Hayastan mediasının yaydığı məlumatlardan bu qənaət hasil olur ki, Laçın ultimatumundan sonra Qarabağdakı separatçı rejim üçün təslim olmaqdan savayı xilas variantı qalmayıb
Prezident İlham Əliyevin mayın 28-də Laçın şəhərinə qayıdan əhali ilə görüş zamanı etdiyi çıxış Azərbaycanın Qarabağ iqtisadi rayonunun Rusiya sülhməramlı kontingentinin müvəqqəti məsuliyyəti altında olan hissəsində yaşayan ermənilərin separatçı “qlavar”ları arasında ciddi təşviş doğurub.
Qeyd edək ki, cənab İlham Əliyev laçınlılarla görüşdə 44 günlük Vətən müharibəsindən ötən iki il yarım ərzində bütün planlarımızın ardıcıllıqla, tədricən həyata keçdiyini və bildirib. Dövlət başçısı əmin edib ki, son addım da atılacaq. Prezident onu da bildirib ki, separatçılar üçün yeganə yol Azərbaycan qanunlarına tabeçiliklə loyal, normal vətəndaşı olmaq, öz dırnaqarası saxta dövlət atributlarını zibil yeşiyinə atmaq, “parlament”i buraxmaqdır: “Biz, sadəcə olaraq, dözüm göstəririk. Halbuki hər kəs yaxşı bilir ki, bu gün o bölgədə istənilən əməliyyatı keçirmək üçün hər bir imkanımız var. Ona görə “parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və digərləri öz vəzifələrini artıq kənara qoymalıdırlar. Ancaq o təqdirdə onlara güzəşt oluna bilər. Ancaq o təqdirdə hər hansı bir amnistiyadan söhbət gedə bilər. Onu da bildirməliyəm ki, son vaxtlar beynəlxalq təşkilatlar faktiki olaraq bizim mövqeyimizlə tamamilə razılaşıblar. Bunu mən müxtəlif görüşlər əsnasında artıq görürəm”.
Yeri gəlmişkən, qeyd edək ki, ABŞ Dövlət Departamenti Azərbaycan Prezidentinin Qarabağdakı separatçılarla bağlı amnistiya bəyanatını alqışlayıb. Dövlət Departamentinin sözçüsü Metyu Millerin yaydığı bəyanatda deyilir: “Biz Ermənistanla Azərbaycan arasında danışıqların davam etdiyini görməkdən şadıq. Dövlət katibi Blinkenin dediyi kimi, Cənubi Qafqazda sülh əldə edilə bilər. Biz bu yaxınlarda baş nazir Paşinyanın sülhə sadiqliyini alqışladıq və Prezident Əliyevin amnistiyanı müzakirə etmək istəyi ilə bağlı son bəyanatlarını alqışlayırıq”.
***
“Hraparak” qəzeti yazır ki, N.Paşinyanın sülh sazişini imzalamağa hazır olmasını bəyan etməsindən sonra separatçı tör-töküntülərinin iki başçısı – Araik Arutyunyan və qondarma rejimin “təhlükəsizlik şurası”nın sabiq katibi Samvel Babayan arasında gərginlik silahlı toqquşma həddinə çatmaq üzrədir. Belə ki, baş separatçı Arutyunyan Babayanın planlarına əngəl olmağa çalışır. İddialara görə, Babayan kütləvi etiraz aksiyaları ilə 2018-ci ilin mayında Ermənistanda baş vermiş “məxməri inqilab”ı Xankəndidə təkrarlamaq niyyətindədir. Qəzetin bildirdiyinə görə, Arutunyanın ərazidə “hərbi vəziyyət” dövründə söz azadlığının məhdudlaşdırılması ilə bağlı son “qərarları” rus sülhməramlılarının təklifi ilə qəbul edilib. Məqsəd daxili gərginliyin qarşısını almaq, daha doğrusu, Babayanın planlarına mane olmaqdır. Xatırladaq ki, mayın 26-da separatçı rejimin başçısı ermənilərin “öz müqəddəratını təyinetmə hüququ”nun həyata keçirilməsi istisna olmaqla, bütün növ toplantıları qadağan edərək, hərbi vəziyyətlə bağlı əlavə məhdudiyyətlər tətbiq edib, habelə bayram və anım günləri, həmçinin informasiya sahəsində müəyyən qadağalar qoyub.
Ermənistan KİV-lərinin yaydığı məlumatlar da separatçıların Azərbaycana təslim olmaqdan başqa xilas variantının qalmadığını göstərir. Məlumata görə, Ermənistan baş naziri bugünlərdə yaxın ətrafı ilə qapalı iclas keçirib. İclasda mayın 25-də Moskvada baş tutan üçtərəfli görüşün bəzi detallarını açıqlayıb və Qarabağ separatçılarının gələcək taleyi ilə bağlı yalnız iki ssenarinin gündəmdə olduğuna eyham vurub. “Hraparak” qəzetinin baş nazirlə görüşün iştirakçılarından birinə istinadən verdiyi məlumatdan belə anlaşılır ki, N.Paşinyan Qarabağ separatçılarının artıq “ordu”ya, silahlı dəstələrə malik olmasının qeyri-mümkünlüyünü bildirib. Baş nazir vurğulayıb ki, rəsmi Bakı Xankəndi və ətraf bölgələrdəki bütün silahlı dəstələrin tərk-silah olunmasında prinsipial mövqe tutur və bu mövqeyindən geri çəkilmək niyyətində deyil. Paşinyanın fikrincə, indiki situasiyada proseslərin inkişaf istiqamətləri ilə bağlı iki mümkün variant var. Əgər Azərbaycan yerli ermənilərin hüquq və təhlükəsizliyini təmin edərsə, o zaman prinsipcə gözlənilməz heç bir problem yaranmayacaq. Əks halda, Ermənistan hakimiyyəti hər kəsin öz ərazisinə köçürülməsini təmin etmək məcburiyyətində qalacaq.
Qarabağdakı bəzi separatçı başçılar isə hələ də xam xəyallarla yaşamaqda davam edirlər. Onlar Azərbaycana qarşı çıxmaq üçün əllərində heç bir resursun olmamasına, hər tərəfdən üzük qaşı kimi dövrəyə alınmalarına baxmayaraq, revanşist açıqlamalar səsləndirirlər. Belələrindən biri fevral ayında Azərbaycanın tələbi ilə separatçı rejimin “dövlət naziri” vəzifəsindən uzaqlaşdırılan Ruben Vardanyandır. O, Ermənistan televiziyasına müsahibəsində bildirib ki, geri çəkilməyə yer yoxdur, qərar qəbul etmək lazımdır və hər gün hazırlaşırlar: “İlk növbədə, Arayik Arutyunyan mühüm addımlar atmalıdır. Geri çəkilmək üçün heç bir yer yoxdur, qərar vermək lazımdır. Hər kəs vəziyyəti anlayır və əlimizdə olan qüvvələrlə vətənimizi müdafiə etməyə hazırlaşmalıdır”. Onun sözlərinə görə, Azərbaycan onlar üçün heç bir seçim qoymur. “Biz hər şeyə hazırlaşmalıyıq. Bu vəziyyətdə öz gücümüzə arxalanmalıyıq. Dünyaya başa salmağa çalışmalıyıq ki, bu gün baş verənlərin Azərbaycanın istədiyi yanaşmaya uyğun həlli yoxdur. Biz Azərbaycanın bir hissəsi olmaq istəmirik. Bu, ermənilərin Qarabağdan qovulmasına gətirib çıxaracaq ki, bizim üçün qəbuledilməzdir. Biz vəziyyəti başa düşürük və hər gün hazırlaşırıq. Lazımi səviyyədə hazır olmaq üçün hər şeyi edirik, mövqeyimiz aydın və konkret olacaq”.
Bu arada Avropa İttifaqı Şurasının rəhbəri Şarl Mişelin “Tvitter”də etdiyi paylaşımda bir daha “keçmiş Dağlıq Qarabağ Muxtar Vilayətində yaşayan ermənilər” ifadəsini işlətməsi separatçıları pərt edib. Qeyd edək ki, Ş.Mişel mayın 30-da yazıb: “Bakı ilə keçmiş Dağlıq Qarabağ Muxtar Vilayətində yaşayan ermənilərin hüquqları və təhlükəsizliyi ilə bağlı dialoq indi mühüm əhəmiyyət kəsb edir. Maksimalist mövqelərdən çəkinmək və dialoqa çalışmaq vacibdir. 30 ildən çox davam edən münaqişədən sonra yaraların sağalması vaxt alır. Cəsarətli qərarlar lazımdır”.
Qondarma rejimin “ombudsman”ı Geqam Stepanyan bununla bağlı sosial şəbəkə hesabında qeyd edib ki, Avropa İttifaqını təmsil edən Aİ Şurasının Prezidenti Şarl Mişelin onilliklər boyu mövcud olan faktlara (?) məhəl qoymadan “Artsax xalqı”na “keçmiş Dağlıq Qarabağ Muxtar Vilayətində yaşayan ermənilər” kimi müraciət etməsi çox məyusedicidir”. Separatçı məmur bu faktın Brüsselin moderatorluğu ilə aparılan sülh danışıqlarına guya əngəl olacağını iddia edib.
Göründüyü kimi, separatçılar məyusdur. Onlar son vaxtlar beynəlxalq təşkilatların Prezident İlham Əliyevin qeyd etdiyi kimi, faktiki olaraq bizim mövqeyimizlə tamamilə razılaşmasından pəjmürdə vəziyyətdədirlər. Bu səbəbdən də aralarında tərəddüd, xaos, başıpozuqluq hökm sürür. Əslində, aqoniyaya bənzər bu vəziyyət 2020-ci ilin Vətən müharibəsindəki sarsıdıcı məğlubiyyətdən sonra başlayıb. Ötən iki il yarım ərzində Azərbaycanın qazandığı yeni hərbi-siyasi-diplomatik qələbələr Ermənistanı, onun tərəfdaşlarını və Qarabağdakı separatçıları mat vəziyyətinə qoyub. Cənab Prezidentin 28 may tarixli xəbərdarlığı isə onların qürubunun başlanğıcıdır. Mahiyyətindən, arxasında dayanan qüvvələrdən asılı olmayaraq, bu dəstələr artıq batmaqda olan gəmidən canlarını qurtarmağa çalışan siçovulları xatırladır...
Aydın QULİYEV,
politoloq
– Azərbaycan Prezidentinin birmənalı və sərt mesajlarından sonra Qarabağdakı separatçıların və onların əlində girov qalan sadə insanların bundan sonrakı fəaliyyəti, təbii ki, çox maraqlı olacaq. Ona görə ki, separatçılar Qarabağda müstəqil qərar qəbul etmirlər. Əgər onlar müstəqil qərar qəbul edə bilən qüvvələr olsaydılar, indiki ağır duruma gəlib düşməz və Azərbaycan Prezidentinin qətiyyətlə söylədiklərindən lazımi nəticə çıxarardılar. Bu fikirlər sadədir, birmənalıdır; Azərbaycan dövlətinin suverenliyini, onun Konstitusiyasını qəbul etmək, qanunlarına tabe olmaq, reinteqrasiya etmək, dövlətçilik oyunu oynamaq kimi qeyri-ciddi əməldən geri çəkilmək. Cənab Prezident bu mesajları separatçılara aydın və qətiyyətli tonda bildirdi.
Şübhəsiz ki, Qarabağda müxtəlif dünya güclərinin sifarişlərini həyata keçirən separatçıların əlində, sözün həqiqi mənasında, girov saxlanılan insanlar arasında başqa cür düşünənlər var. Yəqin ki, Azərbaycan Prezidentinin birmənalı mesajları sadə ermənilərin və separatçı hərəkətlərlə müxtəlif sifarişləri yerinə yetirən odioz qüvvələrin fəaliyyətində özünü müxtəlif cür büruzə verəcək. Separatçılar təbii ki, hələlik silahı yerə qoymaq, Azərbaycan qanunlarına tabe olmaq ovqatı nümayiş etdirmirlər. Digər tərəfdən, yaxşı başa düşürlər ki, daha üçüncü dəvət olmayacaq. Anlayırlar ki, Azərbaycan istənilən addımı ata bilər. Belə şəraitdə separatçılar özlərini qorumaq üçün sifarişlərini yerinə yetirdikləri dünya mərkəzlərinə müraciət edəcək, kömək istəyəcək, Parisin qapılarını yağır edəcəklər. Başqa ölkələrin qapılarında özlərinə yenə əvvəlki kimi himayə axtaracaq və yaranmış bu mürəkkəb durumdan çıxmağa çalışacaqlar. Ancaq çıxış yolları yoxdur.
İstisna etmirəm ki, Xankəndidə girov qalmış sadə və açıq düşüncəli müəyyən insanlar isə başqa ovqat nümayiş etdirə bilərlər. Hətta onların separatçı qüvvələrin əleyhinə açıq-aşkar çıxışlara başlamaları da mümkündür. Azərbaycan cəmiyyətinə dinc inteqrasiya və Azərbaycan dövlətinə sığınmaq Xankəndidəki sadə ermənilərin müəyyən hissəsinin artıq qəbul etməyə başladığı reallıqdır. Ona görə də Azərbaycan Prezidentinin qəti mesajlarının ciddi nəticələr verəcəyinə və Xankəndidə həm separatçılara, həm də onların əlində girov qalan sadə insanlara təsir göstərəcəyinə əminəm.
Səxavət HƏMİD, “Xalq qəzeti”