişdirmək niyyətindən söz açdıq. Himnə gəlincə, onun fikrinə görə, himnin sözləri qaydasında olsa da, sonluğu ölüm səhnəsinin təsviri ilə başa çatır ki, bu, yolverilməzdir.
Əslində isə, Nikol haqsızdır. Çünki nə o, nə də komandası barəsində söz açdığımız psixozu dəyişdirmək iqtidarında görünmür. Belə olan təqdirdə isə Ermənistanın himninin son sözlərindəki fikirlərin saxlanılması yerinə düşür. Axı ölüm varsa, onun ifadəsi üçün rekviyem də lazımdır. Ermənistan dövləti hazırkı destruktiv mövqeyi ilə həmin rekviyemin yüksək səslə bəyan edilməsinə doğru gedir.
Ə.RÜSTƏMOV, “Xalq qəzeti”