Son vaxtlar ölkə mediasında respublikamızda fəaliyyət göstərən taksi xidmətlərində ciddi qanunsuzluqlar nəzərə çarpması, xüsusilə, kartla ödəniş zamanı sərnişinlərə qarşı kobud rəftar edilməsi ilə bağlı çoxsaylı materiallar verilir. Əlbəttə, bu məqamda taksi sürücülərinin şikayətləri də yer alır. Onlar tərəfindən daşımada əziyyətin çox olmasına baxmayaraq, az gəlir əldə edildiyi bildirilir. Bütün bunlarla bərabər, hətta ölkədə taksi sıxlığının olduğu böyük narahatlıqla dilə gətirilir ki, belə vəziyyətin isə küçə və prospektlərdə hərəkətin pozulmasına, qəzaların artmasına gətirib çıxardığı diqqətə çatdırılır.
Ekspertlər və sərnişinlərin ən çox narazılıq etdikləri məsələlər sırasında taksi sürücülərinin bir çox hallarda etik davranış qaydalarına laqeyd münasibət bəsləmələri geniş yer alır. Bunun isə sürücülərin işə qəbul edilərkən onların taksi fəaliyyətinə yararlı olub-olmamalarının yoxlanılmasına laqeyd yanaşılmasından irəli gəldiyi deyilir. Başqa sözlə, bu cür mühüm məqama əhəmiyyət verilməməsi sürücülər tərəfindən xüsusilə qadın sərnişinlərə qarşı nalayiq davranışların sayının getdikcə artmasına, hətta bəzən bu məsələdə sürücülərin qarət yolunu tutmağa cəhd göstərmələrinə gətirib çıxardığı vurğulanır.
Bir müddət bundan əvvəl Rəqəmsal İnkişaf və Nəqliyyat Nazirliyində respublikada fəaliyyət göstərən taksi şirkətlərinin nümayəndələri ilə görüşdə yuxarıda sadalanan məsələlərə toxunularaq ölkə ərazisində sərnişindaşıma sisteminin təşkilini təkmilləşdirmək məqsədi ilə taksi xidmətinin kompleks şəkildə tədqiq olunduğu, daha səmərəli idarəetmə sisteminin yaradılması əsasında taksi xidmətinin keyfiyyətinin yüksəldilməsi imkanları araşdırıldığı bildirilib.
Adıçəkilən nazirliyin məlumatında, həmçinin bildirilir ki, hazırda ölkə ərazisində minik avtomobilləri ilə taksi xidməti göstərən, eyni zamanda, taksi xidmətlərinin təşkilini, sifarişlərin idarə olunmasını həyata keçirən yerli və xarici şirkətlər mövcuddur. Əksər şirkətlərin məlumat bazası isə xarici ölkələrdə yerləşir və bu da “Fərdi məlumatlar haqqında” Qanuna ziddir. Halbuki həmin qanuna əsasən, respublikamızda fərdi məlumatların informasiya sistemləri dövlət qeydiyyatından keçməlidir. Yalnız bundan sonra fərdi məlumatların toplanılmasına və işlənilməsinə icazə verilir.
Sözügedən məlumatda o da xatırladılır ki, taksi minik avtomobilləri ilə sərnişin daşımaları sahəsində yeni dövlət siyasətinin formalaşdırılması və islahat mexanizmlərinin tətbiqi istiqamətində mütəmadi olaraq tədbirlərin həyata keçirilməsi zəruridir.
Eyni zamanda, həmin məlumatda taksi fəaliyyətini tənzimləyən və taksi minik avtomobillərinə dair tələbləri müəyyənləşdirən Nazirlər Kabinetinin 2019-cu il 4 mart tarixli Qərarından irəli gələn məsələlərə də toxunulub, sərnişindaşımanı yerinə yetirən taksi nəqliyyat vasitələrinin milli və beynəlxalq standartlara, həmçinin normativlərə uyğun texniki təchizata, habelə ekoloji standartlara uyğun olması zərurəti diqqətə çatdırılıb.
Tələblərə əsasən daşımalarda istifadə edilən taksi minik avtomobilləri müvafiq rəngdə olmalı, nəqliyyat vasitəsinin salonunda sürücü və daşınma tarifi haqqında məlumat lövhələri yerləşdirilməlidir. Taksi minik avtomobillərinin sürücüləri etik davranış qaydalarına və avtomobil nəqliyyatı ilə sərnişin daşımalarını tənzimləyən normativ hüquqi aktlara dair xüsusi hazırlıq keçməlidirlər.
Amma nəinki bu sadalananlara əməl edilir, heç taksi fəaliyyətində istifadə olunan avtomobillərin əksəriyyətinin köhnə və yararsızlığı belə narahatlıq doğurmur. Azərbaycanda təcrübəli taksi sürücüləri olmadığına görə, gənclər, ümumiyyətlə, sürücülükdən dərin anlayışı olmayan qeyri-peşəkar şəxslər bu işə cəlb edilirlər. Bu, bölgələrə, hətta kənd təsərrüfatına da ziyan vurur. Çünki regionlarda kənd təsərrüfatı ilə məşğul olmaq istəməyən, qazanc əldə edə bilməyən cavanlar da Bakıya üz tutur, burada bir avtomobil icarəyə götürüb, taksi fəaliyyəti ilə məşğul olurlar...
Nazirlər Kabinetinin yuxarıda sözügedən qərarında taksi fəaliyyətinə cəlb oluna biləcək şirkət və nəqliyyat vasitəsinə qarşı tələblər izah edilərkən bildirilib ki, sərnişin daşımaları müvafiq icazəsi olan şəxslər tərəfindən yerinə yetirilə bilər. İcazə “Lisenziyalar və icazələr haqqında” Qanuna əsasən, taksi minik avtomobilləri üçün “Fərqlənmə nişanı” alınmalıdır. “Fərqlənmə nişanı”nı almaq üçün “onlayn” qaydada “e-fn.ayna.gov.az” ünvanına, həmçinin Bakı, Yevlax və Xaçmaz KOB evlərində Rəqəmsal İnkişaf və Nəqliyyat Nazirliyinin müvafiq xidmət mərkəzlərinə müraciət etmək mümkündür.
Ərşad HÜSEYNOV,
hüquqşünas, yol hərəkəti üzrə ekspert
Azərbaycanda taksi fəaliyyəti ilə bağlı xeyli qanun var, amma problem qanunvericiliyin köhnə olmasındadır və yalnız klassik taksi fəaliyyətini tənzimləyə bilir.
Bu qanun aqreqatorlar, müxtəlif platformalar üzərindən taksi sifarişləri qəbul edən taksilərin fəaliyyətini tənzimləməyə yaramır. Ən böyük çatışmazlıq isə odur ki, bu qanunlar 2000-ci illərin əvvəllərində qəbul edilib və burada aqreqatorun fəaliyyəti ilə bağlı heç bir məlumat, həmin taksilərin fəaliyyətinin tənzimlənməsi üçün heç bir müddəa yoxdur. Ona görə də mövcud qanunvericiliyi təkmilləşdirmək lazımdır. Bunun üçün beynəlxalq təcrübə var.
Dünyanın hər yerində hüquq ictimai münasibətlərə uyğunlaşdırılır. İctimai münasibətlərin mahiyyətində yeniliklər olan kimi bu, qanunvericilikdə tətbiq edilir. Amma bizdə bu aqreqatorlar çoxdan var və pandemiya dövründə də geniş yayıldı. Həmin aqreqatorların adı qanunvericilikdə yoxdur. Belə olan halda onlara necə nəzarət ola bilər?!.
Hüquqşünas məsələnin həlli üçün vahid nəzarət sisteminin tətbiqini vacib sayır. Onun sözlərinə görə, problemi aradan qaldırmaq üçün vahid taksi sistemi deyil, taksilərə nəzarət qurumunun vahid sistemi olmalıdır. Vahid taksi sistemi nə praktiki, nə hüquqi, nə də nəzəri olaraq mümkündür. Burada söhbət xidmətin vahidliyindən getmir. Vahid nəzarət dövlət adından olmalıdır. Azərbaycanda gömrük, DİN-in vahid nəzarət sistemi var. Məsələn, ABŞ-da nəzarət qurumunun vahid sistemi var ki, tutaq ki, ölkədə 50 şirkət varsa, onların hamısına bir dövlət qurumu nəzarət edir. Həmin qurumun da vahid sistemi var. Ölkədə olan taksi şirkətləri həmin sistemə inteqrasiya edir və sistemə daxil olan sürücülərlə bağlı bütün məlumatlar reallaşır.
Taksilərə vahid nəzarət sistemi olmayanda onlara yetərli nəzarət etmək mümkün olmur və sui-istifadə halları baş verir. Həmin sürücülər 12–14 saat istismar olunur. Şərtlər isə belədir ki, onlar normal qazanc əldə etmək üçün bu qədər uzun müddət çalışırlar, bu da təbii ki, sürücü olmaq məntiqinə ziddir. Heç kəs hər gün 12 saat avtomobil idarə edə bilməz.
Onu da qeyd edim ki, taksi fəaliyyəti ilə bağlı paytaxtda baş verən son xoşagəlməz hadisələri hər hansı avtomobil markasının adına bağlamaq düzgün deyil. Burada vacib olan insan amilidir.
Vaqif BAYRAMOV, “Xalq qəzeti”