Atəşi birinci erməni tərəfi açıb. Bu, ilk dəfə deyil və 15 iyun təxribatı qətiyyən təsadüf sayıla bilməz. Səbəblər aydındır, təxribatın hazırlanması və həyata keçirilməsinin ideya müəllifləri barədə isə hələlik ehtimalla danışa bilərik.
Türkiyə Prezidenti Rəcəb Tayyib Ərdoğanın, ardınca Pakistanın Baş naziri Şahbaz Şərifin Azərbaycana səfərləri və bu iki qardaş ölkənin liderlərinin Bakıdan səsləndirdikləri bəyanatlara diqqət yetirək. Xüsusilə Rəcəb Tayyib Ərdoğanın Bakı və İrəvan arasında davam etdirilən sülh danışıqları, Zəngəzur dəhlizinin açılması, Şuşada Türkiyənin Baş konsulluğunun açılacağı ilə bağlı yaxın qonşularımıza, eləcə də Cənubi Qafqazda maraqlarını güdən dünya güclərinə verdiyi mesajlar İrəvanda və onun tərəfdarlarında şok effekti və qıcıq doğurmaya bilməzdi. Türkiyə liderinin Zəngəzur dəhlizinin açılmasına tək Tehranın mane olduğunu söyləməsi isə yuxarıdakı ehtimal versiyalarından birinin üstünə işıq sala bilər.
“Biz 10 noyabr 2020-ci il tarixli üçtərəfli bəyanatda nəzərdə tutulduğu kimi, regiondakı nəqliyyat-kommunikasiya xətlərini açmağa hazırıq”. Bunu Ermənistanın baş naziri Nikol Paşinyan, sanki heç nə olmayıbmış kimi, hökumətin iclasında dilə gətirib. Hayastanın keçmiş baş naziri Qrant Baqratyanın açıqlaması isə daha çox maraq doğurur: “Sülh sazişi imzalandıqdan sonra Rusiya sülhməramlı kontingentini saxlamağın sadəcə mənası qalmayacaq. İndi bu, artıq ona görə problemdir ki, həmin sülhməramlılar Laçın dəhlizinə nəzarət etməyi bacarmır və istəmirlər”.
Bayrağımıza tuşlanan güllə
İyunun 15-i saat 08:45-də Dövlət Sərhəd Xidmətinin hərbi qulluqçusu, gizir Elşən Rüstəmov postda Azərbaycan Bayrağını qaldırarkən xain erməni snayperinin güləsinə tuş gəlib. Sərhədçimiz şərti sərhədin o üzündən, yəni Ermənistan ərazisindən açılan atəş nəticəsində yaralanıb. Bununla bağlı Dövlət Sərhəd Xidmətinin məlumatında deyilir ki, yaralanmış hərbi qulluqçumuza ilkin tibbi yardım göstərilmiş, həyatı təhlükəsi yoxdur. Dünən DSX rəisinin müavini general-leytenant Cavid Abdullayev hazırda müalicəsi Kliniki Tibbi Mərkəzdə davam etdirilən hərbi qulluqçumuzu ziyarət edib.
Əvvəlcədən planlaşdırıldığı şübhə doğurmayan erməni hərbi təxribatının budəfəki coğrafiyası geniş olub. İyunun 16-sı saat 00:15-dən saat 00:20-dək Basarkeçər rayonunun Göysu yaşayış məntəqəsi istiqamətindəkı mövqelərdən Ordumuzun Gədəbəy rayonunun Qalakənd yaşayış məntəqəsi istiqamətində olan mövqeləri atıcı silahlardan atəşə tutulub. Həmin gecə saat 00:50-dən saat 04:10-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri tərəfindən Ordumuzun Şuşa istiqamətində yerləşən mövqeləri də fasilələrlə atəşə məruz qalıb. Atəşkəs rejiminin bir deyil, daha çox nöqtədə pozulması faktı “nizamlanmış əməliyyat planı”ndan xəbər verir.
“Həkəri çayının Laçın rayonu ərazisindən keçən hissəsindəki körpünü Azərbaycan bu yaxınlarda inşa edib. Ermənistan isə orada Azərbaycan bayrağının dalğalanmasının əsassız olduğunu iddia edir”. Bunu Azərbaycan Xarici İşlər Nazirliyinin mətbuat katibi Ayxan Hacızadə “Twiter”də yazıb. XİN rəsmisi xatırladıb ki, iyunun 15-də öz suveren ərazimiz olan Həkəri körpüsündə Azərbaycan bayrağı ucaldılıb, bu zaman Ermənistan silahlı qüvvələrinin bölmələri hərbi qulluqçularımıza atəş açıblar.
Əsas plan: dəhliz təxribatı
Qeyri-rəsmi razılaşmaya əsasən, İrəvan Bakının Laçın yolunda sərhəd-keçid postunu qoymasını Zəngəzur dəhlizində də eyni rejimin tətbiq edilməsi şərti ilə qəbul etdi. Fəqət, Azərbaycan Laçın yolunda istədiyinə nail olsa da, Zəngəzur dəhlizi məsələsini kənara qoymadı. Əslində Türkiyə və Rusiyanın bu məsələdə eyni baxışı nümayiş etdirməsi, avtomatik olaraq Bakının mövqeyini gücləndirən amil kimi qəbul olunmalıdır. Zəngəzur dəhlizinin reallaşmasını ləngitməklə özünü diplomatik labirintə salan Ermənistan rəhbərliyi Laçın yolundakı Həkəri postunu ləğv etmək qərarına gəlibmiş. İyunun 15-dək bunu danışıqlarda dilə gətirən İrəvan artıq bu niyyətini əməldə “sübut etməyə” girişib. Kənardan görünən mənzərə belədir. Hayların belə riskli addımı atmağa təhrik edildikləri şübhə doğurmasa da, hərbi təxribata start düyməsinin haradan basıldığı hələlik aşkar görünmür. Onların bununla Bakıya təzyiq vasitəsi kimi Laçın postunun fəaliyyətini iflic etməyi hədəfləməsi ehtimalını ciddi qəbul etmək isə tam mümkündür. Artıq postda hərəkət müvəqqəti olaraq dayandırılıb. İrəvan durumdan beynəlxalq müstəvidə Bakıya təzyiq üçün yararlana bilərmi? Onun bununla Zəngəzur dəhlizi məsələsində mövqeyini gücləndirməyə, Həkəri postunda Qarabağın erməni sakinləri ilə azərbaycanlıların təmaslarının qarşısını almağa cəhd göstərəcəyi şəksizdir. Laçın postunun ardınca Şərqi Zəngəzurda – Zəngilanda dəhliz istiqamətində hücumları, planlanmış “dəhliz təxribatı” ssenarisinin tərkib hissəsi olub. May ayının sonlarında mövcud istiqamətdə erməni diversiya qrupunun hücumu da buna hesablanmışdı. Yəni, eyni izlərin aparıb çıxardığı oxşar dəst-xətt.
Bəli, münaqişədə tərəf sayılan bəzi güclərə Qarabağ ermənilərinin Azərbaycan cəmiyyətinə inteqrasiyası, o cümlədən Xankəndi–Laçın yolundakı sərhəd postumuzun sabit və normal fəaliyyəti sərf eləmir.
Azərbaycan Dövlət Sərhəd Xidmətinin məlumatında deyilir ki, cavab tədbirləri nəticəsində Ermənistan silahlı qüvvələrinin Zəngilan istiqamətində təxribata başladığı postu darmadağın edilib. Bu addım Ermənistan silahlı birləşmələrinin sərhəd zastavasına atıcı silahlardan atəş açmasına, daha sonra isə minaatan artilleriya və digər döyüş sursatlarını işə salmasına cavab olaraq atılıb.
Prokurorluq ultimatum verdi
Erməni separatçılarının növbəti təxribatı ilə bağlı Baş Prokurorluğun Mətbuat xidmətinin yaydığı məlumatda qeyd olunur ki, prokurorluq əməkdaşları tərəfindən hadisə (Həkəri postu) yerinə baxış keçirilərək cinayətin izləri rəsmiləşdirilib, maddi sübutlar götürülüb. "Müəyyən edilib ki, Ermənistan Respublikasının Silahlı Qüvvələrinin qeyd edilən cinayət əməlləri nəzarət məntəqəsinə ziyan vurub və həmin təxribat nəticəsində postun iş rejimi pozulub. Ermənistanın təxribat hücumundan sonra Azərbaycan Laçın postunu bağlayıb: İrəvan təxribata görə məsuliyyəti üzərinə götürməyənə, baş verənlərlə bağlı tədqiqat aparılmayana qədər post istifadəyə açılmayacaq”, – məlumatda deyilir.
Hərbi təxribat törədildiyi zaman Sankt-Peterburqda Rusiya və Ermənistanın baş prokurorları ilə görüşən Baş Prokuror Kamran Əliyev orada bəyanatla çıxış edib. O, iyunun 15-də Ermənistanın silahlı qüvvələri tərəfindən terror-təxribat əməlləri növbəti dəfə davam etdirilməklə müxtəlif çaplı odlu silahlardan ölkəmizin suveren ərazisi olan Laçın–Xankəndi avtomobil yolunun başlanğıcında yerləşən Laçın sərhəd nəzarəti məntəqəsinə dislokasiya olunmuş və ərazidə xidmət göstərən DSX-nin hərbi qulluqçularına atəşlərin açıldığını, nəticədə 1 nəfər hərbi qulluqçumuzun yaralandığını diqqətə çatdıraraq, bu kimi təxribat xarakterli addımların bölgədə sülhün bərqərar olmasına maneə olduğunu bildirib.
Dövlət Departamentinin narahatlığı davam edir
“ABŞ şərti Azərbaycan–Ermənistan sərhədindəki vəziyyətdən narahatdır”. Bu sözləri ABŞ Dövlət Departamentinin sözçüsü Metyu Miller keçirdiyi növbəti brifinqdə deyib. “Biz bu vəziyyətdən narahat olmağa davam edirik və hər iki tərəfi qalan fikir ayrılıqlarını aradan qaldırmaq üçün birlikdə işləməyə çağırırıq”, - deyən cənab Miller Vaşinqtonun mövqeyini bir daha təkrarlayıb. Sülh sazişinin hələ də əldə edilə biləcəyini vurğulayan Dövlət Departamentinin rəsmisi “Biz inanırıq ki, razılaşma hələ də əldə edilə bilər və irəli getmək üçün hər iki tərəflə görüşməyi səbirsizliklə gözləyirik”.
Sülh danışıqlarının əsas trekinə çevrilməkdə olan Vaşinqton platformasında dialoqun ləngiməsindən Bakı da narahatdır, amma səbirlə güclərin “münasibətlərini aydınlaşdırmasının” sonunu gözləyir.
Bu arada Rusiyanın və Ermənistanın bəzi media resursları RF XİN-dəki anonim mənbəyə istinadla xəbər yayıblar ki, guya Ağ ev Qarabağ ermənilərindən Bakı ilə neytral zonada danışıqlar aparmağı tələb edib. Əks təqdirdə Azərbaycan Ordusu tərəfindən xüsusi əməliyyatın keçirilməsi qaçılmaz olacaqmış. Qaynaqsız feyk xəbərlərin təşkilatçıları “dəhliz təxribatı”nı hazırlayanlarla eyni cəbhənin “döyüşçüləridirlər”. Görünür, bu kontekstdə onlara Bakının mövqeyini bir daha xatırlatmağa ehtiyac var. Qarabağ separatçıları ilə üçüncü ölkədə heç bir danışıq olmayacaq, eləcə də beynəlxalq nəzarət mexanizmi məsələsi də gündəliyə salınmayacaq. Hayların bütün bu ideoloji hazırlıqlarının sülh prosesində alternativ treklər üçün əlavə başağrısı yaradılmasına xidmət etdiyi məlumdur. Azərbaycanın Qarabağın bütün ərazisi üzərində suvereniteti müzakirə predmeti ola bilməz. Ermənistanın sülh prosesinə qarşı etdiyi “səlib hücumlarında” Rusiya kimi İranın da bu və ya digər formada iştirakı istisna edilməməlidir. Bakı vətəndaşına çevriləcək Qarabağın erməni sakinlərinin ehtiyaclarını təmin etməyə hazırdır və bunu xeyli öncə də bəyan etmişdi. Onların zəruri tələbat mallarının Ermənistandan deyil, Bakıdan göndəriləcəyinə az qalıb. Bununla da, erməni əhalisinin reinteqrasiyası, Xankəndidə mərkəzi hakimiyyətin bərpası prosesi yekunlaşmış olacaq.
Hər şey sonluğa doğru
Laçın yolunda qurduğumuz Həkəri sərhəd-keçid məntəqəsindən erməni əsilli Azərbaycan vətəndaşlarının, humanitar yüklərin sərbəst hərəkət etməsinə bölgədə marağı olan bütün tərəflər şahid oldular. Bunu anlamaq və qəbul etmək istəməyən rəsmi İrəvan və Araikin separatçı rejimi özlərində sərhədçimizə atəş açmaq cəsarətini tapır. Deməli, yolunu və başını itirmişlərin sonuncu “nəğmələri” belə olurmuş. Bəli, bu gün həmin yoldan icazəsiz quş da uça bilməz. Deyəsən, Ermənistana bunu bir daha başa salmağa və yerini göstərməyə zərurət yaranıb. Həm şərti sərhəddə, həm Şərqi Zəngəzurda, həm də Şuşa və Gədəbəydə törədilən silahlı insidentlərə görə bütün məsuliyyət Ermənistanın, eləcə də ona aşkar və gizlin dəstək verənlərin üzərinə düşür. Onlar üzərlərinə düşən bu məsuliyyət yükünün ağırlığını tezliklə hiss edəcəklər.
Üzeyir CƏFƏROV,
ehtiyatda olan polkovnik, hərbi ekspert
Ermənistanın növbəti hərbi təxribatlarının indiki məqamda baş verməsi təsadüfi sayıla bilməz. Türkiyə Prezidenti Rəcəb Tayyib Ərdoğanın, ardınca Pakistanın Baş naziri Şahbaz Şərifin Bakıya səfərləri və onların buradan sülh prosesi, xüsusilə Zəngəzur dəhlizi ilə bağlı region ölkələrinə, eləcə də dünya güclərinə verdilkləri mesajlar İrəvanda və onun tərəfdarlarında qıcıq yaratmaya bilməzdi. Amma Azərbaycan Ordusu, Dövlət Sərhəd Xidməti hər an istənilən təxribatın qarşısını almağa və düşmənin layiqli cavabını verməyə hazırdır. DSX-nin sərəncamında ən müasir artilleriya qurğuları, hücum və kəşfiyyat PUA-ları mövcuddur. Sərhədçilərimizin atıcı və digər silahlardan, hərbi texnikadan istifadəsi Müdafiə Nazirliyimiz ilə demək olar ki, eyni səviyyədədir. İki gün əvvəl bütün bu imkanlardan istifadə edən qəhrəman sərhədçilərimiz təlimlərdə qazandıqları peşəkarlıqla Zəngilan istiqamətində mövqelərimizi atəşə tutan düşmən postlarını məhv edib, onlara layiqli cavab verib. DSX-nin təxribatların qarşısının alınmasında heç bir sıxıntısı və narahatlığı yoxdur. Sərhədçilərimiz 44 günlük müharibədə böyük döyüş təcrübəsi qazanıb və bu təcrübə komandanlığın mütəmadi keçirdiyi təlimlərlə müasir tələblərə uyğun şəkildə möhkəmləndirilir. Ona görə də sərhədçilərimiz çox rahat şəkildə düşmənin atəş nöqtələrini, postlarını darmadağın edir.
İmran BƏDİRXANLI, “Xalq qəzeti”