Hayastanın paytaxtında əks-qütblərdəki qüvvələrin bir ay əvvəlki qarşıdurması barədə “İrəvanda ara qarışıb, məzhəb itib” sərlövhəli məqalə yazmışdıq. Bu gün yalnız məzhəblərini deyil, həm də başlarını itirmiş hayların bir-birinə qarşı ittihamları, az qala, “rinq razborkaları”nı xatırladır.
Daxili ehtirasların coşduğu ölkədə baş nazir Nikol Paşinyanın özünə və hökumətinə qarşı çıxanları bir neçə istiqamətdə qruplaşdırmaq mümkündür. Bunlar əsasən “məxməri inqilab” nəticəsində yüksək vəzifələri itirən və Paşinyanın əlindən yanıqlı olan “ekslər”, vaxtilə indiki hakim komandada olub sonra yollarını ayıranlar (məsələn, milli təhlükəsizlik xidmətinin direktoru Artur Vanetsyan), övladları İkinci Qarabağ müharibəsində həlak olanların valideynləri və yaxınları (rəsmi İrəvan müharibədə 3781 nəfəri itirdiyini bildirir, reallıqda isə bu rəqəm dəfələrlə böyükdür), müharibə tərəfdarı olan, Paşinyanı xain hesab edən revanşistlər, Qarabağ klanı və ənənəvi müxalifətdir.
Ermənistanda revanşistlərin getdikcə güclənməsi bir reallıqdır. Onlar xüsusilə, N.Paşinyanın Azərbaycanın 86,6 min kvadratkilometrlik ərazi bütövlüyünü tanıması ilə bağlı verdiyi bəyanatlardan sonra aktivləşiblər. Bu xüsusda, mayın 19-da Hindistanın ölkəmizdə yeni təyin olunan fövqəladə və səlahiyyətli səfiri Sridharan Madhusudhananın etimadnaməsini qəbul edərkən, Azərbaycan Prezidenti İlham Əliyevin səsləndirdiyi fikirlər maraq doğurur. Dövlətimizin başçısı bildirib ki, bu gün Ermənistanda revanşist qüvvələr baş qaldırmaqdadır, ölkəmizə qarşı ərazi iddiaları davam edir. Ermənistanın sürətlə silahlanmasının yeni təhlükələr yaratdığını deyən cənab İlham Əliyev qeyd edib ki, əgər doğrudan da, Ermənistan Azərbaycan ilə sülh istəyirsə onda nə üçün 100 milyonlarla dollar dəyərində silah alır. Azərbaycan Prezidenti vurğulayıb ki, bu siyasət bölgə üçün yeni təhdidlərə gətirib çıxara bilər.
***
Mayın 18-də Ermənistanın və Qarabağın 30-dan çox “siyasi qüvvəsi”nin birgə bəyanatla çıxış etməsi də təsadüfi sayılmamalı və revanşistlərin güclənməsinin göstəricisi hesab olunmalıdır. Onlar bəyanatda bildiriblər ki, hazırkı geosiyasi şəraitdə təzyiq və təhdid altında Ermənistan–Azərbaycan danışıqlarının süni şəkildə (?) sürətləndirilməsi erməni xalqının maraqlarına uyğun deyil. Nikol Paşinyanın isə Ermənistan–Azərbaycan münasibətlərinin nizamlanması ilə bağlı razılaşmalar əldə etmək və vədlər vermək səlahiyyəti yoxdur (?). Görün, revanşistlər necə hədlərini aşıblarsa, 2021-ci ilin iyununda növbədənkənar parlament seçkilərində seçicilərin 54 faizinin səsini, qanunverici orqanda 71 deputat mandatı qazanaraq baş nazir seçilən şəxsin Azərbaycanla razılaşma əldə etmək səlahiyyətinin olmadığını iddia edirlər.
İmzalanan bəyanatda əli günahsız azərbaycanlıların qanına batmış Robert Koçaryanın başçılıq etdiyi, parlamentdə 27 deputat yerinə malik “Hayastan” alyansının (alyansda “Daşnaksütyun” və “Dirçələn Ermənistan” partiyaları birləşib) adının ilk sırada yazılması bu bəyanatın hazırlanma təşəbbüsünün haradan gəldiyini bəlli edir. Üstəlik, siyahıda siyasi qüvvələrin say çoxluğunu təmin etmək üçün Erməni İnqilabi Federasiyası –“Daşnaksütyun” partiyasının adı təmsil olunduğu blokdan ayrı yazılıb.
Ancaq N.Paşinyan və onun silahdaşları da az aşın duzu deyil. Baş nazirin rəhbərlik etdiyi “Vətəndaş razılaşması” partiyasından olan deputat Akop Aslanyan “Daşnaksütyun”un fəaliyyətinin qadağan olunması təşəbbüsü ilə çıxış edib. Onun sözlərinə görə, “Daşnaksütyun” Ermənistanın müxtəlif rayonlarındakı yerli təşkilatlarını buraxıb. A.Aslanyan bunu dürüstlük kimi qiymətləndirib. Qeyd edib “Daşnaksütyun”un fəaliyyət göstərməsi üçün qanuni əsaslar yoxdur: “Partiyalar haqqında” qanuna əsasən, bu təşkilatın fəaliyyəti qadağandır”.
A.Aslanyan deyib ki, partiya fəaliyyətini bərpa etmək üçün qurultay keçirməlidir, ancaq daşnaklar bunu etməyiblər: “Daşnaksütyun” anti-erməni təşkilat olduğuna görə, fəaliyyətinin dayandırılması zəruridir. Bunu yalnız mən demirəm, tanınmış insanlar da bu fikirdədirlər. Biz bu təşkilatın bağlanması üçün prosesə başlamaq niyyətindəyik. Hətta, bizim bu təşəbbüsümüz uğursuz olsa belə, “Daşnaksütyun” bir neçə ildən sonra ölü partiya kimi siyasi səhnəni tərk edəcək”.
O, “Daşnaksütyun” partiyasını xaricə casusluqda ittiham edib və bununla bağlı əlavə araşdırmalar apardığını, materiallar topladığını da deyib. Yeri gəlmişkən, qeyd edək ki, 1994-cü ilin dekabrın 28-də Ermənistanın ilk prezidenti Levon Ter-Petrosyanın sərəncamına əsasən, siyasi partiyalar haqqında qanunu pozduğu üçün “Daşnaksütyun”un fəaliyyəti qadağan olunub. Ter-Petrosyanın devrilməsindən sonra Robert Koçaryan daşnakları yenidən siyasi səhnəyə qaytarıb.
***
Revanşistlərin fəallaşması fonunda Ermənistanda baş verən digər hadisə –N.Paşinyanın oğlunun oğurlanmasına cəhd olayı da diqqətdən qaçmır. Bu insident Ermənistan cəmiyyətində qütbləşmənin səviyyəsindən və revanşist düşərgənin açıq-aşkar radikallaşması prosesindən xəbər verir. Yeri gəlmişkən qeyd edək ki, bütün erməni cəmiyyəti bu və ya digər dərəcədə revanşizmdən əziyyət çəkir. Olay Ermənistanın siyasi həyatında terrorizmdən istifadənin “zəngin ənənələrə” malik olmasının da göstəricisidir. Aşota məhz atasının Qərbdə – İslandiyada olduğu vaxtda və ictimaiyyət qarşısında Azərbaycanın 86,6 min kvadratkilometr ərazisini tanıdığını bəyan etdiyi vaxtda, habelə mayın 25-də Moskvada gözlənilən növbəti üçtərəfli görüş ərəfəsində hücum təsadüfə oxşamır və daha çox Ermənistan baş nazirinin özü üçün təhdid siqnalıdır.
Paralel olaraq Qarabağ iqtisadi rayonunda Rusiya sülhməramlılarının müvəqqəti məsuliyyət zonasında “proseslər” vüsət alır. Hansısa qüvvələr tərəfindən burada son günlər Ruben Vardanyanın müqəvvasının yenidən aktivləşdirilməsinə çalışılır. Qondarma rejimin keçmiş “təhlükəsizlik şurasının katibi” Samvel Babayan fəallaşıb, Arayik Arutyunyanın “istefası” ilə bağlı təşəbbüs başladılıb, sosial şəbəkələr qismən bloklanıb. Ancaq İrəvan və Xankəndidəki proseslərdən asılı olmayaraq, bu bölgədə həlledici faktor Azərbaycandır. Ermənistan tərəfinin atacağı sonrakı addımlar (o cümlədən, xarici təsirlər altında) Bakının bundan sonrakı addımlarının mahiyyətinə deyil, formasına təsir edə bilər. Və bu mahiyyət Prezident İlham Əliyevin bir neçə il öncəki məşhur ifadəsində ehtiva olunub: Qarabağ Azərbaycandır!
Züriyə QARAYEVA,
siyasi şərhçi
– Ermənistanda daxili qarşıdurmaların yaşanması gözlənilən idi. Çünki bu ölkə tamamilə dalana dirənmiş vəziyyətdədir. Paşinyan 2021-ci ildə müəyyən vədlər verərək növbədənkənar seçkidə qalib gələ bildi. Zənnimcə, qarşıdurmalarda bir səbəb verilən vədlərin yerinə yetirilməməsidir. Haylar artıq Azərbaycanla münasibətlərlə bağlı da Paşinyana suallar verməyə başlayıblar. Onun Azərbaycanın ərazi bütövlüyü ilə bağlı bəyanatlarından sonra daxildə ehtiraslar daha da qızışıb. Sülh müqaviləsinin imzalanması həm də sərhədlərin delimitasiyası deməkdir. Bu isə Hayastanın daha çox ərazi itkisinə məruz qalmasıdır. Hazırkı etirazlar onların təbirincə desək, Paşinyanın yarıtmaz siyasəti ilə bağlıdır.
Digər tərəfdən, Paşinyan hər nə qədər Qərbə yönəlik siyasət yürütsə də, Rusiyanın asılılığından faktiki olaraq qurtula bilmir. Ona görə də Paşinyan, sanki, iki od arasında qalaraq çapalayır. Rusiyayönümlü qüvvələr Paşinyanın Qərbyönümlü siyasətinə qarşı çıxırlar. Nəticə etibarilə baş nazirə qarşı daha geniş cəbhə yaranır və siyasi qüvvələr arasında ziddiyyətlər kəskinləşir.
Səxavət HƏMİD, “Xalq qəzeti”